អន្តរជាតិ
អាកាសចរណ៍ធំៗ កំពុងរងគ្រោះដោយសារជម្លោះការទូតនៅតំបន់ឈូងសមុទ្រពែរ្ស រូបភាពហ្វេសប៊ុក Qatar Airways
× ជម្លោះការទូតក្នុងចំណោមរដ្ឋនៅតំបន់ជាប់ឈូងសមុទ្រពែរ្ស កំពុងផ្ទុះឡើងខ្លាំង ដោយប្រទេសជាច្រើននាំគ្នាកាត់ផ្ដាច់ទំនាក់ទំនងការទូតជាមួយរដ្ឋកាតា។ អេហ្ស៊ីប បារ៉ែន អារ៉ាប់រួមអេមីរ៉ាត អារ៉ាប៊ីសាអូឌីត និងយេម៉ែនជាដើម បានផ្ដាច់ចំណងការទូតជាមួយកាតា ដោយចោទប្រកាន់ថាបានគាំទ្រក្រុមភេរវកម្មនិយម។ មិនត្រឹមតែកោះហៅមន្ត្រីទូតត្រឡប់ចូលស្រុកវិញទេ ប្រទេសទាំងនេះក៏បានផ្ដាច់ការធ្វើដំណើរតាមគ្រប់មធ្យោបាយទៀតផង ជាពិសេសផ្លូវអាកាសតែម្ដង។
ក្រុមហ៊ុនអាកាសចរណ៍ធំៗនៅតំបន់ឈូងសមុទ្រពែរ្ស កំពុងរងផលប៉ះពាល់ដោយសារតែជម្លោះការទូតរវាងរដ្ឋឈូងសមុទ្រភាគច្រើន ជាមួយនិងរដ្ឋកាតា។ អ្នកដំណើរតាមយន្តហោះជាច្រើន បានជាប់គាំងនៅព្រលានយន្តហោះ ព្រោះក្រុមហ៊ុនអាកាសចរណ៍ធំៗដូចជា Qatar Airways, Etihad Airways និង Emirates បានលុបចោលការធ្វើដំណើរដំណរទៅមកក្នងចំណោមប្រទេសដែលកំពុងមានជម្លោះពេលនេះ។
ក្រុមហ៊ុនអាកាសចរណ៍ Qatar Airways ដែលមានមូលដ្ឋាននៅទីក្រុងដូហា បានសរសេរលើគេហទំព័ររបស់ខ្លួនថា ការធ្វើដំណើរទៅកាន់ទិសដៅនៅអារ៉ាប៊ីសាអូឌីត ត្រូវបានបញ្ឈប់ទាំងស្រុងនៅថ្ងៃទី៥ ខែមិថុនា។ នៅមុនមានជម្លោះការទូតនេះ អាកាសចរណ៍ Qatar Airways មានសេវាកម្មវដឹកជញ្ជូនអ្នកដំណើរទៅកាន់ទីក្រុងអារ៉ាប៊ីសាអូឌីតចំនួន៩ ហើយគេមិនទាន់ដឹងថាការព្យួរការធ្វើដំណើរនេះ នឹងធ្វើឡើងដល់ពេលណាដែរ។
យ៉ាងណាក្ដី អាកាសចរណ៍របស់រដ្ឋកាតាមួយនេះ មិនទាន់បញ្ជាក់ថាខ្លួននឹងបញ្ឈប់ការធ្វើដំណើរទៅកាន់ទិសដៅផ្សេងទៀតដូចជាទីក្រុងឌូបៃ, គែរ, និងអាប៊ូដាប៊ី។ បើតាមការផ្សាយរបស់សារព័ត៌មាន Al Jazeera ក្រុមហ៊ុនអាកាសចរណ៍ Emirates មានមូលដ្ឋាននៅឌូបៃ និងអាកាសចរណ៍ Ethihad Airways មានមូលដ្ឋាននៅក្រុងអាប៊ូដាប៊ី ក៏បានសម្រេចចិត្តបញ្ឈប់ការធ្វើដំណើរទៅមកគោលដៅនៅកាតាដែរ ដោយចាប់ផ្ដើមពីថ្ងៃទី៦ ខែមិថុនា។
មិនត្រឹមតែអាកាសចរណ៍ធំៗរបស់អារ៉ាប់រួម ក្រុមហ៊ុនអាកាសចរណ៍ Gulf Air របស់បារ៉ែន, Egypt Air របស់អេហ្ស៊ីប និង Saudi Arabian Airlines របស់អារ៉ាប៊ីសាអូឌីត ក៏បានបញ្ឈប់ការហោះហើរទៅមកគោលដៅនៅកាតាដែរ ហើយភាគច្រើនអនុវត្តចាប់ពីថ្ងៃទី៥ ខែមិថុនា។ លើសពីការបញ្ឈប់ការហោះហើរ ប្រទេសទាំងនោះ ក៏នឹងមិនអនុញ្ញាតឲ្យយន្តហោះទាំងអស់របស់កាតា ហោះចូលដែនអាកាសរបស់ពួកគេដែរ។
ជាមួយជម្លោះការទូតដែលឈានដល់ការផ្អាកចរាចរណ៍ផ្លូវអាកាសនេះ អ្នកធ្វើដំណើរជាច្រើនដែលជាប់គាំងនៅព្រលានយន្តហោះនៅរដ្ឋឈូងសមុទ្រ កំពុងបារម្ភខ្លាំង។ អាកាសចរណ៍ Qatar Airways, Etihad Airways និង Emirates សុទ្ធសឹងជាក្រុមហ៊ុនអ្នកដំណើររយៈចម្ងាយឆ្ងាយ ជាពិសេសដឹកទេសចរទៅកាន់មជ្ឈិមបូព៌ា និងបន្តដំណើរទៅកាន់អឺរ៉ុប។ ប៉ុន្តែក្រុមហ៊ុន Etihad Airways និង Emirates ក៏បានសម្រេចបង្វិលប្រាក់វិញ ឬក៏ជួយកក់ជើងយន្តហោះថ្មីវិញដែរ៕
Tag:
កាតា
អាកាសចរណ៍
មជ្ឈិមបូព៌ា
© រក្សាសិទ្ធិដោយ thmeythmey.com