អន្តរជាតិ
ពូទីន៖ បើរុស្ស៊ីនិងអាមេរិកវាយគ្នា គ្មាននរណានៅសល់ជីវិតឡើយ ប្រធានាធិបតីរុស្ស៊ី វ្ល៉ាឌីមៀ ពូទីន (រូបភាពគេហទំព័រប្រធានាធិបតីរុស្ស៊ី)
× ប្រធានាធិបតីរុស្ស៊ី វ្ល៉ាឌីមៀ ពូទីន បានព្រមានថា គ្មានប្រទេសណាមួយនៅលើពិភពលោក អាចរួចខ្លួនបានទេ បើរុស្ស៊ី និងអាមេរិក ដែលជាមហាអំណាចនុយក្លេអ៊ែរធំជាងគេទាំងពីរ ត្រូវធ្វើសង្គ្រាមជាមួយគ្នាមែននោះ។ ក្នុងកិច្ចសម្ភាសជាមួយផលិតករភាពយន្ត Oliver Stone លោក ពូទីន បានលើកឡើងពីការកសាងកម្លាំងទ័ពរបស់ណាតូ ដែលជាការគំរាមកំហែងមកលើសន្តិសុខរុស្ស៊ី ហើយដែលត្រូវឆ្លើយតបវិញដាច់ខាត។ ទំនងបែបនេះ ទើបលោក ពូទីន ព្រមានទុកមុនពីការប៉ះទង្គិចនៅពេលខាងមុខ។
នរណាក៏ដឹងដែរថា រុស្ស៊ី និងអាមេរិក គឺជាមហាអំណាចពិភពលោកពីរ ដែលមានគ្រាប់នុយក្លេអ៊ែរក្នុងឃ្លាំងច្រើនជាងគេ។ សង្គ្រាមរវាងមហាអំណាចទាំងពីរ ពិតជាមានវត្តមានអាវុធនុយក្លេអ៊ែរមិនខាន ហើយគ្រោះថ្នាក់ពិតជាមិនអាចស្មានដល់ឡើយ។ បើតាមប្រធានាធិបតីរុស្ស៊ី វ្ល៉ាឌីមៀ ពូទីន គ្មាននរណាម្នាក់អាចរស់រានមានជីវិតឡើយ បើរុស្ស៊ី និងអាមេរិក ដើរដល់ដំណាក់កាលប្រយុទ្ធគ្នាចៀសមិនផុតមែន ព្រោះនុយក្លេអ៊ែរនឹងត្រូវប្រមូលចេញពីឃ្លាំងមិនខាន។
ការលើកឡើងរបស់ប្រធានាធិបតីរុស្ស៊ីខាងលើនេះ គឺជាការឆ្លើយតបនឹងសំណួររបស់អ្នកផលិតភាពយន្តអាមេរិក Oliver Stone ដែលបានសួរលោកថា អាមេរិកនឹងក្លាយជាឈ្នះឬទេ បើមានសង្គ្រាមមែននោះ។ ផលិតករអាមេរិករូបនេះ ក៏បានសួរប្រធានាធិបតីរុស្ស៊ីពីលទ្ធភាពដែលរុស្ស៊ី និងអាមេរិកអាចកែខៃទំនាក់ទំនងដែលធ្លាក់ស្ទើរដល់បាតទៅហើយនោះ។ លោក ពូទីន ឆ្លើយវិញថា សង្ឃឹមនៅតែមាន ហើយមានរហូតដល់អាមេរិកយករុស្ស៊ីទៅកប់ក្នុងផ្នូរតែម្ដង។
សារព័ត៌មាន RT ផ្សាយនៅថ្ងៃទី៧ ខែមិថុនា ថា ក្នុងកិច្ចសម្ភាសដែលត្រូវផ្សាយទាំងស្រុងនៅសប្ដាហ៍ក្រោយ លោកប្រធានាធិបតី ពូទីន ក៏បាននិយាយដល់សម្ព័ន្ធយោធាណាតូ ដែលកំពុងពង្រឹងកម្លាំងនៅតាមព្រំដែនជាមួយរុស្ស៊ី។ ការបង្កើនកម្លាំងនេះហើយដែលជាប្រភពនៃការប៉ះទង្គិចនៅថ្ងៃអនាគតនោះព្រោះរុស្ស៊ីក៏មិននៅស្ងៀមដែរ ដោយបានពង្រាយកងទ័ព និងសព្វាវុធគ្រប់ប្រភេទរបស់ខ្លួន ទៅកាន់តំបន់ទល់មុខនឹងអឺរ៉ុបដែរ។
ដោយហៅសម្ព័ន្ធយោធាណាតូជាឧបករណ៍នយោបាយការបរទេសរបស់អាមេរិក លោក ពូទីន ក៏បានហៅសមាជិកសម្ព័ន្ធយោធានេះជាបរិវាររបស់អាមេរិកទៀតផង។ លោកពន្យល់ប្រាប់លោក Stone ថា នៅពេលក្លាយជាសមាជិកណាតូហើយ ពួកគេពិតជាមិនអាចជំទាស់គំនិតរបស់អាមេរិកបានដោយស្រួលឡើយ ហើយអាវុធគ្រប់ប្រភេទអាចត្រូវបានពង្រាយគ្រប់ពេលនៅតាមរដ្ឋសមាជិកទាំងនោះដូចជាប្រព័ន្ធការពារមីស៊ីល និងមូលដ្ឋានទ័ពថ្មីជាដើម។
ដោយរឿងនេះ ទើបរុស្ស៊ីត្រូវបង្ខំចិត្តចាត់វិធានការឆ្លើយតបវិញដើម្បីការពារខ្លួនឯង។ លោក ពូទីន ដែលកំពុងស្ថិតនៅចំកណ្ដាលរឿងអាស្រូវបោះឆ្នោតនៅអាមេរិកនោះ បញ្ជាក់ថា រុស្ស៊ីត្រូវតែតម្រង់មីស៊ីលដាក់គោលដៅដែលកំពុងគំរាមកំហែងខ្លួន ហើយស្ថានការណ៍ក៏រឹតតានតឹងទៅតាមនោះដែរ។ ជាការកត់សម្គាល់នោះ ទាំងរុស្ស៊ី ទាំងណាតូ សុទ្ធតែបានបង្កើនកម្លាំងយោធាដូចគ្នានៅតាមព្រំដែននៅអឺរ៉ុបខាងកើត តំំបន់បាល់កង់ និងសមុទ្រខ្មៅ ដែលធ្វើឲ្យគេបារម្ភថានឹងមានប៉ះទង្គិចណាមួយមិនខាន៕
Tag:
រុស្ស៊ី
វ្ល៉ាឌីមៀ ពូទីន
អាមេរិក
ណាតូ
© រក្សាសិទ្ធិដោយ thmeythmey.com