ជាតិ
អាដហុក ហាក់លំបាកក្នុងការសុំចូលជួបមន្ត្រីខ្លួន ដែលកំពុងជាប់ឃុំ ក្នុងរឿងស្រីមុំ លោក សំ ច័ន្ទគា អ្នកនាំពាក្យសមាគមអាដហុក
× ភ្នំពេញ៖ អស់រយៈពេលជាងកន្លះខែហើយ សមាគមអាដហុក បានដាក់សំណើទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីសុំចូលជួបមន្ត្រីរបស់ខ្លួនទាំង៤រូប រួមទាំងមន្ត្រីគ.ជ.ប ១រូបទៀត ដែលកំពុងជាប់ឃុំ នៅក្នុងពន្ធនាគារ។ ប៉ុន្តែ រហូតមកដល់ពេលនេះ ចៅក្រមស៊ើបសួរ មិនទាន់ឆ្លើយតបនឹងសំណើរបស់សមាគមអាដហុក នោះទេ។
មន្ត្រីសមាគមអាដហុក បានទៅកាន់សាលាដំបូងរាជធានីភ្នំពេញរួចហើយ ដើម្បីសួរព័ត៌មាន ជុំវិញសំណើសុំចូលជួបមន្ត្រីសមាគមអាដហុកទាំង៤រូប រួមទាំងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ១រូប ដែលកំពុងជាប់ឃុំ ក្នុងពន្ធានាគារ ដោយសារតែរឿងអាស្រូវរបស់ស្រីមុំ។ លោក សំ ច័ន្ទគា អ្នកនាំពាក្យសមាគមអាដហុក បានប្រាប់សារព័តមានថ្មីៗ យ៉ាងដូច្នេះ តាមប្រព័ន្ធទូរសព្ទ នៅថ្ងៃទី១៨ ខែឧសភា ឆ្នាំ២0១៧នេះ។
ពេលទៅសួរ មន្ត្រីសាលាដំបូងរាជធានីភ្នំពេញ បានប្រាប់យ៉ាងខ្លីថា សំណើរបស់សមាគមអាដហុក ដែលសុំចូលជួបអ្នកជាប់ឃុំក្នុងពន្ធនាគារ នៅមិនទាន់ទទួលបានការឆ្លើយតប ពីថ្នាក់លើនោះទេ។ មន្ត្រីសាលាដំបូងរាជធានីភ្នំពេញ មិនបញ្ជាក់នោះទេ ថាមូលហេតុអ្វី បានជាថ្នាក់លើ នៅតែមិនទាន់ឆ្លើយតបនឹងសំណើរបស់សមាគមអាដហុក។ ទាំងនេះ គឺជាការលើកឡើងរបស់លោក សំ ច័ន្ទគា ដដែល។
អ្នកនាំពាក្យសមាគមអាដហុករូបនេះ និយាយដូច្នេះថា៖«ទៅសួរគេ គេប្រាប់ថាថ្នាក់លើមិនទាន់ឲ្យសញ្ញា។ គេប្រាប់តែប៉ុណ្ណឹង គេអត់ប្រាប់ហេតុផលអ្វីផ្សេងទេ។ មិនដឹងថាថ្នាក់លើហ្នឹង គេចង់សំដៅលើចៅក្រមស៊ើបសួរ ឬក៏អ្នកនយោបាយណាទេ»។
លោក សំ ច័ន្ធគា លើកឡើងថា ការទៅសួរនេះ គឺដោយសារតែចៅក្រមស៊ើបសួរនៃសាលាដំបូងរាជធានីភ្នំពេញ នៅតែរក្សាភាពស្ងៀមស្ងាត់ ដោយមិនឆ្លើយតបនឹងសំណើរបស់សមាគមអាដហុក ដែលបានដាក់ តាំងពីដើមខែឧសភា ឆ្នាំ២0១៧មក។
លោក ធ្លាប់លើកឡើងថា វា ជាការបំពានសិទ្ធិរបស់ពិរុទ្ធជន ឬជនត្រូវចោទ ប្រសិនបើមិនឲ្យពួកគេ ជួបក្រុមគ្រួសារ សាច់ញាតិ ឬក៏មិត្តភក្តិ។ លោក ធ្លាប់អះអាងទៀតថា តាមច្បាប់ស្តីពីការគ្រប់គ្រងពន្ធនាគារ រួមទាំងសទ្ធិសញ្ញាអន្តរជាតិនានា ពិរុទ្ធជន ឬជនត្រូវចោទ មានសិទ្ធិជួបក្រុមគ្រួសារ សាច់ញាតិ ឬក៏មិត្តភក្តិរបស់ខ្លួន។
លោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ មិនទាន់ឆ្លើយតបនោះទេ ចំពោះបញ្ហាខាងលើ ដោយលោក ប្រាប់ថា កំពុងតែស្ថិតនៅឯបរទេស។
សូមរម្លឹកថា មន្ត្រីសមាគមអាដហុក៤រូប រួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងអគ្គលេខាធិការរង គ.ជ.ប លោក នី ចរិយា បានជាប់ឃុំអស់រយៈពេលជាង១ឆ្នាំហើយ។ មន្ត្រីសមាគមអាដហុក រងពីបទចោទ «សូកប៉ាន់សាក្សី» ហើយមន្ត្រីគ.ជ.ប រងពីបទចោទ «សមគំនិតក្នុងអំពើសូកប៉ាន់សាក្សី»។ អ្នកទាំងនេះ សុទ្ធតែជាប់ពាក់ព័ន្ធនឹងរឿងអាស្រូវរបស់ស្រីមុំ តាំងពីឆ្នាំ២0១៦ មកម្ល៉េះ៕
Tag:
អាដហុក
គជប
ស្រីមុំ
© រក្សាសិទ្ធិដោយ thmeythmey.com