ជាតិ
សេដ្ឋកិច្ច
លោកប៉ាន សូរស័ក្តិ ក្នុងជំនួបជាមួយប្រភិភូចិន និងជប៉ុន (រូបភាពពីហ្វេសប៊ុកក្រសួងពាណិជ្ជកម្ម)
×![]()
ដោយ: ថ្មីៗ
វិនិយោគិនជប៉ុនមួយក្រុម គ្រោងបើករោងចក្រកែច្នៃឈើនៅកម្ពុជា ដោយប្រើវត្ថុធាតុដើមពីកំទិចឈើ សំបកដូងប្រេង និងរុក្ខជាតិដទៃទៀត។ បើតាមក្រុមអ្នកវិនិយោគជប៉ុន ពួកគេ កំពុងសិក្សាទីតាំងក្នុងខេត្តព្រះសីហនុ និងគ្រោងសាងសង់នៅពេលខាងមុខ។ 
វិនិយោគិនជប៉ុនមួយក្រុម មានបំណងបើករោងចក្រកែឆ្នៃឈើ ដោយប្រើវត្ថុធាតុដើមពីកំទិចឈើ សំបកដូងប្រេង និងរុក្ខជាតិដទៃទៀត ដើម្បីនាំចេញទៅជប៉ុន សម្រាប់ដុតនៅក្នុងរោងចក្រអគ្គិសនី Biomass។ បើតាមទំព័រហ្វេសប៊ុកក្រសួងពាណិជ្ជកម្ម បំណងនេះ ត្រូវបានបញ្ជាក់នៅក្នុងជំនួបសម្ដែងការគួរសម និងពិភាក្សាការងារវិនិយោគ រវាង លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មជាមួយប្រតិភូចិន និងជប៉ុន ដែលដឹកនាំដោយ លោក ហ្ចាក់គី សែចិន កាលពីថ្ងៃទី៥ ខែកក្កដាកន្លងទៅ។ នេះបើតាមទំព័រហ្វេសប៊ុកក្រសួងពាណិជ្ជកម្ម។ ក្នុងជំនួបនោះវិនិយោគិនជប៉ុន បញ្ជាក់ថាក្រុមខ្លួនកំពុងសិក្សាទីតាំងនៅខេត្តព្រះសីហនុ ហើយនឹងចាប់ផ្ដើមសាងសង់នៅពេលខាងមុខ។
លោករដ្ឋមន្ត្រីក្រសួងពាណិជ្ជកម្មកម្ពុជា បានស្វាគមន៍ចំពោះគម្រោងបើករោងចក្រកែច្នេះឈើនេះ។ លោក ប៉ាន សូរស័ក្តិ បញ្ជាក់ថានេះជាគំនិតដ៏ល្អមួយ ខណៈកម្ពុជាមានកំទិចឈើ និងកំទិចរុក្ខជាតិដទៃទៀតជាច្រើន ដែលមិនបានយកមកប្រើឲ្យមានប្រយោជន៍។ លោក ប៉ាន សូរស័ក្ត បានណែនាំឲ្យវិនិយោគិនជប៉ុនសិក្សាពីការដាំចម្ការដើមឈើដែរ ដើម្បីគាំទ្រដល់ផលិតកម្មរបស់រោងចក្រប្រកបដោយចីរភាព។ នេះបើតាមហ្វេសប៊ុកក្រសួងពាណិជ្ជកម្មដដែល។
ក្នុងជំនួបនេះ លោក ហ្ចាក់គី សែចិន ដែលដឹកនាំប្រតិភូចិន និងជប៉ុននោះ ក៏បានប្រាប់លោករដ្ឋមន្ត្រីក្រសួងពាណិជ្ជកម្មដែរថា មជ្ឍមណ្ឌលពាណិជ្ជកម្មកម្ពុជានៅទីក្រុងស៊ីអាន(Xi’an) ខេត្តសានស៊ី (Shaanxi) ប្រទេសចិន កំពុងតែប្រព្រឹត្តទៅយ៉ាងសកម្ម ពិសេសការដាក់តាំងលក់ផលិតផលកម្ពុជា ដល់អតិថិជនចិន។ បើតាម លោក ហ្ចាក់គី សែចិន មជ្ឈមណ្ឌលបានវេចខ្ចប់អង្ករចំនួន៥ពាន់តោន ដែលទិញពីកម្ពុជា ដោយមិនបង់ពន្ធនោះ ទៅជាកញ្ចប់តូចៗ ដាក់លក់រាយ នៅតំបន់ពាណិជ្ជកម្មសេរីនៅខេត្តសានស៊ី។ ជាមួយគ្នានេះ ថ្មីៗនេះ កម្ពុជា និងខេត្តសានស៊ី បានចុះហត្ថលេខាលើអនុស្សរណៈយោគយល់គ្នាមួយ ដើម្បីទិញកៅស៊ូកម្ពុជាចំនួន៣០ម៉ឺនតោន ដែលរំពឹងថានឹងចាប់ផ្ដើមនាំចូលលើកដំបូងក្នុងឆ្នាំ២០១៨ខាងមុខ៕
Tag:
រោងចក្រច្នៃឈើ
វិនិយោគិនជប៉ុន
ព្រះសីហនុ
© រក្សាសិទ្ធិដោយ thmeythmey.com
