អន្តរជាតិ
ចិន រិះគន់អាមេរិកដែលនិយាយលម្អៀងជុំវិញការសម្លាប់រង្គាលនៅទីលានធានអានមេន
× ក្រុងប៉េកាង បានរិះគន់ក្រុងវ៉ាស៊ីនតោន ដែលបានស្នើឲ្យមានការស៊ើបអង្កេតឲ្យពេញលេញការសម្លាប់រង្គាលបាតុករនិស្សិតនៅទីលានធានអានមេនកាលពីថ្ងៃទី៤ ខែមិថុនា ឆ្នាំ១៩៨៩ ។ រដ្ឋមន្ត្រីការបរទេសអាមេរិក រិច ធីល័រសិន (Rex Tillerson) ជាអ្នកស្នើដូចនេះនៅថ្ងៃរំឭកខួបទី២៨ ថ្ងៃបង្ក្រាបហ្វូងបាតុករដែលភាគច្រើនជានិស្សិតចង់បានការផ្លាស់ប្ដូររបបដឹកនាំ។ យ៉ាងណាក្ដី ចិន បានប្រាប់ឲ្យអាមេរិកបិទមាត់ រួចនៅឲ្យស្ងៀម ព្រោះរឿងរ៉ាវបង្ហូរឈាមបានបញ្ចប់យូរហើយ។
ទោះជាកន្លងផុត២៨ឆ្នាំក៏ដោយ រដ្ឋាភិបាលនិងបក្សកម្មុយនីស្តចិន មិនចង់លឺការលើកឡើងបញ្ហាសម្លាប់រង្គាលនៅទីលានធានអានមេនឡើយ។ រាល់ឆ្នាំគ្មានប្រជាជនណាអាចប្រារព្ធខួបរំឭក ឬកាន់ទុក្ខចំពោះអ្នកស្លាប់ជាសាធារណៈបានដែរ។ រដ្ឋាភិបាលចិន នៅតែធ្វើមិនដឹងមិនលឺ និងព្យាយាមធ្វើសព្វគ្រប់បែបយ៉ាងដើម្បីលុបបំបាត់ការយល់ឃើញថាចិនអនុវត្តគោលនយោបាយព្រៃផ្សៃប្រឆាំងប្រជាជនខ្លួន និងបំបាត់ចោលប្រវត្តិសាស្ត្រអាក្រក់នេះមិនឲ្យក្មេងជំនាន់ក្រោយដឹងលឺឡើយ។
ឲ្យតែដល់ថ្ងៃរំឭកខួបម្ដងៗ ក្រុមលោកខាងលិច ជាពិសេសអាមេរិកតែងចេញមកអំពាវនាវឲ្យមានការគាស់កកាយសំណុំរឿងនេះជាសាធារណៈ ក៏ដូចជាដោះលែងអ្នកតវ៉ា ឬអ្នករំឭកខួបសម្លាប់រង្គាលនេះឲ្យមានសេរីភាពឡើងវិញ។ រដ្ឋមន្ត្រីការបរទេសអាមេរិក រិច ធីល័រសិន នៅថ្ងៃទី៤ ខែមិថុនា បានប្រកាសជំហរអាមេរិកម្ដងទៀតក្នុងការស្នើឲ្យចិនបង្ហាញការទទួលខុសត្រូវចំពោះអ្នកដែលត្រូវចាប់ខ្លួន អ្នកត្រូវបានសម្លាប់ និងអ្នកដែលបាត់ខ្លួន។
យ៉ាងណាក្ដី ចិន បានទាត់ចោលសំណើរបស់ប្រមុខការទូតអាមេរិក និងបានរិះគន់វិញថាអាមេរិកនិយាយស្ដីលម្អៀងលើព្រឹត្តការណ៍សម្លាប់រង្គាលនេះ។ ក្នុងសេចក្ដីប្រកាសព័ត៌មានដែលផ្សាយដោយសារព័ត៌មានរដ្ឋ Xinhua នៅរាត្រីថ្ងៃទី៥ ខែមិថុនា ក្រសួងការបរទេសចិនបញ្ជាក់ច្បាស់ៗប្រាប់អាមេរិកវិញថា រដ្ឋាភិបាលចិនបានបញ្ចប់រួចរាល់អស់ហើយលើករណីបាតុកកម្មនយោបាយខែមិថុនា ឆ្នាំ១៩៨៩ នេះ។
សេចក្ដីប្រកាសព័ត៌មានរបស់ក្រសួងការបរទេសចិនបន្តថា អាមេរិកមិនខ្វល់ការពិត និងបានចោទប្រកាន់រដ្ឋាភិបាលចិនដោយគ្មានមូលដ្ឋានច្បាស់លាស់ម្ដងហើយម្ដងទៀត ព្រមទាំងលូកលាន់កិច្ចការផ្ទៃក្នុងរបស់ចិនទៀតផង។ បើតាមសេចក្ដីប្រកាសដដែលនេះ ចិន ក៏ប្រឆាំងដាច់ខាតចំពោះសកម្មភាពរបស់អាមេរិក ហើយចិនក៏បានបង្ហាញការតវ៉ាយ៉ាងមុតមាំរបស់ខ្លួន ដើម្បីឲ្យខាងអាមេរិកដឹងច្បាស់ផងដែរ។ ចិន ក៏ស្នើឲ្យអាមេរិកឈប់លម្អៀង កែតម្រូវកំហុសរបស់ខ្លួន ដើម្បីទំនាក់ទំនងទ្វេភាគី។
អ្វីគួរឲ្យចាប់អារម្មណ៍នោះ តាំងពីកើតរឿងដល់បច្ចុប្បន្នរដ្ឋាភិបាលក្រុងប៉េកាំងព្យាយាមកែប្រែស្ថានការណ៍ និងធ្វើយ៉ាងការពារកុំអោយមានការបាត់បង់ជំនឿចិត្តលើបក្សកុម្មុយនីស្ត។ រដ្ឋាភិបាលចិន ព្យាយាមធ្វើកំណែទម្រង់ កំចាត់អំពើពុករលួយគ្រប់ជាន់ថ្នាក់ រក្សាកំណើនសេដ្ឋកិច្ចដើម្បីធ្វើអោយជីវភាពរស់នៅរបស់ប្រជាជនកាន់តែល្អប្រសើរ ផ្តល់សេរីភាពឯកជន តែហាមដាច់ខាតរិះគន់គណបក្សកម្មុយនីស្តចិន៕
© រក្សាសិទ្ធិដោយ thmeythmey.com