អន្តរជាតិ
នាវាដឹកយន្តហោះ Carl Vinson នឹងចាកចេញពីឧបទ្វីបកូរ៉េ ក្រោយប្រតិបត្តិការត្រូវបានបញ្ចប់
× កងទ័ពជើងទឹកកូរ៉េខាងត្បូងនិយាយថា នាវាដឹកយន្តហោះរបស់អាមេរិក USS Carl Vinson នឹងចាកចេញពីកូរ៉េខាងត្បូង បន្ទាប់ពីបញ្ចប់ប្រតិបត្តិការរបស់ខ្លួន។ ជាងមួយខែក្នុងការចូលចតនៅឧបទ្វីបកូរ៉េ នាវាដឹកយន្តហោះដ៏មានអានុភាពមួយនេះ បានចូលរួមក្នុងសមយុទ្ធជាមួយយោធាជើងទឹកកូរ៉េខាងត្បូង និងជប៉ុន ក៏ដូចជាបានសម្ញែងឫទ្ធិកម្លាកូរ៉េខាងជើងរួចមក។ វត្តមាននាវានេះ និងនាវាចម្បាំងមួយចំនួនទៀត ក៏ធ្វើឲ្យកូរ៉េខាងជើងខឹងសម្បារយ៉ាងខ្លាំង។
នាវាជើងកងទ័ពទឹកអាមេរិកមួយកង ដែលដឹកនាំដោយនាវាដឹកយន្តហោះ USS Carl Vinson បានបញ្ចប់ប្រតិបត្តិការរយៈពេលយូររបស់ខ្លួននៅដែនទឹកឧបទ្វីបកូរ៉េហើយនៅថ្ងៃទី៣១ ខែឧសភា។ នាវាដឹកយន្តហោះ USS Carl Vinson ដែលអមដំណើរដោយនាវាចម្បាំងស៊េរីទំនើបៗជាច្រើនគ្រឿងទៀត នឹងធ្វើដំណើរចេញពីកូរ៉េខាងត្បូងផងដែរ ដោយមិនបន្តបេសកកម្មទៀតឡើយ។ នេះបើតាមការប្រកាសរបស់កងទ័ពកូរ៉េខាងត្បូង ដែលផ្សាយដោយទីភ្នាក់ងារព័ត៌មាន Yonhap ។
USS Carl Vinson ជានាវាដើរដោយថាមពលនុយក្លេអ៊ែរ និងមានមូលដ្ឋាននៅ San Diego ។ នាវាដឹកយន្តហោះនេះ ព្រមទាំងនាវាអមដំណើរជាច្រើនគ្រឿងរួមមាននាវាពិឃាត និងនាវាល្បាតផងនោះ បានទៅដល់សមុទ្រខាងកើតកាលពីចុងខែមេសាកន្លងទៅ ចំពេលស្ថានការណ៍នៅឧបទ្វីបកូរ៉េតានតឹងខ្លាំង ព្រោះកូរ៉េខាងជើងចង់សាកល្បងនុយក្លេអ៊ែរលើកទី៦ ។ គេជឿថា វត្តមាននាវាមួយក្រុមនេះ មានគោលដៅកំញើញកូរ៉េខាងជើងតែម្ដង។
បេសកកម្មរបស់នាវាដឹកនយន្តហោះ USS Carl Vinson ត្រូវបានបញ្ចប់ ស្របពេលដែលនាវាដឹកយន្តហោះមួយគ្រឿងរបស់ទ័ពជើងទឹកអាមេរិក ទទួលបានការថែទាំរួចរាល់។ នាវាដឹកយន្តហោះ USS Ronald Reagan ដែលមានមូលដ្ឋាននៅជប៉ុន បានបញ្ចប់ការថែទាំហើយ និងអាចចូលមកបម្រើការបានធម្មតាវិញ។ នាវាដឹកយន្តហោះ Ronald Reagan ត្រូវបានជួសជុលនៅឯមូលដ្ឋានទ័ពអាមេរិកនៅជប៉ុនអស់ពេលជាច្រើនខែមកហើយ។
តាមពិតទៅ ការបង្ហាញខ្លួនរបស់នាវាដឹកយន្តហោះ USS Carl Vinson នៅកៀកឧបទ្វីបកូរ៉េ ធ្វើឡើងដើម្បីជំនួសកន្លែងនាវាដឹកយន្តហោះ USS Ronald Reagan ដែលត្រូវចូលរោងជាង។ នេះ ក៏ជាវិធីសាស្ត្ររបស់អាមេរិកក្នុងការពង្រាយនាវារបស់ខ្លួន ដើម្បីទប់ទល់ការគំរាមកំហែងណាមួយមកលើខ្លួន ឬក៏សម្ព័ន្ធមិត្តរបស់ខ្លួនដែរ។ អាមេរិកត្រូវបានគេជឿថា មាននាវាជើងទឹកដល់ទៅ ១០គ្រឿង ដែលកំពុងប្រតិបត្តិការបច្ចុប្បន្ន និងត្រូវបានពង្រាយតាមទីតាំងយុទ្ធសាស្ត្រជុំវិញពិភពលោក។
ការបញ្ជូននាវាដឹកយន្តហោះមកកៀកឧបទ្វីបកូរ៉េ ធ្វើឲ្យមានការបារម្ភថា រដ្ឋបាលប្រធានាធិបតី ដូណាល់ ត្រាំ អាចប្រើកម្លាំងបាយដើម្បីបង្ខំឲ្យកូរ៉េខាងជើងបញ្ឈប់មហិច្ឆតានុយក្លេអ៊ែររបស់ខ្លួន។ ប៉ុន្តែកូរ៉េខាងជើងហាក់មិនបានញញើតនឹងវត្តមានអាវុធទំនើបៗរបស់អាមេរិកឡើយ ហើយថែមទាំងគំរាមបាញ់ពន្លិចនាវាដឹកយន្តហោះអាមេរិកទៀតផង។ លើសពីនោះ កូរ៉េខាងជើងក៏ចោទអាមេរិកថាកំពុងរៀបចំធ្វើសង្គ្រាមជាមួយខ្លួនទៅទៀត៕
Tag:
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com