ជាតិ
នយោបាយជាតិ
បោះឆ្នោតឃុំ-សង្កាត់អាណត្តិនេះ មានអ្នកសង្កេតការណ៍ជាង១៧ម៉ឺននាក់
× ភ្នំពេញ៖ អង្គការជាតិ-អន្តរជាតិ និងស្ថានទូតនានា រួមទាំងគណបក្សនយោបាយ បានបញ្ជូនឈ្មោះអ្នកសង្កេតការណ៍របស់ខ្លួនជាង ១៧ម៉ឺននាក់ ទៅកាន់ គ.ជ.ប ដើម្បីសុំចូលរួមឃ្លាំមើលដំណើរការ បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤នេះ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានប្រាប់សារព័ត៌មានថ្មីៗថា អង្គការជាតិ និងអន្តរជាតិ ស្ថានទូតនានា រួមនឹងគណបក្សនយោបាយផង បានបញ្ជូនឈ្មោះអ្នកសង្កេតការណ៍ សរុបជាង១៧ម៉ឺននាក់ មកកាន់ គ.ជ.ប ដើម្បីសុំចូលរួមឃ្លាំមើលដំណើរការបោះឆ្នោតឃុំសង្កាត់។ បើតាមអ្នកនាំពាក្យ គ.ជ.ប អង្គការជាតិ មានអ្នកសង្កេតការណ៍ចំនួន ៧៤,០៩២ នាក់ អង្គការអន្តរជាតិ និងស្ថានទូតនានាមានអ្នកសង្កេតការណ៍តែ ១៩២ នាក់ប៉ុណ្ណោះ។
លោក ហង្ស ពុទ្ធា បន្តថា គណបក្សនយោបាយទាំង១២ ដែលចូលរួមប្រកួតប្រជែងការបោះឆ្នោតថ្នាក់ឃុំ-សង្កាត់ នាអាណត្តិទី៤នេះ ក៏បានបញ្ជូនសំណើទៅកាន់ គ.ជ.ប រួចអស់ហើយដែរ ដោយមានអ្នកសង្កេតការណ៍ចំនួន ៥៨៤១០នាក់ ដើម្បីសុំចូលរួមឃ្លាំមើលដំណើរការនៃការបោះឆ្នោត។ លោក បន្ថែមថា គណបក្សនយោបាយទាំង១២ នៅមានអ្នកសង្កេតការណ៍បម្រុងជាង ៤ម៉ឺនាក់ផ្សេងទៀត។
សេចក្តីប្រកាសព័ត៌មានរបស់គ.ជ.ប កន្លងមក បានឲ្យដឹងថា គណបក្សប្រជាជនកម្ពុជា មានអ្នកសង្កេតការណ៍ជាង ៤ម៉ឺននាក់ (បម្រុងជាង២ម៉ឺននាក់) ហើយគណបក្សសង្គ្រោះជាតិ ក៏មានអ្នកសង្កេតការណ៍ជាង ៤ម៉ឺននាក់ (បម្រុងជាង២ម៉ឺននាក់) ដែរ។ ផ្អែកលើតួលេខនៅក្នុងសេចក្តីប្រកាសព័ត៌មានរបស់គ.ជ.ប ក្នុងចំណោមគណបក្សនយោបាយទាំង១២ មានតែគណបក្សប្រជាជនកម្ពុជា និងគណបក្សសង្គ្រោះជាតិប៉ុណ្ណោះ ដែលបានត្រៀមអ្នកសង្កេតការណ៍ច្រើនជាងគេ និងមានលទ្ធភាព ដើម្បីដាក់ពង្រាយអ្នកសង្កេតការណ៍ នៅគ្រប់ការិយាល័យបោះឆ្នោត នៅទូទាំងប្រទេសកម្ពុជា។
គណបក្សទាំង១២ខាងលើ គឺ គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សសំបុកឃ្មុំសង្គមប្រជាធិបតេយ្យ គណបក្សខ្មែររួបរួមជាតិ គណបក្សអំណាចខ្មែរ គណបក្សយុវជនកម្ពុជា គណបក្សប្រជាធិបតេយ្យមូលដ្ឋាន គណបក្សសញ្ជាតិកម្ពុជា គណបក្សសាធារណរដ្ឋប្រជាធិបតេយ្យ និងគណបក្សជនជាតិដើមប្រជាធិបតេយ្យកម្ពុជា៕
Tag:
បោះឆ្នោត
គជប
អ្នកសង្កេការណ៍)
© រក្សាសិទ្ធិដោយ thmeythmey.com