អន្តរជាតិ
អាមេរិក និងអាល្លឺម៉ង់ មើលមុខមិនចំ ដោយសារនយោបាយលោក ត្រាំ ប្រធានាធិបតី ដូណាល់ ត្រាំ ជួបជាមួយអធិការបតីអាល្លឺម៉ង់ អែនជេឡា មឺហ្គែល នៅសេតវិមាន (រូបភាព NBC News)
× ប៉ុន្មានថ្ងៃចុងក្រោយនេះ ថ្នាក់ដឹកនាំអាមេរិក និងអាល្លឺម៉ង់ បានផ្លាស់ប្ដូរសារនយោបាយជាច្រើនក្នុងន័យវាយប្រហារគ្នាទៅវិញទៅមក ដែលជាសញ្ញាបង្ហាញការធ្លាក់ចុះទំនាក់ទំនងរវាងសម្ព័ន្ធមិត្តទាំងពីរនេះ។ ប្រធានាធិបតី ដូណាល់ ត្រាំ បានវាយប្រហារអាល្លឺម៉ង់ដែលមិនទាន់បានបង់ថ្លៃគ្រប់គ្រាន់ទៅឲ្យណាតូ តាមការសន្យារបស់ខ្លួននៅឡើយ ហើយថែមទាំងរិះគន់ឱនភាពពាណិជ្ជកម្មរវាងប្រទេសទាំងពីរទៀតផង។ ឯអាល្លឺម៉ង់ក៏រិះគន់នយោបាយរបស់រដ្ឋបាលលោក ត្រាំ វិញដែរ។
ភ្លាមៗបន្ទាប់ពីបញ្ចប់កិច្ចប្រជុំក្រុមប្រទេសប្រាំពីរ (G7) នៅអ៊ីតាលី អធិការបតីអាល្លឺម៉ង់ អែនជេឡា មឺហ្គែល ក៏ផ្ដើមវាយប្រហារអាមេរិកភ្លាម ដោយបាននិយាយថា ចាប់ពីពេលនេះតទៅ អឺរ៉ុបមិនអាចពឹងផ្អែកលើអាមេរិកបានដូចមុនទៀតឡើយ។ លោកស្រី មឺហ្គែល និយាយបែបនេះ ក្រោយលោក ដូណាល់ ត្រាំ បានបន្តទារថ្លៃចំណាយរបស់ណាតូដល់ទីស្នាក់ការតែម្ដង ហើយលោកក៏មិនបានប្ដេជ្ញាចិត្តអនុវត្តតាមគោលការណ៍របស់ណាតូ ដែលចែងពីការជួយគ្នាទៅវិញទៅមកក្នុងគ្រាអាសន្នដែរ។
បន្តមកទៀត អធិការបតីរង និងជារដ្ឋមន្ត្រីការបរទេស Sigmar Gabriel ក៏បន្តរិះគន់នយោបាយរបស់រដ្ឋបាលលោក ត្រាំ ដែលផ្ទុយពីនយោបាយរបស់អឺរ៉ុប និងកំពុងធ្វើឲ្យអឺរ៉ុបចុះខ្សោយកាន់តែខ្លាំង។ ទំនងចង់ថាឲ្យលោក ត្រាំ ប្រមុខការទូតអាល្លឺម៉ង់ និយាយថា៖ «អ្នកដែលចង់ពន្លឿនបម្រែបម្រួលអាកាសធាតុតាមរយៈការធ្វើឲ្យចុះខ្សោយស្ថាប័នការពារបរិស្ថាន, អ្នកដែលផ្គត់ផ្គង់អាវុធទៅតំបន់ជម្លោះ, អ្នកដែលមិនចង់ដោះស្រាយបញ្ហានៅអឺរ៉ុប កំពុងធ្វើឲ្យអឺរ៉ុបប្រឈមមុខគ្រោះថ្នាក់ហើយ»។
ឆ្លើយតបនឹងពាក្យរិះគន់របស់អ្នកនយោបាយអាល្លឺម៉ង់ លោក ត្រាំ ក៏បានប្រើបណ្ដាញសង្គម Twitter វាយបកលើរដ្ឋការក្រុងបែរឡាំងវិញ។ ប្រធានាធិបតីអាមេរិកបានសរសេរលើ Twitter របស់លោក នៅ ថ្ងៃទី៣១ ខែឧសភា ថា អាមេរិកមានឱនភាពពាណិជ្ជកម្មយ៉ាងធំជាមួយអាល្លឺម៉ង់ បូករួ ម ទាំង អាល្លឺម៉ង់មិនបានបង់ថ្លៃចំណាយសម្រាប់ណាតូតាមការសន្យាទៀត។ លោកបន្តថា នេះជារឿង អាក្រក់សម្រាប់អាមេរិក តែវានឹងប្រែប្រួលមិនខាន។
ប្រធានាធិបតីអាមេរិកជឿថា សម្ព័ន្ធមិត្តនៅអឺរ៉ុបរបស់លោកជំពាក់លុយអាមេរិកច្រើនណាស់ទាំងវិស័យការពារជាតិ និងពាណិជ្ជកម្មទៀតផង។ តាមពិតទៅ វាក៏មិនមានជារឿងគួរភ្ញាក់ផ្អើលអ្វីដែរ ព្រោះលោក ត្រាំ ប្រកាន់ជំហររបៀបនេះតាំងពីពេលចេញឃោសនាមកម្ល៉េះ។ លោក ក៏ប្រកាសក្ដែងៗដែរថា ប្រជាជនអាមេរិក មិនអាចទ្រាំទ្រនឹងអម្រែកហិរញ្ញវត្ថុតែឯងបានទៀតឡើយ ហើយសមាជិកណាតូផ្សេងទៀតត្រូវតែជួយចេញថ្លៃចំណាយនេះ។
យ៉ាងណាមិញ លោក Martin Schulz ដែលជាបេក្ខជនអធិការបតីអាល្លឺម៉ង់ បានហៅការបង្ហោះសារតាម Twitter ខាងលើនេះ គឺជាភស្តុតាងបញ្ជាក់ច្បាស់ថា លោក ត្រាំ កំពុងចាត់ទុកអាល្លឺម៉ង់ជាសត្រូវនយោបាយរបស់លោកហើយ។ បើតាមសារព័ត៌មាន RT អ្នកនយោបាយអាល្លឺម៉ង់រូបនេះសង្កត់ធ្ងន់ថា លោក ត្រាំ កំពុងបំផ្លាញតម្លៃរបស់បស្ចិមលោក ហើយប្រធានាធិបតីអាមេរិក កំពុងធ្វើឲ្យអន្តរាយដល់កិច្ចសហប្រតិបត្តិការដោយសន្តិភាពទៀតផង៕
Tag:
អាមេរិក
អាល្លឺម៉ង់
ដូណាល់ ត្រាំ
© រក្សាសិទ្ធិដោយ thmeythmey.com