ជាតិ
ក្រៅផ្លូវការ៖ បក្សសំបុកឃ្មុំ មិនបានកៅអីមេឃុំ ចៅសង្កាត់ តែលោក ម៉ម សូណង់ដូ អស់ចិត្ត
× លោក ម៉ម សូណង់ដូ ឲ្យដឹងក្រៅផ្លូវការថា គណបក្សលោកមិនទទួលបានអាសនៈមេឃុំ ចៅសង្កាត់ នោះទេ នៅក្នុងការបោះឆ្នោតជ្រើសរើសក្រុមប្រឹក្សឃុំ សង្កាត់អាណត្តិទី ៤។ លោក សូណង់ដូ ក៏មិនទាន់ដឹងថា គណបក្សលោកបានទទួលកៅអីក្រុមប្រឹក្សាឃុំ សង្កាត់ ឬមិនបាននោះដែរ។
ថ្វីដ្បិតតែ គណបក្សសំបុកឃ្មុំសង្គមប្រជាធិបតេយ្យ មិនទទួលជ័យជម្នះអាសនៈមេឃុំ ចៅសង្កាត់ ក្តី ក៏លោក ម៉ម សូណង់ដូ ប្រធានគណបក្សនេះ នៅតែនិយាយថា រូបលោកទទួលយកលទ្ធផល និងពេញចិត្តនឹងអ្វីដែលខ្លួនបានខំប្រឹងកន្លងមក។ « យើងបានធ្វើវា ដើម្បីប្រជាពលរដ្ឋខ្មែរហើយ តែធ្វើម្តេច បើគាត់នៅតែមិនបោះឲ្យ ព្រោះនេះជាឆន្ទៈរបស់ប្រជាពលរដ្ឋ»។ នេះជាការបញ្ជាក់របស់លោក សូណង់ដូ ប្រាប់សារព័ត៌មានថ្មីៗ នៅថ្ងៃទី ៥ ខែមិថុនា។
ប្រធានគណបក្សសំបុកឃ្មុំសង្គមប្រជាធិបតេយ្យរូបនេះ ដឹងថា មូលហេតុដែលគណបក្សលោកមិនបានជាប់អាសនៈមេឃុំ និងចៅសង្កាត់ ដោយសារតែពលរដ្ឋបោះឆ្នោតឲ្យគណបក្សសង្គ្រោះជាតិ។ លោកពន្យល់បន្ថែមយ៉ាងនេះថា៖ « ប្រជាពលរដ្ឋ ស្រឡាញ់សង្គ្រោះជាតិ ជាងគណបក្សខ្ញុំ នៅពេលដែលនិយាយពីគណបក្សប្រឆាំងនៅកម្ពុជា។ តែគណបក្សខ្ញុំក៏បានសំឡេង គាំទ្រពីប្រជាពលរដ្ឋមិនតិចនោះដែរ។ ខ្ញុំមើលទៅសង្គ្រោះជាតិមានប្រជាប្រិយភាពជាងបក្សខ្ញុំមែន តែបក្សនេះ គ្រាន់តែប៊ិះឈ្នះ តែមិនឈ្នះបក្សប្រជាជនកម្ពុជាទេ ទោះបីបោះឆ្នោតនៅឆ្នាំ ២០១៨ ក៏ដោយ»។
លោក ម៉ម សូណង់ដូ ក៏បង្ហាញជំហរបើកផ្លូវក្នុងការរួបរួមគ្នាជាមួយគណបក្សសង្គ្រោះជាតិដែរ។ លោក លើកឡើងដូច្នេះថា៖« ខ្ញុំជាអ្នកប្រជាធិបតេយ្យ។ ខ្ញុំនៅតែចង់រួបរួមជាមួយគណបក្សសង្គ្រោះជាតិ បើធ្វើក្នុងគោលដៅដើម្បីបម្រើ និងការពារប្រយោជន៍ប្រជាពលរដ្ឋពិតប្រាកដ ព្រមទាំងមានលក្ខខណ្ឌច្បាស់លាស់។ តែខ្ញុំមិនរួបរួម ដោយគ្រាន់តែដើម្បីបម្រើបុគ្គល ឬក្រុមណាមួយទេ»។
គណបក្សសំបុកឃ្មុំសង្គមប្រជាធិបតេយ្យ បានដាក់បេក្ខជនឈរឈ្មោះសម្រាប់បោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៤ លើកដំបូង ចំនួន ២៥០ ។ ខេត្តដែលគណបក្សនេះ ដាក់បេក្ខជនឈរឈ្មោះច្រើនជាងគេ គឺនៅខេត្តព្រៃវែង និងខេត្តកំពង់ចាម៕
Tag:
ម៉ម សូណង់ដូ
បោះឆ្នោតឃុំ សង្កាត់
© រក្សាសិទ្ធិដោយ thmeythmey.com