ក្រសួងអប់រំ រើសគ្រូកម្រិតឧត្តម ១០០នាក់ សម្រាប់បម្រើការនៅគ្រឹះស្ថានសាធារណៈ

ជាតិ

ក្រសួងអប់រំ រើសគ្រូកម្រិតឧត្តម ១០០នាក់ សម្រាប់បម្រើការនៅគ្រឹះស្ថានសាធារណៈ

26, Jun 2017 , 8:19 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ក្រសួងអប់រំ យុវជន និងកីឡា នឹងរៀបចំការប្រឡងជ្រើសរើសគ្រូបង្រៀនកម្រិតឧត្តមចំនួន ១០០នាក់ ឲ្យបម្រើការនៅតាមគ្រឹះស្ថានឧត្តមសិក្សាសាធារណៈក្រោមឱវាទក្រសួងអប់រំ។ ចាប់ទទួលពាក្យប្រឡង ចាប់ពីពេលផ្សាយដំណឹងនេះ រហូតដល់ថ្ងៃទី១២ ខែកក្កដាខាងមុខ ខណៈកាលបរិច្ឆេទប្រឡង នឹងប្រព្រឹត្តទៅនៅថ្ងៃទី២៦ ខែកក្កដា។

ក្រសួងអប់រំ យុវជន និងកីឡា នឹងរៀបចំការប្រឡងជ្រើសរើសគ្រូបង្រៀនកម្រិតឧត្តមចំនួន ១០០នាក់ ឲ្យបម្រើការនៅតាមគ្រឹះស្ថានឧត្តមសិក្សាសាធារណៈក្រោមឱវាទក្រសួងអប់រំ។ ការជ្រើសរើសនេះ គឺដើម្បីផ្ដល់ឱកាសដល់មន្ត្រីរាជការ និងនិស្សិត ដែលចង់ក្លាយជាគ្រូបង្រៀនកម្រិតឧត្តម។

បើតាមតាមសេចក្ដីជូនដំណឹងរបស់ក្រសួងអប់រំ បេក្ខជនទាំងពីរភេទដែលអាចដាក់ពាក្យប្រឡងបាន ត្រូវតែជានិស្សិត ដែលពុំទាន់មានការងារក្នុងក្របខណ្ឌរដ្ឋ ឬជាបុគ្គលិកក្របខណ្ឌរដ្ឋដែលបានតាំងស៊ប់ក្នុងក្របខណ្ឌមន្ត្រីរាជការរួចហើយ។ បេក្ខជន ត្រូវមានសញ្ញាបត្របរិញ្ញាបត្រជាន់ខ្ពស់ ឬសញ្ញាបត្របណ្ឌិត ដែលមានឯកទេសស្របទៅតាមតម្រូវការមុខវិជ្ជាជំនាញរបស់អង្គភាព។

បេក្ខជនដែលចាប់អារម្មណ៍ អាចទទួលពាក្យសុំចុះឈ្មោះប្រឡង ចាប់ពីថ្ងៃផ្សាយដំណឹង រហូតដល់ថ្ងៃទី១២ ខែកក្កដាខាងមុខ ខណៈកាលបរិច្ឆេទប្រឡង នឹងប្រព្រឹត្តទៅនៅថ្ងៃទី២៦ ខែកក្កដា នាសាលាមធ្យមសិក្សាគរុកោសល្យមត្តេយ្យមជ្ឈឹម។

មុខវិជ្ជាប្រឡងរួមមាន វប្បធម៌ទូទៅ មុខវិជ្ជាជំនាញ និងភាសាបរទេស (បារាំង ឬអង់គ្លេស)។ នេះបើតាមក្រសួងអប់រំ។ ព័ត៌មានបន្ថែម បេក្ខជនអាចទាក់ទងមកការិយាល័យក្របខណ្ឌនៃនាយកដ្ឋានបុគ្គលិក ក្នុងបរិវេណទីស្ដីការក្រសួងអប់រំ យុវជន និងកីឡា ឬតាមរយៈគេហទំព័រ www.moeys.gov.kh ៕