អន្តរជាតិ
កូរ៉េខាងជើងអួតថា អាមេរិកមិនអាចបាញ់ស្ទាក់នុយក្លេអ៊ែររបស់ខ្លួនបានឡើយ
× កូរ៉េខាងជើង នៅថ្ងៃទី៣ ខែមិថុនា បានថ្កោលទោសការធ្វើតេស្តបាញ់ទម្លាក់មីស៊ីលអន្តរទ្វីបរបស់អាមេរិក។ អាមេរិកបានអះអាងថា ការបាញ់សាកល្បងនេះទទួលបានជោគជ័យ ហើយថា មីស៊ីលរបស់ខ្លួនមានសមត្ថភាពបាញ់ស្ទាក់មីស៊ីលរយៈចម្ងាយរបស់កូរ៉េខាងជើងបាន។ ដោយចាត់ទុកសកម្មភាពរបស់អាមេរិកជាទង្វើបង្ករឿង កូរ៉េខាងជើងក៏ឆ្លើយតបវិញថា ប្រព័ន្ធការពារមីស៊ីលរបស់អាមេរិកមិនអាចស្ទាក់ចាប់អាវុធនុយក្លេអ៊ែររបស់ខ្លួនបានឡើយ។
អ្នកនាំពាក្យកងកម្លាំងយុទ្ធសាស្ត្រនៃកងទ័ពកូរ៉េខាងជើង បាននិយាយថា ការសាកល្បងដោយបាញ់ស្ទាក់មីស៊ីលអន្តរទ្វីបរបស់អាមេរិកនៅថ្ងៃទី៣០ ខែឧសភា គឺជាទង្វើបង្កហេតុខាងយោធាដ៏ធ្ងន់ធ្ងរបំផុតរបស់អាមេរិក។ អ្នកនាំពាក្យដដែលបានប្រាប់សារព័ត៌មានរដ្ឋកូរ៉េខាងជើង KCNA ថា អាមេរិកកំពុងច្រឡំធំហើយ បើពួកគេគិតថាប្រព័ន្ធបាញ់ស្ទាក់មីស៊ីលរបស់ពួកគេអាចការពារអាមេរិកពីការវាយប្រហារដ៏ខ្លាំងក្លាដោយនុយក្លេអ៊ែររបស់កូរ៉េខាងជើង។
បើតាមទីភ្នាក់ងារព័ត៌មាន Yonhap មន្ត្រីកូរ៉េខាងជើងខាងលើបញ្ជាក់ទៀតថា សកម្មភាពដ៏ប្រថុយប្រថានរបស់អាមេរិក គឺជាសញ្ញាបង្ហាញពីដំណាក់កាលចុងក្រោយនៃការរៀបចំធ្វើសង្គ្រាមនុយក្លេអ៊ែរប្រឆាំងកូរ៉េខាងជើង។ មន្ត្រីរូបនេះបន្តថា ទង្វើឆ្កួតឡប់របៀបនេះ គឺបង្ហាញកាន់តែច្បាស់ពីភាពស្របច្បាប់របស់កូរ៉េខាងជើងក្នុងការអភិវឌ្ឍកម្មវិធីនុយក្លេអ៊ែរ ដើម្បីទុកការពារខ្លួនឯងពីការវាយប្រហារណាមួយធ្វើឡើងដោយអាមេរិក និងសម្ព័ន្ធមិត្តរបស់គេ។
ការលើកឡើងរបស់យោធាកូរ៉េខាងជើង ធ្វើឡើងក្រោយអាមេរិកសាកល្បងដោយជោគជ័យក្នុងការបាញ់ស្ទាក់មីស៊ីលអន្តរទ្វីប។ ការសាកល្បងថ្ងៃទី៣០ ខែឧសភា មីស៊ីលគម្រូមួយត្រូវបានបាញ់ចេញពីកោះ Marshall Islands ខណៈមីស៊ីលបាញ់ស្ទាក់មួយទៀតត្រូវបានបាញ់ចេញពីមូលដ្ឋានទ័ពអាកាស Vandenberg ក្នុងរដ្ឋកាលីហ្វ័រនីញ៉ា ដើម្បីបាញ់ស្កាត់មីស៊ីលគម្រូតែម្ដង។ ច្បាស់ណាស់ថា មីស៊ីលគម្រូនេះ គឺធ្វើត្រាប់តាមមីស៊ីលអន្តរទ្វីបរបស់កូរ៉េខាងជើង។
តាមពិតទៅ ការណ៍ដែលអាមេរិកសាកល្បងប្រព័ន្ធស្ទាក់មីស៊ីលនេះ គឺដើម្បីការពារការគំរាមកំហែងពីសំណាក់មីស៊ីលកូរ៉េខាងជើង ដែលគេជឿថាមានមីស៊ីលបាលីស្ទិកក្នុងឃ្លាំងហើយ។ កាលពីដើមឆ្នាំ២០១៧ មេដឹកនាំកូរ៉េខាងជើង គីម ជុងអ៊ុន បានប្រកាសតាមរយៈសារអបអរឆ្នាំថ្មីថា កូរ៉េខាងជើងបានមកដល់ដំណាក់កាលចុងក្រោយនៃការអភិវឌ្ឍមីស៊ីលបាលីស្ទិកអន្តរទ្វីបហើយ។ ការប្រកាសធ្វើឲ្យពិភពលោកទាំងមូលភ្ញាក់ផ្អើល និងព្រួយបារម្ភយ៉ាងខ្លាំង ជាពិសេសអាមេរិក និងសម្ព័ន្ធមិត្តរបស់ខ្លួន។
ជាញឹកញយ កូរ៉េខាងជើងបានគំរាមកម្ទេចទាំងអាមេរិក ទាំងសម្ព័ន្ធមិត្តមានកូរ៉េខាងត្បូង និងជប៉ុន ឲ្យក្លាយជាផេះផង់មិនខាន បើហ៊ានប៉ះពាល់អធិបតេយ្យរបស់ខ្លួន។ កូរ៉េខាងជើង ក៏មិនញញើតនឹងការគំរាមរបស់អាមេរិកតាមរយៈការបញ្ជូននាវាដឹកយន្តហោះមកកៀកឧបទ្វីបកូរ៉េដែរ ហើយថែមទាំងហ៊ាននិយាយថាត្រៀមខ្លួនធ្វើសង្គ្រាមរួចរាល់ទៀតផង។ ការគំរាមគ្នាទៅវិញទៅមកនេះ ធ្វើឲ្យស្ថានការណ៍ឧបទ្វីបកូរ៉េតានតឹងខ្លាំង ខណៈដំណោះស្រាយជាដុំកំភួននៅតែរកមិនទាន់នៅឡើយ៕
Tag:
កូរ៉េខាងជើង
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com