អន្តរជាតិ
ប្រធានាធិបតីកូរ៉េខាងត្បូង ប្រកាសដោះស្រាយវិបត្តិនុយក្លែអ៊ែរកូរ៉េខាងជើងដោយមិនពឹងបរទេស
× ប្រធានាធិបតីកូរ៉េខាងត្បូង មូន ចេអ៊ីន បានប្រកាសថា រដ្ឋាភិបាលថ្មីរបស់លោកនឹងផ្ដួចផ្ដើមគំនិតជាសកលដើម្បីដោះស្រាយវិបត្តិនុយក្លេអ៊ែរកូរ៉េខាងជើង ដោយមិនចាំបាច់ឲ្យប្រទេសផ្សេងចូលជួយអ្វីឡើយ។ លោក មូន ចេអ៊ីន ក៏ប្រកាសដែរថា កូរ៉េខាងត្បូងនឹងប្រើធម៌ក្ដៅផង ធម៌ត្រជាក់ផង ដើម្បីអូសទាញកូរ៉េខាងជើងឲ្យចូលតុចរចាឡើងវិញ។ ប៉ុន្តែនេះមិនមែនមានន័យថា កូរ៉េខាងត្បូងឈប់ត្រូវការប្រទេសផ្សេងក្នុងការដោះស្រាយវិបត្តិនេះឡើយ តែកូរ៉េខាងត្បូងនឹងដឹកនាំការងារនេះខ្លួនឯង។
តាំងពីដើមមកនោះ អាមេរិក និងចិន ជាអ្នកដឹកនាំចាត់ចែងបញ្ហានុយក្លេអ៊ែររបស់កូរ៉េខាងជើង ខណៈប្រទេសពាក់ព័ន្ធផ្សេងទៀតមិនសូវចូលរួមដោយផ្ទាល់ឡើយ សូម្បីតែជប៉ុន ឬកូរ៉េខាងត្បូងផ្ទាល់ក៏ត្រូវធ្វើតាមការសម្រេចរបស់អាមេរិកដែរ។ យ៉ាងណាមិញ ក្រោមរដ្ឋបាលថ្មីរបស់លោក មូន ចេអ៊ីន កូរ៉េខាងត្បូង នឹងដឹកនាំការងាររកដំណោះស្រាយសម្រាប់វិបត្តិសាំញាំនេះ ដោយមិនត្រូវការតួនាទីរបស់បរទេសឡើយ។
តាមរយៈសារជាវីដេអូផ្ញើទៅកាន់វេទិកាអន្តរជាតិ Jeju នៅថ្ងៃទី១ ខែឧសភា លោក មូន ចេអ៊ីន និយាយថា កូរ៉េខាងត្បូង នឹងដឹកនាំការដោះស្រាយវិបត្តិឧបទ្វីបកូរ៉េដោយខ្លួន និងមិនពឹងពាក់ប្រទេសណាឡើយ។ លោកបន្តថា កូរ៉េខាងត្បូង ដាក់ចេញគំនិតផ្ដួចផ្ដើមថ្មីស្រឡាង និងអនុវត្តគំនិតផ្ដួចផ្ដើមនេះឲ្យបានម៉ត់ចត់ដើម្បីរក្សាសន្តិភាព និងវិបុលភាពយូរអង្វែងនៅឧបទ្វីបកូរ៉េ ហើយលោកនឹងបញ្ចុះបញ្ចូលផង ក៏ដូចជាដាក់សម្ពាធផង សំដៅបង្ខំឲ្យកូរ៉េខាងជើងបោះបង់កម្មវិធីនុយក្លេអ៊ែររបស់ខ្លួន។
យ៉ាងណាក្ដី ទីភ្នាក់ងារព័ត៌មាន Yonhap ផ្សាយថា បើទោះជាចង់ដឹកនាំការស្វែងរកដំណោះស្រាយខ្លួនឯងក្ដី ក៏លោក មូន ចេអ៊ីន បោះបង់កិច្ចសហប្រតិបត្តិការជាមួយសហគមន៍អន្តរជាតិដែរ។ ប្រធានាធិបតីរូបនេះបញ្ជាក់ក្នុងសារវីដេអូដដែលថា កូរ៉េខាងត្បូង នឹងធ្វើការជាមួយប្រទេសផ្សេងដូចជាចិន និងអាមេរិក ដើម្បីអូសទាញកូរ៉េខាងជើងឲ្យជ្រើរើសផ្លូវចរចា ក៏ដូចជារកច្រកចេញសម្រាប់វិបត្តិមួយនេះដែរ។
ជាងនេះទៅទៀត ប្រធានាធិបតីទើបកាន់តំណែង មានបំណងចង់ពង្រឹងទំនាក់ទំនងអន្តរកូរ៉េ ដែលត្រូវកាត់ផ្ដាច់នាពេលកន្លង ក៏ដូចជាទំនាក់ទំនងអាមេរិក និងកូរ៉េខាងជើង ដែលធ្លាប់ជាអតីតសត្រូវស៊ីសាច់ក្នុងសម័យសង្គ្រាម។ យ៉ាងណាមិញ លោក មូន ចេអ៊ីន ក៏សង្កត់ធ្ងនដែរថា បើកូរ៉េខាងជើងហ៊ានបង្ករឿងដោយប្រើប្រាស់អាវុធ កូរ៉េខាងត្បូងនឹងឆ្លើយតបវិញយ៉ាងឆាប់រហ័សមិនខាន ក្រោមកិច្ចសហប្រតិបត្តិការរវាងអាមេរិក និងកូរ៉េខាងត្បូងផ្ទាល់។
ដោយសារតែកូរ៉េខាងជើងផ្គើនអន្តរជាតិម្ដងហើយម្ដងទៀត ចិន និងអាមេរិក កំពុងពិភាក្សាដាក់ទណ្ឌកម្មបន្ថែមទៀតលើរដ្ឋកុម្មុយនីស្តឯកោមួយនេះ។ រយៈពេលកន្លងមក បើក្រុងប៉េកាំង និងក្រុងវ៉ាស៊ីនតោនយល់ព្រមលើចំណាត់ការណាមួយហើយនោះ ប្រទេសផ្សេងចាំតែអនុវត្តតាមប៉ុណ្ណោះ។ ចុងក្រោយនេះ គេសង្កេតឃើញអាមេរិក និងចិនត្រូវរ៉ូវគ្នាច្រើនលើវិបត្តិឧបទ្វីបកូរ៉េ ខណៈដែលកូរ៉េខាងជើងនៅតែបាញ់មីស៊ីលជារឿយដដែល៕
Tag:
កូរ៉េខាងត្បូង
មូន ចេអ៊ីន
កូរ៉េខាងជើង
© រក្សាសិទ្ធិដោយ thmeythmey.com