បក្សប្រឆាំង ស្នើសុំឲ្យបើកផ្លូវទាំងអស់ក្នុងរាជធានីភ្នំពេញ សម្រាប់ហែក្បួនឃោសនាបោះឆ្នោត

ជាតិ

បក្សប្រឆាំង ស្នើសុំឲ្យបើកផ្លូវទាំងអស់ក្នុងរាជធានីភ្នំពេញ សម្រាប់ហែក្បួនឃោសនាបោះឆ្នោត

16, May 2017 , 2:24 pm

រូបភាព

ដោយ: ម៉ៅ សុផា

ភ្នំពេញ៖ មន្ត្រីគណបក្សសង្គ្រោះជាតិ បានជួបពិភាក្សាជាមួយមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកថ្ងៃទី១៦ ខែឧសភា ឆ្នាំ២០១៧នេះ ជុំវិញការហាមឃាត់មិនឲ្យដង្ហែក្បួនឃោសនាបោះឆ្នោត លើកំណាត់ផ្លូវមួយចំនួន នៅក្នុងរាជធានីភ្នំពេញ។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានប្រាប់ក្រុមអ្នកសារព័ត៌មានក្រោយកិច្ចប្រជុំថា គណបក្សសង្គ្រោះជាតិ ស្នើឲ្យគ.ជ.ប ពិភាក្សាជាមួយនឹងសាលារាជធានីភ្នំពេញ ដើម្បីសុំឲ្យលុបចោលវិញ ចំពោះបម្រាម ដែលមិនឲ្យមានការដង្ហែក្បួនឃោសនាបោះឆ្នោត លើកំណាត់ផ្លូវមួយចំនួន នៅក្នុងរាជធានីភ្នំពេញ។

អ្នកនាំពាក្យគណបក្សសង្គ្រោះជាតិរូបនេះ និយាយដូច្នេះថា៖«ខ្ញុំយល់ឃើញថា ប្រជាពលរដ្ឋនៅតាមបណ្តោយផ្លូវហ្នឹងច្រើន ហើយពួកគាត់ ក៏មានសិទ្ធិទទួលបានព័ត៌មានពីគណបក្សនយោបាយដែរ។ អ៊ីចឹងគួរតែបើកឲ្យទូលាយ។ យើង សង្ឃឹមថា (នឹងទទួលបានលទ្ធផលវិជ្ជមាន) ព្រោះអ្វីដែលគណបក្សសង្គ្រោះជាតិ ស្នើសុំ អត់មានភាពហួសហេតុទេ។ វា គឺជាគំនិតនិងការផ្តល់យោបល់ ក្នុងគោលបំណងជៀសវាងការប្រឈមដាក់គ្នា ឬការប៉ះទង្គិចគ្នា នៅពេលឃោសនាបោះឆ្នោត»។

បើតាមលោក យឹម សុវណ្ណ ជំនួបរវាងគណបក្សសង្គ្រោះជាតិ ជាមួយគ.ជ.ប គឺគ្រប់គ្រាន់ហើយ ដូច្នេះគណបក្សសង្គ្រោះជាតិ នឹងមិនចាំបាច់ទៅពិភាក្សាពីបញ្ហានេះ បន្ថែមទៀត ជាមួយនឹងសាលារាជធានីភ្នំពេញ នោះទេ។

នៅក្នុងកិច្ចប្រជុំនោះ គណបក្សសង្គ្រោះជាតិ ក៏បានស្នើសុំឲ្យគណបក្សនានា អាចចែកខិត្តប័ណ្ណ និងចាក់មេក្រូ ដើម្បីបញ្ជូនសារនយោបាយ និងគោលនយោបាយ ទៅដល់ប្រជាពលរដ្ឋ នៅតាមផ្សារ ឬទីប្រជុំជន។ ចំពោះសំណើនេះ គ.ជ.ប មិនជំទាស់នោះទេ។ ទាំងនេះ គឺជាការអះអាងរបស់លោក យឹម សុវណ្ណ ដដែល។

ចំណែកឯ សំណើ ដែលសុំកុំឲ្យហាមឃាត់ ក្នុងការដង្ហែក្បួនឃោសនាបោះឆ្នោត លើកំណាត់ផ្លូវមួយចំនួន នៅក្នុងរាជធានីភ្នំពេញ គ.ជ.ប មិនទាន់ផ្តល់ចម្លើយភ្លាមៗ នោះទេ។ លោក សោម សូរីដា អគ្គលេខាធិការរងនៃគ.ជ.ប ដែលមានវត្តមានក្នុងកិច្ចប្រជុំដែរនោះ បានប្រាប់ក្រុមអ្នកសារព័ត៌មានយ៉ាងខ្លីថា សំណើនេះ គ.ជ.ប សម្រេចយកទៅពិចារណាហើយ ហើយនឹងផ្តល់ចម្លើយនៅពេលក្រោយ។

ថ្មីៗនេះ សាលារាជធានីភ្នំពេញ បានដាក់សំណើទៅកាន់ «គណៈកម្មការរាជធានីភ្នំពេញ រៀបចំការបោះឆ្នោត» ដើម្បីសុំឲ្យហាមឃាត់ក្នុងការដង្ហែក្បួនឃោសនាបោះឆ្នោត លើកំណាត់ផ្លូវមួយចំនួន នៅក្នុងរាជធានីភ្នំពេញ ដូចជា កំណាត់ផ្លូវ នរោត្តម កំណាត់ផ្លូវ ម៉ៅ សេទុង និងកំណាត់ផ្លូវ កម្ពុជាក្រោម ជាដើម។ ចំណែកឯ ផ្លូវសហព័ន្ធរុស្ស៊ី គឺសាលារាជធានីភ្នំពេញ សុំមិនឲ្យដង្ហែក្បួនឃោសនាបោះឆ្នោត ទាំងស្រុងតែម្តង។

អ្នកនាំពាក្យសាលារាជធានីភ្នំពេញ ធ្លាប់លើកឡើងថា ការហាមឃាត់នេះ គឺដើម្បីធានាសណ្តាប់ធ្នាប់ និងសម្រួលចរាចរ ក្នុងអំឡុងនៃការដង្ហែក្បួនឃោសនាបោះឆ្នោត។

សូមបញ្ជាក់ថា ការឃោសនាបោះឆ្នោត នឹងចាប់ផ្តើមពីថ្ងៃទី២0 ខែឧសភា ដល់ថ្ងៃទី២ ខែមិថុនា ឆ្នាំ២0១៧៕