អន្តរជាតិ
ជម្លោះសមុទ្រចិនខាងត្បូង៖ ចិនថា អាមេរិកកំពុងដុតកម្ដៅបញ្ហា ខណៈរដ្ឋពាក់ព័ន្ធត្រូវរ៉ូវគ្នាហើយ
× ក្រុងប៉េកាំង បានបង្ហាញការមិនពេញចិត្តនឹងការលើកឡើងរបស់រដ្ឋមន្ត្រីការពារជាតិអាមេរិក ជេមស៍ ម៉ាធីស (James Mattis) លើបញ្ហានៅសមុទ្រចិនខាងត្បូង។ ចិនចាត់ទុកសម្ដីលោក ម៉ាធីស ដែលថាចិនកំពុងរំលោភច្បាប់អន្តរជាតិ និងមិនគោរពផលប្រយោជន៍ប្រទេសផ្សេង គឺជាសម្ដីមិនមានការទទួលខុសត្រូវ ដែលដុតបញ្ឆេះស្ថានការណ៍កំពុងស្ងប់ស្ងៀមនៅសមុទ្រចិនខាងត្បូង។ ចិនអះអាងថា អ្វីដែលខ្លួនកំពុងធ្វើនៅសមុទ្រចិនខាងត្បូង គឺដើម្បីប្រជាជននៅទីនោះ និងធ្វើតាមទំនួលខុសត្រូវប៉ុណ្ណោះ។
បើទោះជាកំពុងចាប់ដៃគ្នាដោះស្រាយបញ្ហានុយក្លេអ៊ែរកូរ៉េខាងជើងក្ដី អាមេរិកនៅតែប្រកាន់ជំហរតឹងតែងដាក់ចិនលើបញ្ហានៅសមុទ្រចិនខាងត្បូងដដែល។ ពីបុរីរដ្ឋសិង្ហបុរី ប្រមុខការពារជាតិអាមេរិក ជេមស៍ ម៉ាធីស បានរិះគន់ចិនយ៉ាងខ្លាំងជុំវិញសកម្មភាពនៅសមុទ្រចិនខាងត្បូងដូចជាការធ្វើយោធូបនីយកម្ម និងការកសាងកោះសិប្បនិម្មិតជាដើម។ ប៉ុន្តែក្រុងប៉េកាំងបានឆ្លើយតបក្រុងវ៉ាស៊ីនតោនវិញយ៉ាងចាស់ដៃ និងបានចោទថាវ៉ាស៊ីនតោនកំពុងធ្វើឲ្យភាពតានតឹងឡើងកម្ដៅទៀតផង។
ក្នុងសេចក្ដីប្រកាសព័ត៌មានថ្ងៃទី៤ ខែមិថុនា អ្នកនាំពាក្យក្រសួងការបរទេសចិន Hua Chunying បាននិយាយ ចិនមិនពេញចិត្តទាល់តែសោះនឹងការអធិប្បាយរបស់រដ្ឋមន្ត្រីការពារជាតិអាមេរិក។ លោកស្រីបន្តថា ការសាងសង់សំណង់ផ្សេងៗនៅលើប្រជុំកោះ Spratly ក្នុងសមុទ្រចិនខាងត្បូង មានគោលដៅពង្រឹងការរស់នៅរបស់ប្រជាជន, ការពារអធិបតេយ្យចិន និងអនុវត្តតាមទំនួលខុសត្រូវជាអន្តរជាតិរបស់ចិនប៉ុណ្ណោះ។
ដោយចង់សំដៅលើវត្តមាននាវាអាមេរិកនៅសមុទ្រចិនខាងត្បូងនាពេលថ្មីៗនេះ អ្នកនាំពាក្យដដែលនេះ ក៏បញ្ជាក់ម្ដងទៀតពីជំហររបស់ចិនដែលជំទាស់ដាច់ខាតការសម្ញែងសាច់ដុំយោធា ហើយដែលបានគំរាមកំហែងអធិបតេយ្យរបស់ចិនទៀតផង។ បើតាមសេចក្ដីប្រកាសព័ត៌មានខាងលើ ចិននៅតែអះអាងថា ខ្លួនមានសិទ្ធិស្របច្បាប់ក្នុងពង្រាយសម្ភារយោធាចាំបាច់នៅតាមកោះនានាដែលជាទឹកដីរបស់ខ្លួននៅសមុទ្រចិនខាងត្បូង។
មិនតែប៉ុណ្ណោះ អ្នកនាំពាក្យក្រសួងការបរទេសចិន ក៏បានចាត់ទុកការអធិប្បាយរបស់ប្រមុខការពារជាតិអាមេរិកជាការដុតបញ្ឆេះកម្ដៅទៀតផង។ លោកស្រី Hua និយាយថា ប្រទេសនៅជុំវិញសមុទ្រចិនខាងត្បូងបានព្យាយាមបន្ថយកម្ដៅតានតឹង ប៉ុន្តែប្រទេសក្រៅតំបន់វិញ បែរជាដើរបញ្ច្រាសផ្លូវគេឯង និយាយស្ដីគ្មានការទទួលខុសត្រូវ មិនទទួលស្គាល់ការពិត ហើយកំពុងតែច្រឡំសជាខ្មៅជាមួយបំណងមិនល្អរបស់ខ្លួន។
តាំងពីដើមមកនោះ ចិន តែងទទូចឲ្យរដ្ឋក្រៅជម្លោះនៅសមុទ្រចិនខាងត្បូង និយាយឲ្យចំអាមេរិកតែម្ដង ត្រូវរក្សាជំហរត្រឹមត្រូវ គោរពការសម្រេចចិត្តរបស់ភាគីពាក់ព័ន្ធក្នុងជម្លោះ។ ចិន និងសមាជិកអាស៊ានបួនប្រទេសទៀតដូចជាម៉ាឡេស៊ី ហ្វីលីពីន វៀតណាម និងព្រុយណេ កំពុងចរចាគ្នាតាមយន្តការរបស់អាស៊ានដូចជាក្រមប្រតិបត្តិសមុទ្រចិនខាងត្បូង ដើម្បីដោះស្រាយជម្លោះនេះ។ ចិន ទាមទារស្ទើរទាំងស្រុងនៃផ្ទៃសមុទ្រចិនខាងត្បូងទាំងមូល៕
Tag:
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com