ជាតិ
មន្ត្រីអាដហុកបួនរូបដែលទើបចេញពីពន្ធនាគារ មិនទាន់អាចធ្វើការបានទេ ព្រោះបញ្ហាសុខភាព
ពីឆ្វេងទៅស្តាំ៖ លោក យី សុខសាន្ត លោក ណៃ វ៉ង់ដា លោក នី សុខា និងអ្នកស្រី លឹម មុនី
×![]()
ដោយ: ម៉ៅ សុផា
ភ្នំពេញ៖ មន្ត្រីសមាគមអាដហុកទាំងបួនរូប ដែលទើបរួចផុតពីការឃុំឃាំងអស់រយៈពេលជាងមួយឆ្នាំ ដោយសារតែរឿងអាស្រូវស្រីមុំ មិនទាន់អាចចូលបំពេញការងារក្នុងស្ថាប័នខ្លួនវិញនោះទេ។ នេះជាការអះអាងរបស់លោក សំ ច័ន្ទគា អ្នកនាំពាក្យសមាគមអាដហុក។
តាមរយៈប្រព័ន្ធទូរសព្ទ លោក សំ ច័ន្ទគា បាននិយាយថា មូលហេតុតែមួយគត់ ដែលអ្នកទាំងបួន នៅមិនទាន់អាចចូលបំពេញការងារ គឺបញ្ហាសុខភាព។ លោក និយាយយ៉ាងដូច្នេះថា៖«ពួកគាត់ សុទ្ធតែមានបញ្ហាសុខភាព។ ដូច្នេះ ពួកគាត់ មិនទាន់អាចចូលធ្វើការជាធម្មតាទេ។ សមាគមអាដហុក ឲ្យពួកគាត់ទៅពិនិត្យសុខភាពសិន។ បើពេទ្យ ឲ្យពួកគាត់ ត្រូវសម្រាករយៈពេលប៉ុន្មានថ្ងៃ ហើយចូលធ្វើការវិញនៅពេលណា សមាគមនឹងធ្វើតាមបញ្ជារបស់ពេទ្យ»។
លោក សំ ច័ន្ទគា បានបន្តថា ថ្វីដ្បិតមិនទាន់អាចចូលបំពេញការងារជាផ្លូវការក្តី តែក្រោយរួចផុតពីការឃុំឃាំង អ្នកទាំងបួន ឧស្សាហ៍មានវត្តមាននៅសមាគមអាដហុក ដើម្បីជួបប្រជាពលរដ្ឋ ពីសហគមន៍នានា នៅតាមបណ្តាខេត្ត ដែលទៅសួរទុក្ខពួកគាត់។ ក្រោយពីជួបសំណេះសំណាលជាមួយប្រជាពលរដ្ឋរួចហើយ អ្នកទាំងបួន ក៏ត្រឡប់ទៅថែទាំសុខភាពវិញ។
លោក នី សុខា មន្ត្រីអាដហុកមួយរូប ដែលបានជាប់ឃុំព្រោះរឿងអាស្រូវស្រីមុំ បានប្រាប់សារព័ត៌មានថ្មីៗថា ប្រសិនបើសុខភាព មានភាពល្អប្រសើរ លោក អាចនឹងចូលធ្វើការវិញ នៅសប្តាហ៍ក្រោយ។ លោក នី សុខា ប្រាប់ថា លោកមានបញ្ហាសុខភាពជាច្រើនផ្នែក ដែលត្រូវព្យាបាល ដូចជាខ្វះជាតិស្ករ ខ្វះឈាម និងរលាកតម្រង់នោម ជាដើម។ មន្ត្រីអាដហុករូបនេះ បញ្ជាក់យ៉ាងដូច្នេះ៖«ខ្ញុំត្រូវពិនិត្យសុខភាពសិន។ បើពេទ្យ ថាអាចចូលធ្វើការបាននៅពេលណា ខ្ញុំនឹងចូលធ្វើការនៅពេលនោះ»។
