ជាតិ
សង្គមជាតិ
ក្រសួងមហាផ្ទៃ ប្រាប់ឲ្យសមាគម និងNGOs ផ្តល់របាយការណ៍ហិរញ្ញវត្ថុមកក្រសួង មុនដំណាច់ខែកញ្ញា
×![]()
ភ្នំពេញ៖ ក្រសួងមហាផ្ទៃ បានបង្គាប់ឲ្យសមាគម និងអង្គការក្រៅរដ្ឋាភិបាល ត្រូវផ្ញើរបាយការណ៍សកម្មភាព និងរបាយការណ៍ហិរញ្ញវត្ថុប្រចាំឆ្នាំ២០១៦ មកក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ឲ្យបានមុនដំណាច់ខែកញ្ញា ឆ្នាំ២០១៧។ ក្រសួងមហាផ្ទៃ បានព្រមានថា ករណីដែលសមាគម និងអង្គការក្រៅរដ្ឋាភិបាលក្នុងស្រុកណាមិនធ្វើតាម នឹងចាត់វិធានការតាមច្បាប់ស្តីពីសមាគម និងអង្គការក្រៅរដ្ឋាភិបាល។
បន្ទាប់ពីច្បាប់ស្តីពីសមាគម និងអង្គការមិនមែនរដ្ឋាភិបាល បានចូលជាធរមានកាលពីឆ្នាំ២០១៥ ក្រសួងមហាផ្ទៃ តែងតែសេចក្តីជូនដំណឹង ដើម្បីដាស់តឿនសមាគម និងអង្គការមិនមែនរដ្ឋាភិបាល ឲ្យប្រញាប់យករបាយការណ៍សកម្មភាព និងហិរញ្ញវត្ថុរបស់ខ្លួន ជូនក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ដើម្បីត្រួតពិនិត្យតាមច្បាប់ខាងលើ។
ការដាស់តឿនរបស់ក្រសួងមហាផ្ទៃនេះ ធ្វើឡើងក្រោយពីក្រសួងបានកត់សម្គាល់ឃើញថា សមាគម និងអង្គការក្នុងស្រុកមួយចំនួន ដែលបានចុះបញ្ជី និងតម្គល់បញ្ជីនៅក្រសួង បានយកចិត្តទុកដាក់អនុវត្តតាមច្បាប់ស្តីពីសមាគម និងអង្គការមិនមែនរដ្ឋាភិបាល។ ប៉ុន្តែសមាគម និងអង្គការក្រៅរដ្ឋាភិបាលដទៃទៀត មិនបានយកចិត្តទុកដាក់លើមាត្រាច្បាប់ខាងលើនេះនៅឡើយទេ។
សេចក្តីជូនដំណឹងរបស់ក្រសួងមហាផ្ទៃចុះថ្ងៃទី៤ ខែកក្កដា ដែលទើបត្រូវបានផ្សព្វផ្សាយជាសាធារណៈ ក៏បានបង្គាប់ឲ្យសមាគម និងអង្គការក្រៅរដ្ឋាភិបាល ត្រូវផ្ញើរបាយការណ៍សកម្មភាព និងរបាយការណ៍ហិរញ្ញវត្ថុប្រចាំឆ្នាំ២០១៦ មកក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ស្របតាមមាត្រា១០ ច្បាប់ស្តីពីសមាគម និងអង្គការមិនមែនរដ្ឋាភិបាល ឲ្យបានមុនដំណាច់ខែកញ្ញាឆ្នាំ២០១៧ ដោយព្រមានចាត់វិធានការតាមផ្លូវច្បាប់ ករណីសមាគម និងអង្គការក្រៅរដ្ឋាភិបាលក្នុងស្រុកណាមួយ មិនគោរពតាមច្បាប់ខាងលើនេះ។
គួររម្លឹកថា កន្លងមក សមាគម និងអង្គការក្រៅរដ្ឋាភិបាល បានតវ៉ាប្រឆាំងច្បាប់នេះ ដោយពួកគេអះអាងថា ច្បាប់នេះ នឹងរឹតត្បិតសិទ្ធិសេរីភាពរបស់សមាគម និងអង្គការមិនមែនរដ្ឋាភិបាល៕
Tag:
NGOs
ហិរញ្ញវត្ថុ
© រក្សាសិទ្ធិដោយ thmeythmey.com
