អន្តរជាតិ
ដូណាល់ ត្រាំ សរសើរនាយករដ្ឋមន្ត្រីវៀតណាមដែលដឹកនាំប្រទេសបានល្អ ប្រធានាធិបតីអាមេរិក ដូណាល់ ត្រាំ ស្វាគមន៍នាយករដ្ឋមន្ត្រីវៀតណាម ង្វៀន សួន ហ្វ៊ុក នៅសេតវិមាន (រូបភាព Xinhua)
× នាយករដ្ឋមន្ត្រីវៀតណាម ង្វៀន សួនហ្វ៊ុក (Nguyen Xuan Phuc) បានទៅដល់រដ្ឋធានីវ៉ាស៊ីនតោន តាមការអញ្ជើញរបស់ប្រធានាធិបតីអាមេរិក ដូណាល់ ត្រាំ ។ កិច្ចព្រមព្រៀងពាណិជ្ជកម្មតម្លៃជិត១៧ពាន់លានដុល្លារ ត្រូវបានចុះហត្ថលេខាអំឡុងពេលទស្សនកិច្ចរបស់នាយករដ្ឋមន្ត្រីវៀតណាម ហើយលោក ត្រាំ ពិតជាសប្បាយចិត្តខ្លាំងនឹងការចុះកិច្ចព្រមព្រៀងពាណិជ្ជកម្មនេះ។ ប្រធានាធិបតីអាមេរិក ក៏និយាយសរសើរការដឹកនាំប្រទេសរបស់នាយករដ្ឋមន្ត្រីវៀតណាមដែរ។
ធ្លាប់ជាអតីតគូសត្រូវ ស៊ីសាច់ហុតឈាម ក្នុងសម័យសង្គ្រាម បច្ចុប្បន្នទំនាក់ទំនងរវាងអាមេរិក និងវៀតណាម ប្រែមកកាន់តែប្រសើរឡើង។ នៅថ្ងៃទី៣១ ខែឧសភា ប្រធានាធិបតីអាមេរិក ដូណាល់ ត្រាំ បានទទួលស្វាគមន៍នាយករដ្ឋមន្ត្រីវៀតណាម ង្វៀន សួនហ្វ៊ុក នៅសេតវិមានយ៉ាងកក់ក្ដៅ។ លោក ង្វៀន សួនហ្វ៊ុក គឺជាមេដឹកនាំអាស៊ានទីមួយ ដែលបានជួបទល់មុខ ជាមួយប្រធានាធិបតីអាមេរិក ចាប់តាំងពីលោកចូលកាន់អំណាចក្នុងខែមករា។
អ្វីគួរឲ្យកត់សម្គាល់នោះ ប្រធានាធិបតីអាមេរិក មិនបាននិយាយអ្វីទាល់តែសោះ បញ្ហារំលោភសិទ្ធិមនុស្សនៅវៀតណាម តែលោកបែរជាលើកសរសើរនាយករដ្ឋមន្ត្រីវៀតណាមទៅវិញ។ លោក ត្រាំ និយាយថា លោក ង្វៀន សួន ហ្វ៊ុក បានបំពេញការងារដ៏អស្ចារ្យនៅប្រទេសរបស់គាត់ និងបានដឹកនាំការងារពាណិជ្ជកម្មជាច្រើន។ លោកបន្តទៀតថា ប្រធានបទច្រើននឹងត្រូវពិភាក្សាដូចជាបញ្ហាកូរ៉េខាងជើង, ពាណិជ្ជកម្ម និងបញ្ហាផ្សេងទៀត ដើម្បីជំរុញទំនាក់ទំនងទ្វេភាគី។
យ៉ាងណាក្ដី ពាណិជ្ជកម្ម គឺជាប្រធានសំខាន់ក្នុងជំនួបលើកទីមួយនេះ។ នាយករដ្ឋមន្ត្រីវៀតណាមនិយាយថា កិច្ចព្រមព្រៀងទិញទំនិញរបស់អាមេរិក ក្នុងតម្លៃចន្លោះ ១៥ពាន់លានដុល្លារ ទៅ ១៧ពាន់លានដុល្លារ នឹងត្រូវចុះហត្ថលេខា។ កិច្ចព្រមព្រៀងមានតម្លៃច្រើន ជាមួយក្រុមហ៊ុនអាមេរិកនេះ នឹងផ្ដោតលើទិញទំនិញប្រើបច្ចេកវិទ្យាទំនើប និងសេវាកម្មផ្សេងទៀត។ នេះបើតាមការផ្សាយរបស់សារព័ត៌មាន The New York Times ។
ជាក់ស្ដែងនោះ ក្រុមហ៊ុន General Elictric Co របស់អាមេរិកនិយាយថា ខ្លួនបានចុះហត្ថលេខាលើកិច្ចព្រមព្រៀងតម្លៃជាមួយ ៥,៥៨ពាន់លានដុល្លារ ជាមួយវៀតណាម លើការទិញទំនិញជាច្រើនមុខ ដូចជា ឧបករណ៍ផលិតថាមពល, ម៉ាស៊ីនយន្តហោះ និងសេវាកម្មជាច្រើនទៀត។ លោកប្រធានាធិបតី ត្រាំ ទំនងរីកមុខ រីកមាត់ ខ្លាំងណាស់ហើយ នឹងកិច្ចព្រមព្រៀងដែលត្រូវចុះហត្ថលេខា អំឡុងពេលទស្សនកិច្ចរបស់លោក ង្វៀន សួនហ្វ៊ុក ពេលនេះ។
ក្នុងបន្ទប់ពងក្រពើ មុនជំនួបជាមួយនាយករដ្ឋមន្ត្រីវៀតណាម លោក ត្រាំ បាននិយាយទៅកាន់អ្នកសារព័ត៌មានថា វៀតណាម បានទិញទំនិញជាច្រើនពីអាមេរិក ក្នុងតម្លៃជាច្រើនពាន់លានដុល្លារ ហើយលោកពិតជារីករាយ នឹងរឿងនេះខ្លាំងណាស់។ លោក ត្រាំ បន្តថា កិច្ចព្រមព្រៀងពាណិជ្ជកម្មនេះ នឹងជួយបង្កើតការងារច្រើនសម្រាប់ប្រជាជនអាមេរិក ហើយវៀតណាមនឹងទទួលបានទំនិញដែលមានគុណភាពអស្ចារ្យ៕
Tag:
អាមេរិក
ដូណាល់ ត្រាំ
វៀតណាម
ង្វៀន សួនហ្វ៊ុក
© រក្សាសិទ្ធិដោយ thmeythmey.com