កីឡាជាតិ
ជាតិ
លោក នាង ស៊ីវុត្ថា ប្តេជ្ញាបណ្តេញកីឡាករចេញពីសង្វៀនបើវាយមិនអស់ពីសមត្ថភាព
× អ្នកគ្រប់គ្រងកម្មវិធីកីឡារបស់ស្ថានីយទូរទស្សន៍បាយ័យលោក នាង ស៊ីវុត្ថា បានអះអាងថា នឹងបណ្តេញកីឡាករចេញសង្វៀនប្រកួតបើរកឃើញវាយមិនអស់ពីសមត្ថភាព។ ការប្រកាសបែបនេះ ធ្វើឡើងនាសន្និសីទសារព័ត៌មានបើកការប្រកួតដណ្តើមខ្សែក្រវាត់ស្រាបៀរលីអូទម្ងន់៦៣.៥គីឡូកាមរដូវកាលទី៦កាលពីល្ងាចថ្ងៃទី៩ ខែកក្កដា ឆ្នាំ២០១៧។
លោក នាង ស៊ីវុត្ថា ប្រធានគ្រប់គ្រង់កម្មវិធីកីឡារបស់ស្ថានីយទូរទស្សន៍បាយ័យបានប្តេជ្ញាថា នឹងមិនអនុញ្ញាតឲ្យកីឡាករដែលវាយមិនអស់ពីសមត្ថភាពមានវត្តមាននៅលើសង្វៀនប្រដាល់របស់បាយ័ននោះឡើយ។ លោក បានអះអាងថា ប្រសិនបើមានបញ្ហាអសកម្ម ឬភាពមិនប្រក្រតីកើតឡើងក្នុងអំឡុងពេលប្រកួតនឹងបណ្តេញចុះពីសង្វៀនប្រកួតតែម្តង។
ការប្រកាសបែបនេះដោយសារ លោក មិនចង់ឲ្យមានការរិះគន់ពីមហាជនមកលើកម្មវិធីប្រដាល់របស់លោកពាក់ព័ន្ធនឹងការវាយមិនអស់ពីសមត្ថភាពនេះ ព្រោះកន្លងមកមានការរិះគន់ពីមហាជនពាក់ព័ន្ធនឹងបញ្ហានេះ។ ម្យ៉ាងទៀត ដើម្បីបំពេញទឹកចិត្តរបស់អ្នកគាំទ្រដែលបានចំណាយពេលវេលាមកទស្សនាការប្រកួតផ្ទាល់នៅសង្វៀនបាយ័នបឹងស្នោរ។
ជាមួយគ្នានេះ លោក នាង ស៊ីវុត្ថា បានជំរុញឲ្យកីឡាករទាំង៨រូបដែលដាក់ឲ្យប្រកួតប្រជែងដណ្តើមខ្សែក្រវាត់ស្រាបៀរលីអូរដូវកាលទី៦វាយឲ្យអស់ពីសមត្ថភាពទោះបីជួបជាមួយកីឡាកររួមជាតិក៏ដោយ។ លោកថា ការវាយឲ្យអស់ពីសមត្ថភាពវាជាការឲ្យតម្លៃសម្រាប់ខ្លួនឯងមួយដ៏ប្រសើរក្នុងនាមជាអ្នកហាត់ក្បាច់គុន ហើយមហាជនក៏ឲ្យតម្លៃទៅតាមនឹងដែរ។
ពាក់ព័ន្ធនឹងបញ្ហានេះ លោក នាង ស៊ីវុត្ថា បានស្នើឲ្យប្រធានសហព័ន្ធកីឡាប្រដាល់គុនខ្មែរលោក តែម ម៉ឺន ចាត់វិធានការឲ្យបានម៉ឺងម៉ាត់ចំពោះកីឡាករ ចៅក្រម អាជ្ញាកណ្តាលដែលប្រព្រឹត្តអំពើមិនប្រក្រតីនេះឡើង។ ជាមួយគ្នានេះ លោក តែម ម៉ឺន ក៏បានជំរុញឲ្យកីឡាករប្រឹងប្រែងប្រកួតឲ្យអស់ពីសមត្ថភាព ជាពិសេសជំរុញឲ្យអាជ្ញាកណ្តាល ចៅក្រម កាត់ក្តីដោយប្រកាន់គោលការណ៍ត្រឹមត្រូវ និងយុត្តិធម៌មិនត្រូវលម្អៀងទៅរកភាគីណាមួយនោះឡើយ។
កីឡាករទាំង៨ដាក់ឲ្យចូលរួមប្រកួតប្រជែងលើកនេះរួមមានកីឡាករ ចាន់ រតនា, ឆៃ សារ៉ា, មុត ខ្លឹមខ្មៅ, សេក គឹមរួន, Kaophong Chaiphum(ថៃ), Wifi Lukmuengpetch(ថៃ), Namphol Petchchinda(ឡាវ) និងកីឡាករ Farsang Site Arthapi(ឡាវ)។
នាការប្រកួតបើកឆាកពីល្ងាចថ្ងៃទី៩ កក្កដា កីឡាករ មុត ខ្លឹមខ្មៅ បានផ្តូលកីឡាករថៃ Kaophong Chaiphum ឲ្យសន្លប់ក្នុងទឹកទី៤ ខណៈកីឡាករ ចាន់ រតនា បានប្រើក្បាច់នាគវ័ដកន្ទុយផ្តួលកីឡាករថៃ វៃ ហ្វៃ ឲ្យសន្លប់ក្នុងទឹកទី២ រីឯកីឡាករ សេក គឹមរួន បានផ្តួលកីឡាករឡាវ Farsang Site Arthapi ឲ្យសន្លប់ក្នុងទឹកទី៣។ ចំណែកកីឡាករ ឆៃ សារ៉ា បានប្រកួតចាញ់កីឡាករឡាវ Namphol Petchchinda ដោយពិន្ទុ៕
Tag:
ប្រដាល់
នាង ស៊ីវុត្ថា
© រក្សាសិទ្ធិដោយ thmeythmey.com