កីឡាជាតិ
ជាតិ
គ្រូចំបាប់ជនជាតិកូរ៉េខាងត្បូងដួលបាក់ឆ្អឹងត្រគាករហូតឈានដល់វះកាត់
× លោក Kim Soogil គ្រូបង្វឹកក្រុមកីឡាករចំបាប់ជម្រើសជាតិកម្ពុជាបានដួលបាក់ឆ្អឹងត្រគាកខាងឆ្វេងជាទម្ងន់ អំឡុងពេលលោកមកមើលការហ្វឹកហាត់របស់យុវជនថ្នាលកាលពីល្ងាចថ្ងៃទី២៤ ខែមិថុនា នៅពហុកីឡដ្ឋានជាតិ។ ខណៈពេលនេះ លោក កំពុងសម្រាកព្យាបាលនៅមន្ទីរពេទ្រកាល់ម៉ែត្រ។
លោក Kim Soogil គ្រូបង្វឹកកីឡាចំបាប់មកពីកូរ៉េខាងត្បូងរបស់សហព័ន្ធកីឡាចំបាប់កម្ពុជាបានរអិលដួលបាក់ឆ្អឹងត្រគាកខាងឆ្វេងយ៉ាងធ្ងន់ធ្ងរនៅមុខអគារដំបូលទូកក្នុងពហុកីឡដ្ឋានជាតិកាលពីល្ងាចថ្ងៃទី២៤ មិថុនា ឆ្នាំ២០១៧។ នេះបើយោងតាមអតីតកីឡាការិនីចំបាប់ ចូវ សុធារ៉ា។
សុធារ៉ា ដែលដឹងពីមូលហេតុបានរៀបរាប់ថា ដោយមានចិត្តស្រលាញ់ក្រុមយុវជនថ្នាលលោក Kim Soogil បានយកពេលវេលាទំនេរពីការបង្វឹកក្រុមកីឡាករឈុតធំមកមើលការហ្វឹកហាត់របស់ក្រុមកីឡាករថ្នាលនៅអគារដំបូលទូកក្នុងបរិវេណពហុកីឡដ្ឋានជាតិ។ សុធារ៉ា បន្តរៀបរាប់ថា នៅថ្ងៃសៅរ៍នោះនៅស្តាតអូឡាំពិកមានភ្លៀងរលឹមស្រិចៗជាហេតុធ្វើឲ្យលោក Kim Soogil ដែលហៀបនឹងបោះជំហានដើរបានរអិលដួលបាក់ឆ្អឹងត្រគាកខាងឆ្វេងនៅមុខអគារដំបូលទូកនោះតែម្តង។
កញ្ញា ចូវ សុធារ៉ា បានបន្ថែមថា ខណៈពេលនេះ លោក Kim Soogil កំពុងសម្រាកព្យាបាលនៅមន្ទីរពេទ្យកាល់ម៉ែត្រ។« លោក នឹងចូលបន្ទប់វះកាត់ឆ្អឹងត្រគាក ដើម្បីដាក់ដែកអបនារសៀលថ្ងៃទី២៥ ខែមិថុនា នេះ»។ នេះបើតាមការបញ្ជាក់របស់ កញ្ញា សុធារ៉ា។
លោក Kim Soogil ជនជាតិកូរ៉េខាងត្បូងបានមកបង្វឹកក្រុមកីឡាករចំបាប់ជម្រើសជាតិបានរយៈពេលប្រហែលជាពីរឆ្នាំ ដោយ លោក ទទួលបន្ទុកបង្វឹកក្រុមឈុតធំបុរស-នារី ហើយបច្ចុប្បន្ន លោក មានអាយុ៥៧ឆ្នាំ៕
© រក្សាសិទ្ធិដោយ thmeythmey.com