សភាបន្ថែមខ្លឹមសារថ្មី៣ចំណុចទៀត ដែលហាមអ្នកទោសធ្វើសកម្មភាពជាមួយបក្សនយោបាយ

ជាតិ

សភាបន្ថែមខ្លឹមសារថ្មី៣ចំណុចទៀត ដែលហាមអ្នកទោសធ្វើសកម្មភាពជាមួយបក្សនយោបាយ

06, Jul 2017 , 10:59 am

រូបភាព

ដោយ: ម៉ៅ សុផា

ភ្នំពេញ៖ នៅព្រឹកថ្ងៃទី៦ កក្កដានេះ គណកម្មាធិការអចិន្ត្រៃយ៍រដ្ឋសភា បានសម្រេចទទួលយកសំណើរបន្ថែមខ្លឹមសារថ្មីចូលទៅក្នុងច្បាប់ ស្តីពីគណបក្សនយោបាយ របស់តំណាងរាស្ត្រគណបក្សប្រជាជនកម្ពុជា។ រដ្ឋសភានឹងបើកកិច្ចប្រជុំពេញ ដើម្បីត្រួតពិនិត្យ និងអនុម័តលើខ្លឹមសារច្បាប់នេះ នៅថ្ងៃទី១០ កក្កដា។

ខ្លឹមសារថ្មី ដែលខាងគណបក្សប្រជាជនកម្ពុជា ស្នើសុំវិសោធនកម្មច្បាប់ស្តីពីគណបក្សនយោបាយនោះ មានបន្ថែម៣ចំណុចទៀត ត្រង់មាត្រា៦ ដែលមានចំណុច៥ហើយនោះ រួមមាន៖ ទី១ គណបក្សនយោបាយមិនត្រូវធ្វើសកម្មភាពប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួន ។ ទី២ មិនត្រូវយល់ព្រមដោយចំហរ ឬដោយតីណ្ហភាព ឬឃុបឃិតជាមួយទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ឲ្យធ្វើសកម្មភាពណាមួយ ដើម្បីជាផលប្រយោជន៍នយោបាយសម្រាប់គណបក្សរបស់ខ្លួន និងទី៣ មិនត្រូវគាំទ្រ ឬរៀបចំផែនការ ឬឃុបឃិតជាមួយរាល់បុគ្គល ដែលធ្វើសកម្មភាពក្នុងគោលបំណងប្រឆាំងនិងផលប្រយោជន៍របស់ព្រះរាជាណាចក្រកម្ពុជា ដូចមានចែងពីចំនុចទី១ ដល់ចំណុចទី៥ខាងលើឡើយ។

សម្រាប់ទោសទណ្ឌដល់គណបក្សនយោបាយ ដែលបានប្រព្រឹត្តផ្ទុយពីច្បាប់នេះ ត្រូវបានចែងនៅក្នុងមាត្រា៤៤ថ្មី (ពីរ) ចែងថា ដោយមិនទាន់គិតពីទោសព្រហ្មទណ្ឌផ្សេងទៀត គណបក្សនយោបាយដែលប្រព្រឹត្តល្មើសនឹងមាត្រា៦ថ្មី (ពីរ)នៃច្បាប់នេះ និងមាត្រា៧ នៃច្បាប់ស្តីពីគណបក្សនយោបាយ តុលាការអាចសម្រេច ផ្អាកសកម្មភាពគណបក្សនយោបាយនោះ មិនលើសពី៥ឆ្នាំ ឫអាចរំលាយគណបក្សនោះ។

ត្រង់ចំណុចនេះគណបក្សសង្គ្រោះជាតិ មិនគាំទ្រចំពោះខ្លឹមសារថ្មីបន្ថែមក្នុងច្បាប់ស្តីពីគណបក្សនយោបាយនេះឡើយ ដោយពួកគេចាត់ទុកថាខ្លឹមសារថ្មីនេះ រឹតតែដាក់កំហិតរិតត្បិតសិទ្ធិសេរីភាពគណបក្សនយោបាយ។

សូមបញ្ជាក់ថា នៅដើមឆ្នាំ២០១៧នេះ សម្តេច ហ៊ុន សែន បានស្នើឲ្យរដ្ឋសភា កែប្រែច្បាប់ស្តីពីគណបក្សនយោបាយម្តងរួចទៅហើយ ដោយមិនអនុញ្ញាតឲ្យអ្នកទោស ធ្វើជាប្រធានគណបក្ស ឬក៏ជាសមាជិកគណៈកម្មាធិការនាយកក្នុងគណបក្សណាមួយ៕