អន្តរជាតិ
លោក ត្រាំ ឆ្លៀតប្រើការវាយប្រហារនៅក្រុងឡុងដ៍ធ្វើលេសជំរុញបម្រាមធ្វើដំណើរ
× ប្រធានាធិបតីអាមេរិក ដូណាល់ ត្រាំ បានប្រើបណ្ដាញសង្គម Twitter របស់លោកដើម្បីផ្ដល់ជំនួយដល់អង់គ្លេស ដែលរងការវាយប្រហារដោយការបើកឡានបំបុក និងការចាក់សម្លាប់។ មនុស្សយ៉ាងតិច៦នាក់ បានបាត់បង់ជីវិត ខណៈជនសង្ស័យ៣នាក់ត្រូវបានប៉ូលិសបាញ់សម្លាប់ក្នុងហេតុការណ៍ដែលកើតនៅលើស្ពាន London និងនៅឯផ្សារ Borough ។ លោក ត្រាំ ក៏ឆ្លៀតប្រើប្រាស់ហេតុការណ៍ ធ្វើជាលេសដើម្បីស្នើឲ្យមានការអនុវត្តបម្រាមធ្វើដំណើររបស់លោកឡើងវិញដែរ។
ក្រោយមានហេតុការណ៍បើកឡានបំបុក និងការចាក់សម្លាប់នៅក្រុងឡុងដ៍ ប្រធានាធិបតី ដូណាល់ ត្រាំ បាននិយាយទូរសព្ទជាមួយនាយករដ្ឋមន្ត្រីអង់គ្លេស ថេរ៉េសា ម៉េយ៍ និងបានចូលរួមមរណទុក្ខជាមួយលោកស្រីចំពោះហេតុការណ៍នេះ។ ប្រធានាធិបតីអាមេរិក ក៏បានប្រកាសផ្ដល់ជំនួយគ្រប់យ៉ាងទៅឲ្យអង់គ្លេសក្នុងការស៊ើបអង្កេត និងតាមចាប់ខ្លួនជនដៃដល់ដើម្បីផ្ដន្ទាទោស។ នេះបើតាមការប្រកាសរបស់សេតវិមាន។
បន្ថែមពីលើនោះ លោកប្រធានាធិបតី ត្រាំ ក៏បានប្រកាសតាមបណ្ដាញសង្គម Twitter របស់លោកដែរថា អាមេរិក នឹងជួយអង់គ្លេសតាមអ្វីដែលខ្លួនអាចធ្វើបាន ហើយអាមេរិកនឹងនៅទីនោះ និងនៅជាមួយអង់គ្លេសរហូត។
ជាមួយគ្នានោះ ប្រធានាធិបតីអាមេរិក ក៏ឆ្លៀតកេងចំណេញលើស្ថានការណ៍វឹកវរនៅក្រុងឡុងដ៍ ដោយបានអំពាវនាវឲ្យមានការអនុវត្តការហាមប្រាមការធ្វើដំណើររបស់លោកឡើងវិញដែរ ដ្បិតតុលាការអាមេរិកបានសម្រេចព្យួរសេចក្ដីសម្រេចចិត្តរបស់លោក។ នៅលើគណនី Twitter របស់ខ្លួន លោក ត្រាំ បញ្ជាក់ថា៖ «យើងត្រូវតែឆ្លាត, ប្រយ័ត្នប្រយែង និងម៉ឺងម៉ាត់។ យើងចង់ឲ្យតុលាការប្រគល់សិទ្ធិមកយើងវិញ។ យើងត្រូវការបម្រាមធ្វើដំណើរដើម្បីរក្សាសុវត្ថិភាព»។
ការទាមទាររបស់ប្រធានាធិបតី ត្រាំ នៅពេលនេះ ធ្វើឡើងក្រោយលោកបានស្នើឲ្យតុលាការកំពូលសម្រេចចិត្តអនុវត្តតាមបញ្ជាប្រតិបត្តិដែលហាមឃាត់ការធ្វើដំណើរមកកាន់អាមេរិកពីសំណាក់ប្រជាជនមកពីប្រទេសឥស្លាមភាគច្រើនចំនួន៦ ។ បញ្ជាប្រតិបត្តិរបស់លោក ត្រាំ រងការរិះគន់ខ្លាំងពីសំណាក់សហគមន៍អន្តរជាតិ និងការចោទប្រកាន់ថាមានលក្ខណៈរើសអើង ក៏ដូចជាបំពានសិទ្ធិមនុស្សយ៉ាងធ្ងន់ធ្ងរ៕
Tag:
អាមេរិក
ដូណាល់ ត្រាំ
អង់គ្លេស
© រក្សាសិទ្ធិដោយ thmeythmey.com