ជាតិ
សង្គមជាតិ
កូនប្រុសបណ្ឌិត ច័ន្ទ សំណព្វ ជាប់អាហារូបករណ៍អនុបណ្ឌិតច្បាប់១០០% នៅអាមេរិក រូបលោក ច័ន្ទ យុត្តរាជ ពីហ្វេសប៊ុកលោក ច័ន្ទ សំណព្វ
× ភ្នំពេញ៖ លោក ច័ន្ទ យុត្តរាជ កូនប្រុសរបស់លោកបណ្ឌិត ច័ន្ទ សំណព្វ ទើបតែឡើងយន្តហោះទៅបន្តការសិក្សានៅទឹកដីអាមេរិក ដោយទទួលអាហារូបករណ៍ផ្នែកច្បាប់១០០ភាគរយពីសាកលវិទ្យាល័យអារីសូណា។
លោកបណ្ឌិត ច័ន្ទ សំណព្វ ប្រធានក្រុមប្រឹក្សាជាតិភាសាខ្មែរ និងជាអនុប្រធានរាជបណ្ឌិត្យសភាកម្ពុជានៃទីស្តីការគណៈរដ្ឋមន្ត្រី បានបញ្ជាក់ប្រាប់សារព័ត៌មានថ្មីៗតាមទូរស័ព្ទថា កូនប្រុសរបស់លោក ទទួលបានអាហារូបករណ៍អនុបណ្ឌិតច្បាប់១០០ភាគរយពីសាកលវិទ្យាល័យអារីសូណានៃសហរដ្ឋអាមេរិក។
លោកបញ្ជាក់ថា៖ «មាននិស្សិតកម្ពុជា២នាក់ បានជាប់អាហារូបករណ៍នេះ កូនខ្ញុំជាប់១០០ភាគរយ ចំណែកនិស្សិតម្នាក់ទៀត បានជាប់៥០ភាគរយ។ អាហារូបករណ៍នេះ គេផ្តល់ទាំងថ្លៃសាលា និងថវិកាសម្រាប់ការរស់នៅ»។
លោកបណ្ឌិត ច័ន្ទ សំណព្វ មានកូន២នាក់ គឺប្រុសម្នាក់ និងស្រីម្នាក់។ នេះបើតាមការបញ្ជាក់របស់គាត់ ដោយបន្តថា កន្លងមក កូនប្រុសច្បងវ័យ២១ឆ្នាំរបស់លោក បានរៀនបរិញ្ញាបត្រជំនាញផ្នែកច្បាប់ នៅសាកលវិទ្យាល័យអាមេរិចកាំងភ្នំពេញ(AUPP)។ ក្រោយបញ្ចប់បរិញ្ញាបត្រ កូនរបស់លោកក៏ទទួលបានអាហារូបករណ៍១០០ភាគរយទៅសិក្សាយកអនុបណ្ឌិតច្បាប់នៅអាមេរិក។
បណ្ឌិតអក្សរសាស្ត្រខ្មែររូបនេះ បានផ្តល់សិទ្ធិឲ្យកូនជ្រើសរើសមុខវិជ្ជាដែលពួកគេពេញចិត្ត ដោយមិនបង្ខំកូនឲ្យរៀនតាមឪពុកម្តាយឡើយ។ ម្យ៉ាងលោកថា កូនប្រុសរបស់លោករៀនពូកែផ្នែកច្បាប់នេះ តាំងពីតូចមកម្ល៉េះ។
លោកនិយាយថា៖«ខ្ញុំមិនដែលបង្ខំកូនទេ គេពេញចិត្តអី ឲ្យគេរៀនជំនាញហ្នឹងទៅ ខ្ញុំគ្រាន់តែជួយ ឲ្យយោបល់ និងតម្រង់ទិសប៉ុណ្ណោះ»៕
Tag:
ច័ន្ទ សំណព្វ
អាហារូបករណ៍
© រក្សាសិទ្ធិដោយ thmeythmey.com