អន្តរជាតិ
តួកគី ពន្លឿនការពង្រាយទ័ពនៅកាតា ខណៈជម្លោះការទូតនៅឈូងសមុទ្រពែរ្សមិនទាន់ធូរស្រាល
× ខណៈដែលជម្លោះការទូតរវាងកាតា និងបណ្ដារដ្ឋអារ៉ាប់នៅមជ្ឈិមបូព៌ា នៅមិនទាន់មានសញ្ញាស្រាកស្រាន្ត តួកគីដែលជារដ្ឋក្រៅតំបន់ឈូងសមុទ្រពែរ្ស បានប្រកាន់ជំហរកាន់ជើងកាតាដែលកំពុងឯកោខ្លាំង។ តួកគីដែលមានឥទ្ធិពលគួរសមនៅក្នុងតំបន់ដែរនោះ បានពន្លឿនការពង្រាយកងទ័ពរបស់ខ្លួននៅកាតា ក្រោមកិច្ចព្រមព្រៀងឆ្នាំ២០១៤ ។ ចំណែកប្រធានាធិបតីតួកគី តៃយីប អ៊ែរដូហ្កាន់ ក៏បានរិះគន់រដ្ឋឈូងសមុទ្រពែរ្សដែលបានបែរខ្នងដាក់កាតា និងបានសន្យាជួយដោះស្រាយជម្លោះនេះដែរ។
សភាតួកគី បានអនុម័តសេចក្ដីព្រាងច្បាប់ដែលអនុញ្ញាតឲ្យមានការពង្រាយកងទ័ពតួកគីនៅមូលដ្ឋានក្នុងរដ្ឋកាតា ដែលកំពុងរងសម្ពាធការទូតខ្លាំងពីសម្ព័ន្ធមិត្តអារ៉ាប់របស់ខ្លួន។ អារ៉ាប៊ីសាអូឌីត ប៉ារ៉ែន និងអារ៉ាប់រួមអេមីរ៉ាត ដែលបានបិទព្រំដែនរបស់ខ្លួនជាមួយកាតាទាំងព្រំដែនទឹក អាកាស និងដីគោក ខណៈប្រទេសក្នុងតំបន់មួយចំនួនទៀតក៏បានផ្ដាច់ទំនាក់ទំនងការទូតដែរដូចជាអេហ្ស៊ីប យេម៉ែន និងហ្ស៊កដានីជាដើម ដោយចោទកាតាថាបានគាំទ្រក្រុមភេរវកម្ម។
បើតាមទីភ្នាក់ងារព័ត៌មាន Reuters សេចក្ដីព្រាងច្បាប់នេះត្រូវបានអនុម័តដោយសមាជិកសភាចំនួន២៤០ សំឡេង ហើយវានឹងបើកផ្លូវឲ្យមានការបញ្ជូនទ័ពទៅកាន់កាតាក្នុងពេលឆាប់ៗនេះ ស្របតាមកិច្ចព្រមព្រៀងរវាងតួកគី និងកាតាក្នុងឆ្នាំ២០១៤ ។ គេមិនទាន់ដឹងច្បាស់ថាហេតុអ្វីតួកគីបែរជាពន្លឿនការពង្រាយកងទ័ពនៅពេលនេះឡើយ។ ប៉ុន្តែនេះទំនងជាវិធានការត្រៀមទុកមុនរបស់តួកគីសម្រាប់ការពារកាតាដែលជាមិត្តរបស់ខ្លួន។
ទន្ទឹមគ្នានេះដែរ ប្រធានាធិបតីតួកគី តៃយីប អ៊ែរដូហ្កាន់ (Tayyip Erdogan) ដែលបានអំពាវនាវឲ្យមានការស្ងៀមស្ងាត់ដើម្បីបន្ថយកម្ដៅជម្លោះនោះ ក៏បាននិយាយរិះគន់បណ្ដារដ្ឋអារ៉ាប់ដែលគាបសង្កត់កាតា ទោះបីជាកាតាទាត់ចោលការចោទប្រកាន់ទាំងអស់ក្ដី។ លោក អ៊ែរដូហ្កាន់ បញ្ជាក់ថា ការធ្វើឲ្យកាតាឯកោ ក៏ដូចជាការដាក់ទណ្ឌកម្មជាដើម មិនអាចដោះស្រាយបញ្ហាបានឡើយ តែតួកគីនឹងជួយដោះស្រាយបញ្ហានេះតាមតែអាចធ្វើបាន។
ប្រធានាធិបតីតួកគី ក៏បានសរសើររដ្ឋកាតា ដែលមិនឆេវឆាវ និងមិនធ្វើអ្វីទទឹងទិស ដើម្បីឆ្លើយតបនឹងសកម្មភាពរបស់រដ្ឋឈូងសមុទ្រផ្សេងទៀត ទោះខ្លួនកំពុងរងផលប៉ះពាល់ខ្លាំងក៏ដោយ។ លោក អ៊ែរដូហ្កាន់ ក៏យល់ឃើញថា ទណ្ឌកកម្មលើកាតាក៏មិនមែនជាត្រឹមត្រូវដែរ ហើយដំណោះស្រាយសមស្របសម្រាប់រកច្រកចេញជម្លោះផ្ទៃក្នុងរវាងសមាជិករដ្ឋឈូងសមុទ្រពែរ្សដូចគ្នានេះ គឺមានតែផ្លូវចរចាគ្នាប៉ុណ្ណោះ។
តាមពិតទៅ វាក៏មិនមែនជាចម្លែកអ្វីដែរ ដែលតួកគីគាំទ្រកាតានោះ។ ទាំងតួកគី ទាំងកាតា សុទ្ធតែគាំទ្រក្រុមភាតរភាពបងប្អូននៅអេហ្ស៊ីប ខណៈក្រុមនេះត្រូវបានអាជ្ញាធរអេហ្ស៊ីប និងរដ្ឋឈូងសមុទ្រផ្សេងទៀត ចាត់ទុកជាក្រុមភេរវកម្មទៅហើយ។ តួកគី និងកាតា ក៏មានជំហរស្របគ្នានៅក្នុងការបណ្ដេញប្រធានាធិបតីស៊ីរីចេញពីតំណែងដែរ។ ជុំវិញការពង្រាយទ័ពវិញ តួកគីអាចបញ្ជូនទាហានរបស់ខ្លួនចំនួនបីពាន់នាក់ទៅកាន់កាតា ស្របពេលទាហាន១៥០នាក់បានពង្រាយរួចស្រេចហើយ៕
Tag:
តួកគី
កាតា
មជ្ឈិមបូព៌ា
© រក្សាសិទ្ធិដោយ thmeythmey.com