មន្ត្រីអាដហុកបីរូបទៀត ដែលបានជាប់ឃុំព្រោះរឿងអាស្រូវស្រីមុំ ដែរនោះ គឺលោក យី សុខសាន្ត លោក ណៃ វង់ដា និងលោកស្រី លឹម មុន្នី។ នៅមានលោក នី ចរិយា មួយរូបទៀត ដែលជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) ក៏បានជាប់ឃុំ ជាមួយមន្ត្រីអាដហុកទាំង៤រូប នៅក្នុងសំណុំរឿង នេះផងដែរ។
ក្រោយរួចផុតពីការឃុំឃាំង រហូតមកដល់ពេលនេះ លោក នី ចរិយា ក៏មិនទាន់បញ្ជាក់បានដែរថា លោក នឹងចូលបម្រើការងារក្នុងស្ថាប័នគ.ជ.ប វិញ នៅពេលណា។ នៅព្រឹកថ្ងៃចន្ទនេះ លោក នី ចរិយា បានប្រាប់តាមទូរសព្ទយ៉ាងខ្លី លោក កំពុងតែស្ថិតក្នុងកិច្ចប្រជុំមួយ ដូច្នេះមិនអាចនិយាយអ្វីបានឡើយ។
កាលពីរសៀលថ្ងៃទី២៩ ខែមិថុនា ឆ្នាំ២0១៧ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាដំណោះស្រាយ ដើម្បីឲ្យមន្ត្រីអាដហុកនិងមន្ត្រីគ.ជ.ប រស់នៅក្រៅពន្ធនាគារជាបណ្តោះអាសន្ន។ អ្នកទាំងប្រាំ បានជាប់ឃុំ តាំងពីចុងខែមេសា ឆ្នាំ២0១៦មកម្ល៉េះ។
តាមការរកឃើញរបស់តុលាការកន្លងមក អ្នកខាងលើ បានជាប់ពាក់ព័ន្ធការសូកប៉ាន់ប្រាក់ជាង២00ដុល្លារ ដល់នារីម្នាក់ ឈ្មោះខុម ចាន់តារាទី ហៅស្រីមុំ។ នៅក្នុងសំណុំរងនេះ មន្ត្រីអាដហុកទាំងបួនរូប ត្រូវបានចោទពីបទ «សូកប៉ាន់សាក្សី» ហើយអគ្គលេខាធិការរងរបស់គ.ជ.ប ត្រូវបានចោទពីបទ «សមគំនិតក្នុងអំពើសូកប៉ាន់សាក្សី»៕
តាមរយៈប្រព័ន្ធទូរសព្ទ លោក សំ ច័ន្ទគា បាននិយាយថា មូលហេតុតែមួយគត់ ដែលអ្នកទាំងបួន នៅមិនទាន់អាចចូលបំពេញការងារ គឺបញ្ហាសុខភាព។ លោក និយាយយ៉ាងដូច្នេះថា៖«ពួកគាត់ សុទ្ធតែមានបញ្ហាសុខភាព។ ដូច្នេះ ពួកគាត់ មិនទាន់អាចចូលធ្វើការជាធម្មតាទេ។ សមាគមអាដហុក ឲ្យពួកគាត់ទៅពិនិត្យសុខភាពសិន។ បើពេទ្យ ឲ្យពួកគាត់ ត្រូវសម្រាករយៈពេលប៉ុន្មានថ្ងៃ ហើយចូលធ្វើការវិញនៅពេលណា សមាគមនឹងធ្វើតាមបញ្ជារបស់ពេទ្យ»។
លោក សំ ច័ន្ទគា បានបន្តថា ថ្វីដ្បិតមិនទាន់អាចចូលបំពេញការងារជាផ្លូវការក្តី តែក្រោយរួចផុតពីការឃុំឃាំង អ្នកទាំងបួន ឧស្សាហ៍មានវត្តមាននៅសមាគមអាដហុក ដើម្បីជួបប្រជាពលរដ្ឋ ពីសហគមន៍នានា នៅតាមបណ្តាខេត្ត ដែលទៅសួរទុក្ខពួកគាត់។ ក្រោយពីជួបសំណេះសំណាលជាមួយប្រជាពលរដ្ឋរួចហើយ អ្នកទាំងបួន ក៏ត្រឡប់ទៅថែទាំសុខភាពវិញ។
