អន្តរជាតិ
អារ៉ាប៊ីសាអូឌីត ប្រាប់ឲ្យកាតាបញ្ឈប់ការគាំទ្រក្រុមភេរវករ បើមិនចង់ខាតបង់កាន់តែខ្លាំង រដ្ឋមន្ត្រីការបរទេសអារ៉ាប៊ីសាអូឌីត Adel Al-Jubeir (រូបភាព Reuters)
× ជម្លោះការទូតរវាងកាតា និងរដ្ឋឈូងសមុទ្រពែរ្សផ្សេងទៀត នៅមិនទាន់ស្រាកស្រាន្តនៅឡើយទេ។ ប្រទេសផ្សេងទៀតដូចជាហ្ស៊កដានី និងម៉ាល់ឌីវ ក៏បានផ្ដាច់ចំណងការទូតជាមួយកាតាដែរ ខណៈមហាក្សត្រគុយវ៉ែតកំពុងដើរតួជាអ្នកសម្រុះសម្រួលរវាងភាគីជម្លោះទាំងអស់ ដោយបានទៅជួបមហាក្សត្រអារ៉ាប៊ីសាអូឌីតព្រះចៅ សាលម៉ាន ដើម្បីពិភាក្សាលើបញ្ហានេះ។ ដោយឡែកប្រមុខការទូតអារ៉ាប៊ីសាអូឌីត ក៏បានដាក់លក្ខខណ្ឌឲ្យកាតាអនុវត្ត បើកាតាមិនចង់ជួបបញ្ហាកាន់តែធ្ងន់ធ្ងរទេនោះ។
រដ្ឋមន្ត្រីការបរទេសអារ៉ាប៊ីសាអូឌីត Adel Al-Jubeir បានដាក់ចេញវិធានការសំខាន់ៗសម្រាប់កាតាក្នុងការស្តារទំនាក់ទំនងឡើងវិញជាមួយសម្ព័ន្ធមិត្តអារ៉ាប់របស់ខ្លួន។ លោក Adel Al-Jubeir បានប្រាប់ឲ្យកាតាឈប់គាំទ្រក្រុមហាម៉ាស់នៅប៉ាឡេស្ទីន និងក្រុមភាតរភាពមូស្លីមនៅអេហ្ស៊ីប មុនពេលចាប់ផ្ដើមភ្ជាប់ទំនាក់ទំនងឡើងវិញ។ ស្របគ្នានេះ ការចរចាដោះស្រាយបញ្ហាការទូតកំពុងធ្វើឡើង ដោយមានមហាក្សត្រគុយវ៉ែតកំពុងខ្វែងដៃជើងក្នុងរកច្រកចេញជម្លោះនេះ។
អារ៉ាប៊ីសាអូឌីត, អេហ្ស៊ីប, អារ៉ាប់រួមអេមីរ៉ាត, បារ៉ែន, យេម៉ែន និងរដ្ឋមួយចំនួនទៀត បានផ្ដាច់ ឬទម្លាក់កម្រិតទំនាក់ទំនងជាមួយរដ្ឋកាតា ព្រោះតែគាំទ្រក្រុមភេរវកម្មជ្រុលនិយម។ ក្រៅពីទំនាក់ទំនងការទូត ប្រទេស ទាំងនេះ ក៏បានបញ្ឈប់ការធ្វើដំណើរទៅមកគោលដៅនៅកាតា ដែលកំពុងធ្វើឲ្យក្រុមហ៊ុន អាកាស ចរណ៍ធំៗរងផលប៉ះពាល់យ៉ាងខ្លាំងដូចជា Qatar Airways, Emirate និង Ethihad Airways ជាដើមផង។
បើតាមសារព័ត៌មាន Al Jazeera រដ្ឋមន្ត្រីការបរទេសអារ៉ាប៊ីសាអូឌីត Al-Jubeir និយាយក្នុងទីក្រុងប៉ារីសថា អារ៉ាប៊ីសាអូឌីត ចង់ឃើញកាតាអនុវត្តតាមពាក្យសន្យារបស់ខ្លួនកាលពីប៉ុន្មានឆ្នាំមុនទាក់ទងការគាំទ្រក្រុមជ្រុលនិយម និងការប្រព័ន្ធផ្សព្វផ្សាយចូលចិត្តបង្ករឿង ក៏ដូចជាលូកលាន់កិច្ចការផ្ទៃក្នុងប្រទេសផ្សេងដែរ។ លោកបន្តថា គ្មាននរណាចង់ធ្វើបាបកាតាឡើយ តែកាតាផ្ទាល់ត្រូវជ្រើសរើសផ្លូវដើរដោយខ្លួនឯង។
បើតាមលោក Al-Jubeir អារ៉ាប៊ីសាអូឌីតសម្រេចចិត្តផ្ដាច់ទំនាក់ទំនងការទូតជាមួយកាតាទាំងឈឺចាប់ តែក៏ដើម្បីឲ្យកាតាយល់ថា នយោបាយរបស់កាតាមិនស្ថិតស្ថេរឡើយ ហើយត្រូវតែផ្លាស់ប្ដូរដាច់ខាត។ លោកបន្តថា កាតាបានប៉ះពាល់ប៉ាឡេស្ទីន និងអេហ្ស៊ីបតាមរយៈការគាំទ្រក្រុមហាម៉ាស់ និងក្រុមភារតភាពបងប្អូន ដែលត្រូវបានអន្តរជាតិចាត់ទុកជាក្រុមភេរវកម្មជ្រុលនិយម ហើយកាតាត្រូវតែឈប់ជាបន្ទាន់។
យ៉ាងណាក្ដី ប្រមុខការទូតអារ៉ាប៊ីសាអូឌីតរូបនេះ មិនបានបញ្ជាក់ទេថាកាតាត្រូវអនុវត្តតាមលក្ខខណ្ឌខាងលើភ្លាមៗ ឬយ៉ាងណាដែរ។ បើគិតលើផលប៉ះពាល់កើតចេញពីការរឹតត្បិតការធ្វើដំណើរទាំងផ្លូវគោក ផ្លូវទឹក ផ្លូវអាកាស រដ្ឋកាតាត្រូវតែពិចារណាលើផលវិបាកទាំងឡាយ ដ្បិតអីប្រទេសជុំវិញខ្លួននាំគ្នាសង្កត់ខ្លាំង។ ប៉ុន្តែអារ៉ាប៊ីសាអូឌីតសង្ឃឹមថា កាតានឹងដើរលើផ្លូវត្រូវឡើងវិញ ដើម្បីកុំឲ្យខាតបង់បន្ថែមទៀត៕
Tag:
អារ៉ាប៊ីសាអូឌីត
កាតា
មជ្ឈិមបូព៌ា
© រក្សាសិទ្ធិដោយ thmeythmey.com