ដើម្បីគ្រួសារ Big Sam សម្រេចលាលែងតំណែងគ្រូបង្វឹកពី Crystal Palace

កីឡាអន្តរជាតិ

អន្តរជាតិ

ដើម្បីគ្រួសារ Big Sam សម្រេចលាលែងតំណែងគ្រូបង្វឹកពី Crystal Palace

24, May 2017 , 4:50 pm

រូបភាព

ដោយ: ទេព ពិទូរ្យ

លោក Sam Allardyce ហៅ Big Sam បានប្រកាសលាលែងពីតំណែងជាអ្នកចាត់ការទូទៅក្រុម Crystal Palace បន្ទាប់ពីដឹកនាំក្រុមក្នុងក្របខណ្ឌ Premier League នេះអស់រយៈពេល៥ខែ។ នេះបើតាមសេចក្តីប្រកាសព័ត៌មាន របស់ក្លិបកាលពីថ្ងៃទី២៣ ខែឧសភា។

Big Sam បានចូលរួមជាមួយ Crystal Palace ដោយចុះកិច្ចសន្យា២ឆ្នាំកន្លះ ដើម្បីជំនួសតំណែង Alan Pardew កាលពីខែធ្នូកន្លងមក ខណៈដែលក្រុមនេះកំពុងស្ថិតលើក្រុមដែលត្រូវកាត់ចោលតែមួយពិន្ទុប៉ុណ្ណោះ។

ក្នុងវ័យ៦២ឆ្នាំ អតីតអ្នកចាត់ការក្រុមជម្រើសជាតិអង់គ្លេសបានតែមួយប្រកួតនេះ បានជួយឲ្យក្រុមដែលមានរហស្សនាមឥន្ទ្រី ឈ្នះ៨លើក ក្នុងចំណោម២១ប្រកួតចុងក្រោយ ឈរនៅចំណាត់ទី១៤ក្នុងតារាងពិន្ទុរបស់ Premier League រដូវកាលនេះ។

ហេតុផលជុំវិញការចាកចេញរបស់អ្នកដឹកនាំសញ្ជាតិអង់គ្លេសនេះបានបញ្ជាក់ថា លោកលែងមានមហិច្ឆតាដើម្បីដឹកនាំក្រុមណាទៀតហើយនៅពេលនេះ។

Allardyce បន្ថែមទៀតថា៖«ខ្ញុំចង់មានពេលសម្រាប់ជីវិតផ្ទាល់ខ្លួន និងគ្រួសារ នៅពេលដែលខ្ញុំនៅមានសុខភាពល្អគ្រប់គ្រាន់ដើម្បីធ្វើអ្វីដែលខ្ញុំចង់ធ្វើ ដូចជាដើរលេងលំហែកាយ ចំណាយពេលជមួយក្រុមគ្រួសារ និងចៅៗដោយគ្នានសម្ពាតការងារធ្ងន់ធ្ងរដូចជាការងារជាអ្នកដឹកនាំបាល់ទាត់នេះ។ នេះជាពេលវេលាដ៏ត្រឹមត្រូវសម្រាប់ខ្ញុំចាកចេញ»។

សូមបញ្ជាក់ថា អតីតអ្នកចាត់ការក្រុម Bolton និង Blackburnនេះ ធ្លាប់ដឹកនាំក្រុមជម្រើសជាតិអង់គ្លេសបានតែ៦៧ថ្ងៃប៉ុណ្ណោះក្រោយចាកចេញពី Sunderland។ ជាមួយនឹងការលាលែងពី Crystal Palace មានន័យថា Big Sam នៅសល់កិច្ចសន្យារហូតដល់ទៅ២ឆ្នាំទៀតឯណោះ៕