លោក នី សុខា មន្ត្រីអាដហុកមួយរូប ដែលបានជាប់ឃុំព្រោះរឿងអាស្រូវស្រីមុំ បានប្រាប់សារព័ត៌មានថ្មីៗថា ប្រសិនបើសុខភាព មានភាពល្អប្រសើរ លោក អាចនឹងចូលធ្វើការវិញ នៅសប្តាហ៍ក្រោយ។ លោក នី សុខា ប្រាប់ថា លោកមានបញ្ហាសុខភាពជាច្រើនផ្នែក ដែលត្រូវព្យាបាល ដូចជាខ្វះជាតិស្ករ ខ្វះឈាម និងរលាកតម្រង់នោម ជាដើម។ មន្ត្រីអាដហុករូបនេះ បញ្ជាក់យ៉ាងដូច្នេះ៖«ខ្ញុំត្រូវពិនិត្យសុខភាពសិន។ បើពេទ្យ ថាអាចចូលធ្វើការបាននៅពេលណា ខ្ញុំនឹងចូលធ្វើការនៅពេលនោះ»។
មន្ត្រីអាដហុកបីរូបទៀត ដែលបានជាប់ឃុំព្រោះរឿងអាស្រូវស្រីមុំ ដែរនោះ គឺលោក យី សុខសាន្ត លោក ណៃ វង់ដា និងលោកស្រី លឹម មុន្នី។ នៅមានលោក នី ចរិយា មួយរូបទៀត ដែលជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) ក៏បានជាប់ឃុំ ជាមួយមន្ត្រីអាដហុកទាំង៤រូប នៅក្នុងសំណុំរឿង នេះផងដែរ។
ក្រោយរួចផុតពីការឃុំឃាំង រហូតមកដល់ពេលនេះ លោក នី ចរិយា ក៏មិនទាន់បញ្ជាក់បានដែរថា លោក នឹងចូលបម្រើការងារក្នុងស្ថាប័នគ.ជ.ប វិញ នៅពេលណា។ នៅព្រឹកថ្ងៃចន្ទនេះ លោក នី ចរិយា បានប្រាប់តាមទូរសព្ទយ៉ាងខ្លី លោក កំពុងតែស្ថិតក្នុងកិច្ចប្រជុំមួយ ដូច្នេះមិនអាចនិយាយអ្វីបានឡើយ។
កាលពីរសៀលថ្ងៃទី២៩ ខែមិថុនា ឆ្នាំ២0១៧ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាដំណោះស្រាយ ដើម្បីឲ្យមន្ត្រីអាដហុកនិងមន្ត្រីគ.ជ.ប រស់នៅក្រៅពន្ធនាគារជាបណ្តោះអាសន្ន។ អ្នកទាំងប្រាំ បានជាប់ឃុំ តាំងពីចុងខែមេសា ឆ្នាំ២0១៦មកម្ល៉េះ។
តាមការរកឃើញរបស់តុលាការកន្លងមក អ្នកខាងលើ បានជាប់ពាក់ព័ន្ធការសូកប៉ាន់ប្រាក់ជាង២00ដុល្លារ ដល់នារីម្នាក់ ឈ្មោះខុម ចាន់តារាទី ហៅស្រីមុំ។ នៅក្នុងសំណុំរងនេះ មន្ត្រីអាដហុកទាំងបួនរូប ត្រូវបានចោទពីបទ «សូកប៉ាន់សាក្សី» ហើយអគ្គលេខាធិការរងរបស់គ.ជ.ប ត្រូវបានចោទពីបទ «សមគំនិតក្នុងអំពើសូកប៉ាន់សាក្សី»៕
Tag:
អាដហុក
គជប
© រក្សាសិទ្ធិដោយ thmeythmey.com
