កម្ពុជានៅតែមិនអាចប្រើប្រាស់«លុយរៀល»តែមួយ បាននៅឡើយ

បទយកការណ៍ / បទសម្ភាសន៍

យ៉ានតាមដងផ្លូវ

កម្ពុជានៅតែមិនអាចប្រើប្រាស់«លុយរៀល»តែមួយ បាននៅឡើយ

06, Jul 2017 , 11:43 am

រូបភាព

ដោយ: នាយយ៉ាន

អ្នកចាយនិយាយថា អ្នកលក់ដាក់តម្លៃជាដុល្លារ។ អ្នកលក់និយាយថា អ្នកចាយតែងចាយជាដុល្លារ។ ចម្លើយដែលបង្ហាញពីការបន្ទោសគ្នាបានកើតឡើងភ្លាមនៅពេលដែលគេសួរថា ហេតុអ្វីមិនរូបិយវត្ថុជាតិ «លុយរៀល»? រដ្ឋាភិបាលឯណោះវិញបានពន្យល់ថា ខ្លួនបានដាក់វិធានការជាច្រើន រាប់ទាំងការឃោសនាជំរុញការប្រើប្រាស់រូបិយវត្ថុជាតិ និងការបើប្រាក់បៀវត្សរ៍ជូនមន្ត្រីរាជការជាប្រាក់រៀលផង ប៉ុន្តែវប្បធម៌នៃការចាយរូបិយបណ្ណបរទេស ពិសេស«ដុល្លារអាមេរិក» បានចាក់ឬសជ្រៅហោប៉ៅពលរដ្ឋខ្មែររួចទៅហើយ។ នេះជាប្រធានបទនៃបទសម្ភាសរបស់នាយ យ៉ាន និងអ្នកស្រី ជា សិរី អគ្គនាយកបច្ចេកទេសនៃធនាគារជាតិកម្ពុជា។

សូមលោកអ្នកស្តាប់បទសម្ភាសរវាងនាយ យ៉ាន និងអ្នកស្រី ជា សិរី អគ្គនាយកបច្ចេកទេសនៃធនាគារជាតិកម្ពុជា៖

កម្ពុជាត្រូវបានស្តីបន្ទោសដោយក្រុមអ្នកជំនាញសេដ្ឋកិច្ចខ្លះអំពីសេរីភាពនៃការប្រើប្រាស់រូបិយបណ្ណបរទេសនៅក្នុងជីវភាពប្រចាំថ្ងៃរបស់ពលរដ្ឋ។ តាំងពីសម័យអន្តរកាលក្នុងដើមទសវត្សរ៍១៩៩០ ដែលពេលនោះកម្ពុជាត្រូវទទួលសហគមន៍អង្គការសហប្រជាជាតិ (អ៊ុនតាក់) ដើម្បីរៀបចំប្រទេសតាមរបបប្រជាធិបតេយ្យ រូបិយបណ្ណអាមេរិក គឺដុល្លារ បានចូលមកក្នុងហៅប៉ៅពលរដ្ឋខ្មែរ។ តាំងពីពេលនោះមក ពលរដ្ឋខ្មែរក៏មានទំនុកចិត្តលើរូបិយណ្ណបរទេស ហើយមិនជឿជាក់លើ លុយរៀល របស់ជាតិខ្លួនទៀតឡើយ។ រហូតដល់សព្វថ្ងៃនេះ នៅក្នុងបណ្តាខេត្តដែលមានព្រំដែនជាប់ប្រទេសថៃ ពលរដ្ឋខ្មែរក៏ប្រើប្រាស់ «ប្រាក់បាត» របស់ប្រទេសថៃ ហើយអ្នកដែលរស់នៅក្បែរព្រំដែនវៀតណាម ក៏មិនខ្លាចនឹងដាក់ «ប្រាក់ដុង» របស់វៀតណាមក្នុងហៅប៉ៅដែរ។ ហើយបើនៅតាមរមណីយដ្ឋានទេសចរណ៍ទៀតនោះ រួមទាំងនៅទីផ្សារកណ្តាលរាជធានីភ្នំពេញផង អ្នកទេសចរថៃ និងវៀតណាម ក៏អាចប្រើប្រាស់រូបិយវត្ថុជាតិរបស់ពួកគេជាមួយអាជីវករខ្មែរ បានខ្លះៗដែរ។

ជាច្រើនឆ្នាំមកហើយ រដ្ឋាភិបាល តាមរយៈធនាគារជាតិ ធ្លាប់បានធ្វើយុទ្ធនាការច្រើនលើកច្រើនសារដើម្បីជំរុញឲ្យពលរដ្ឋខ្មែរឲ្យងាកមកប្រើប្រាស់រូបិយវត្ថុជាតិ «ប្រាក់រៀល»តែមួយ ដើម្បីមោទនភាពជាតិផង និងដើម្បីជួយរួមចំណែកក្នុងសេដ្ឋកិច្ចជាតិផង។ ប៉ុន្តែឥតប្រយោជន៍៕