ដូណាល់ ត្រាំ នឹងស្វាគមន៍ប្រធានាធិបតីកូរ៉េខាងត្បូងឲ្យពេញមុខពេញមាត់

អន្តរជាតិ

ដូណាល់ ត្រាំ នឹងស្វាគមន៍ប្រធានាធិបតីកូរ៉េខាងត្បូងឲ្យពេញមុខពេញមាត់

02, Jun 2017 , 9:39 pm

រូបភាព

ដោយ: តន ចាន់រិទ្ធារ៉ា

ទៅទស្សនកិច្ចលើកទីមួយនៅអាមេរិក ប្រធានាធិបតីកូរ៉េខាងត្បូង មូន ចេអ៊ីន (Moon Jae-in) នឹងទទួលបានការស្វាគមន៍ដោយក្ដីគោរពជាអតិបរមាពីសំណាក់អាមេរិក ដែលជាម្ចាស់ផ្ទះ និងជាសម្ព័ន្ធមិត្តយូរឆ្នាំ។ ទស្សនកិច្ចប្រធានាធិបតីកូរ៉េខាងត្បូងនៅអាមេរិក ធ្វើឡើងដោយមានការអញ្ជើញពីសំណាក់សមភាគី ដូណាល់ ត្រាំ ដើម្បីពង្រឹងទំនាក់ទំនងទ្វេភាគី វិបត្តិនុយក្លេអ៊ែរកូរ៉េខាងជើង និងបញ្ហាមួយចំនួនទៀត។

ប្រធានាធិបតីកូរ៉េខាងត្បូង មូន ចេអ៊ីន នឹងធ្វើដំណើរទៅជួបប្រធានាធិបតីអាមេរិក ដូណាល់ ត្រាំ នៅខែមិថុនានេះ ដែលជាជំនួបទល់មុខលើកដំបូងរវាងមេដឹកនាំសម្ព័ន្ធមិត្តធ្លាប់ប្រកៀកស្មាប្រយុទ្ធក្នុងសង្គ្រាមកូរ៉េ។ មន្ត្រីកូរ៉េខាងត្បូងម្នាក់និយាយថា ភាគីអាមេរិក នឹងទទួលដំណើរទស្សនកិច្ចរបស់លោក មូន ចេអ៊ីន ឲ្យបានពេញមុខពេញមាត់ ស័ក្ដិសមនឹងជាសម្ព័ន្ធមិត្ត រួមគ្នានឹងកម្មវិធីស្វាគមន៍ជាច្រើនដើម្បីចាំទទួលដូចគ្នា។

បើតាមទីភ្នាក់ងារព័ត៌មាន Yonhap មន្ត្រីកូរ៉េខាងត្បូងដដែលខាងលើបញ្ជាក់ថា ទីប្រឹក្សាសន្តិសុខជាតិអាមេរិក H.R. McMaster ជាអ្នកប្រាប់ពីការត្រៀមទទួលនេះ ទៅកាន់សមភាគីកូរ៉េខាងត្បូង Chung Eui-yong ដែលកំពុងស្ថិតនៅអាមេរិក ដើម្បីរៀបចំជំនួបរវាងលោក ត្រាំ និងលោក មូន ។ មន្ត្រីទទួលបន្ទុកសន្តិសុខជាតិទាំងពីរ កំពុងញាប់ដៃញាប់ជើងដើម្បីបញ្ចប់ការងាររៀបចំនេះរាប់ទាំងរបៀបវារៈកិច្ចប្រជុំ និងពេលវេលាជាក់លាក់។

សូមបញ្ជាក់ថា ប្រធានាធិបតីអាមេរិក ត្រាំ បានអញ្ជើញលោក មូន ទៅទស្សនកិច្ចនៅក្រុងវ៉ាស៊ីនតោន អំឡុងពេលការជជែកតាមទូរសព្ទក្នុងខែឧសភា ដែលពេលនោះ លោក ត្រាំ បានសាទរលោក មូន ក្នុងការឈ្នះឆ្នោតជាប្រធានាធិបតីកូរ៉េខាងត្បូង បន្តពីលោកស្រី ប៉ាក ហ្គឺនហេ ដែលអស់តំណែង។ ភាគីទាំងពីរ យល់ព្រមជួបគ្នានៅដំណាច់ខែមិថុនានេះ។ យ៉ាងណាក្ដី កាលបរិច្ឆេទជាក់លាក់ កំពុងត្រូវបានពិភាក្សានៅជំនួបរវាងទីប្រឹក្សាសន្តិសុខជាតិទាំងពីរនៅថ្ងៃទី១ ខែមិថុនា។

ប្រធានបទសំខាន់នៃជំនួបលើកដំបូងនេះ នឹងផ្ដោតសំខាន់លើការពង្រឹងសម្ព័ន្ធភាពកូរ៉េខាងត្បូង និងអាមេរិក ការទប់ស្កាត់កម្មវិធីនុយក្លេអ៊ែរកូរ៉េខាងជើង និងភាពជាដៃគូនៅកម្រិតពិភពលោក។ របៀបវារៈសំខាន់មួយទៀតនោះ គឺផែនការពង្រាយប្រព័ន្ធការពារមីស៊ីលអាកាស THAAD ដែលកំពុងចម្រូងចម្រាសខ្លាំង។ ខណៈដែលប្រជាជនកំពុងមិនពេញចិត្តនឹងវត្តមាន THAAD ស្រាប់ផងនោះ អាមេរិកបែរជាលួចនាំចូលឧបករណ៍បាញ់រ៉ុក្កែតចំនួនបួនគ្រឿងបន្ថែមទៀតដោយមិនប្រាប់នរណាឡើយ។

ទំនងអន់ចិត្តខ្លាំង លោក មូន ចេអ៊ីន ក៏ចេញបញ្ជាឲ្យមានការស៊ើបអង្កេតលើករណីនេះ ដើម្បីរកការពិត។ យ៉ាងណាមិញ វត្តមានលោក Chung Eui-yong មានគោលដៅដើម្បីបញ្ជាក់ប្រាប់អាមេរិកថា កូរ៉េខាងត្បូងមិនមានបំណងបោះបង់ប្រព័ន្ធការពារ THAAD ចំណែកការស៊ើបអង្កេតនេះ គ្រាន់តែជាដំណើរការក្នុងស្រុកធម្មតាប៉ុណ្ណោះ៕