ទោះមានវ័យ៩១ឆ្នាំ លោកមហាធៀ មហាម៉ាត់ ត្រៀមខ្លួនធ្វើនាយករដ្ឋមន្ត្រីម៉ាឡេស៊ីម្ដងទៀត

អន្តរជាតិ

ទោះមានវ័យ៩១ឆ្នាំ លោកមហាធៀ មហាម៉ាត់ ត្រៀមខ្លួនធ្វើនាយករដ្ឋមន្ត្រីម៉ាឡេស៊ីម្ដងទៀត

07, Jun 2017 , 7:39 pm

រូបភាព

អតីតនាយករដ្ឋមន្ត្រីម៉ាឡេស៊ី មហាធៀ មហាម៉ាត់ (រូបភាព Xinhua)

ដោយ: តន ចាន់រិទ្ធារ៉ា

អតីតនាយករដ្ឋមន្ត្រីម៉ាឡេស៊ី លោកមហាធៀ មហាម៉ាត់ នៅថ្ងៃទី៦ ខែមិថុនា បានប្រកាសថា លោកត្រៀមខ្លួនកាន់តំណែងនាយករដ្ឋមន្ត្រីម្ដងទៀត បើបក្សប្រឆាំងឈ្នះការបោះឆ្នោតទូទៅដែលគ្រោងធ្វើនៅឆ្នាំ២០១៨ ។ លោក មហាធៀ មហាម៉ាត់ ដែលធ្លាប់កាន់តំណែងនេះពីឆ្នាំ១៩៨១ ដល់ឆ្នាំ២០០៣ បានដាក់លក្ខខណ្ឌថា លោកនឹងកាន់តំណែងចាស់របស់លោកក្នុងរយៈពេលខ្លី ក្នុងករណីបក្សប្រឆាំងទទួលជ័យជម្នះ ហើយគ្មានបេក្ខជនសមស្របប៉ុណ្ណោះ។

លោកមហាធៀ មហាម៉ាត់ ធ្លាប់កាន់តំណែងនាយករដ្ឋមន្ត្រីម៉ាឡេស៊ីរយៈពេល ២២ឆ្នាំ មុនពេលលោកចូលនិវត្តន៍ក្នុងឆ្នាំ២០០៣ ។ ទោះបីជាចូលនិវត្តន៍ក្ដី លោកមហាធៀ មហាម៉ាត់ នៅតែជាបុគ្គលមាន ឥទ្ធិពលក្នុងឆាកនយោបាយម៉ាឡេស៊ី និងបក្សកាន់អំណាច (UMNO) ដដែល។ ប៉ុន្តែលោកសម្រេចចិត្តដើរចេញពីបក្សកាន់អំណាចក្នុងឆ្នាំ២០១៦ បន្ទាប់ពីខ្វែងគំនិតគ្នាជាមួយនាយករដ្ឋមន្ត្រី ណាជីប រ៉ាហ្សាក់ (Najib Razak) ជុំវិញករណីពុករលួយក្នុងមូលនិធិរដ្ឋ។

ក្រោយការចាកចេញពីបក្សដែលធ្លាប់ដឹកនាំអស់ពេលជាយូរ អតីតនាយករដ្ឋមន្ត្រីម៉ាឡេស៊ីវ័យ ៩១ឆ្នាំរូបនេះ រួមគ្នាជាមួយអតីតសមាជិកបក្សដទៃទៀត និងអ្នកនយោបាយប្រឆាំង រួមគ្នាបង្កើតបក្សថ្មីមួយដើម្បីប្រជែងជាមួយនាយករដ្ឋមន្ត្រី ណាជីប ។ មិនទាន់តែឈ្នះឆ្នោតផងនោះ លោកមហាធៀ មហាម៉ាត់ បង្ហើបថា លោកអាចធ្វើជានាយករដ្ឋមន្ត្រីសម្រាប់គណបក្សប្រឆាំង បើមានការយល់ព្រមឲ្យលោកកាន់តំណែងនេះមែន បើទោះជាលោកមិនចង់ធ្វើក៏ដោយ។

បើតាមការផ្សាយរបស់ទីភ្នាក់ងារព័ត៌មាន Reuters លោកមហាធៀ មហាម៉ាត់ ក៏បានពិចារណាដឹកនាំគណបក្សប្រឆាំងក្នុងយុទ្ធនាការបោះឆ្នោតឆ្នាំក្រោយដែរ។ ថ្លែងក្នុងវេទិកាសេដ្ឋកិច្ចមួយ លោកមហាធៀ និយាយថា៖ «ប្រសិនបើគ្មាននរណាធ្វើជានាយករដ្ឋមន្ត្រីពេលបក្សប្រឆាំងឈ្នះឆ្នោត ខ្ញុំអាចកាន់តំណែងនេះមួយរយៈពេលខ្លីបាន ប៉ុន្តែស្ថិតក្រោមលក្ខខណ្ឌដែលអ្នកទាំងអស់គ្នាយល់ព្រមជាមុនសិន។

លោកមហាធៀ មហាម៉ាត់ គឺជានាយករដ្ឋមន្ត្រីកាន់តំណែងយូរជាងគេនៅម៉ាឡេស៊ី និងបានគ្រប់គ្រងរាជាណាចក្រមួយនេះជាមួយនឹងកណ្ដាប់ដៃដែក។ ក្រោមការគ្រប់គ្រងរបស់លោក គេមិនសូវឃើញមានសកម្មភាពរបស់ក្រុមប្រឆាំងឡើយ ហើយការរំលោភសិទិ្ធមនុស្សក៏មានធ្ងន់ធ្ងរដែរ។ ប៉ុន្តែការដឹកនាំរបស់លោកបាននាំឲ្យម៉ាឡេស៊ីក្លាយជាប្រទេសមានសេដ្ឋកិច្ចរីកចម្រើនខ្លាំង ហើយប្រជាជនមានកម្រិតជីវភាពធូរធារទៀតផង។

ប៉ុន្តែចុងក្រោយនេះ លោកមហាធៀ មហាម៉ាត់ បែរជាឈ្លោះគ្នាជាមួយប្រមុខរដ្ឋាភិបាលបច្ចុប្បន្នលោក ណាជីប ទៅវិញ។ អតីតនាយករដ្ឋមន្ត្រីរូបនេះ បានរិះគន់លោក ណាជីប ជុំវិញការរឿងអាស្រូវពុករលួយ កេងប្រវ័ញ្ចថវិការដ្ឋជាច្រើនលានដុល្លារ ប៉ុន្តែលោក ណាជីប បានទាត់ចោលការប្រកាន់ទាំងអស់មកលើរូបលោក និងបានបណ្ដេញមន្ត្រីដែលហ៊ានចោទលោកទៀតផង។ ដោយមិនអាចធ្វើការជាមួយគ្នាបាន លោកមហាធៀ មហាម៉ាត់ ក៏បានដើរចេញតែម្ដង៕