សង្គមស៊ីវិល បន្តទាមទារឲ្យពលករនៅក្រៅប្រទេស បានចុះឈ្មោះបោះឆ្នោត

ជាតិ

សង្គមស៊ីវិល បន្តទាមទារឲ្យពលករនៅក្រៅប្រទេស បានចុះឈ្មោះបោះឆ្នោត

20, Jul 2017 , 8:39 am

រូបភាព

ដោយ: ថ្មីៗ

ភ្នំពេញ៖ ក្រុមសង្គមស៊ីវិល នៅតែចង់ឲ្យ គ.ជ.ប និងរដ្ឋាភិបាល ធ្វើយ៉ាងណា ដើម្បីឲ្យពលរដ្ឋកម្ពុជា ដែលកំពុងធ្វើការ និងរស់នៅឯបរទេស បានចុះឈ្មោះនិងបោះឆ្នោត ដូចប្រជាពលរដ្ឋទូទៅក្នុងប្រទេសកម្ពុជាដែរ។ ជាការឆ្លើយតប គ.ជ.ប នឹងយកសំណើនេះទៅពិចារណា។

ក្រុមសង្គមស៊ីវិល បានរៀបចំកិច្ចពិភាក្សាតុមូលស្តីពី «អនុសាសន៍សម្រាប់ការធ្វើបច្ចុប្បន្នភាពបញ្ជីបោះឆ្នោតនិងការចុះឈ្មោះបោះឆ្នោត ឆ្នាំ២0១៧» នៅថ្ងៃទី១៩ ខែកក្កដា ឆ្នាំ២0១៨។ ក្រៅពីសង្គមស៊ីវិល តំណាងគណបក្សនយោបាយនានា និងតំណាងគណៈកម្មាធិការជាតិរៀបចំការបោះឆ្នោយត (គ.ជ.ប) ក៏បានចូលរួមក្នុងកិច្ចពិភាក្សានេះដែរ។

នៅក្នុងកិច្ចពិភាក្សា ក្រុមសង្គមស៊ីវិល បានបញ្ចេញមតិជាច្រើន ទាក់ទងនឹងការរៀបចំបញ្ជីនិងការចុះឈ្មោះបោះឆ្នោត សម្រាប់ការបោះឆ្នោតថ្នាក់ជាតិ នាអាណត្តិទី៦ ក្នុងឆ្នាំ២0១៨ ខាងមុខ។ ក្រុមសង្គមស៊ីវិល ក៏បានទាមទារឲ្យគ.ជ.ប និងរដ្ឋាភិបាល គិតគូរពីពលរដ្ឋកម្ពុជា ដែលចំណាក់ស្រុក ទៅធ្វើការនៅឯបរទេស បានចុះឈ្មោះបោះឆ្នោតផងដែរ។

លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និកហ្វិក) យល់ថា ប្រសិនបើរដ្ឋាភិបាល និងគ.ជ.ប មានឆន្ទៈរួមគ្នា កម្ពុជា ពិតជាអាចរៀបចំឲ្យប្រជាពលរដ្ឋ ដែលកំពុងរស់នៅនិងធ្វើការនៅក្រៅប្រទេស បានចុះឈ្មោះបោះឆ្នោត។ លោក មើលឃើញថា ថវិកានិងបច្ចេកទេស មិនមែនជាឧបសគ្គសម្រាប់គ.ជ.ប និងរដ្ឋាភិបាល ក្នុងការរៀបចំឲ្យពលរដ្ឋនៅក្រៅប្រទេស បានចុះឈ្មោះបោះឆ្នោត នោះទេ។

ប្រធានអង្គការនិកហ្វិករូបនេះ និយាយដូច្នេះថា៖«សូមពិចារណ ពីពលករនៅក្រៅប្រទេស ឲ្យមានលទ្ធភាពចុះឈ្មោះបោះឆ្នោតផង។ ខ្ញុំមើលទៅ យើងដូចមិនអស់ថវិកាប៉ុន្មានទេ។ ប្រទេសច្រើនណាស់នៅអាស៊ី ដែលពលរដ្ឋគេ អាចទៅចុះឈ្មោះនិងបោះឆ្នោតនៅតាមស្ថានទូតរបស់គេ។ អ៊ីចឹង ក្រុមការងារចុះឈ្មោះបោះឆ្នោតរបស់យើង រៀបចំឲ្យពួកគាត់ ទៅចុះឈ្មោះនៅស្ថាតទូតខ្មែរ នៅតាមប្រទេសហ្នឹងទៅ។ បោះឆ្នោតហើយ បញ្ជូនហិបឆ្នោតមក ស្រុកខ្មែរ ហើយមករាប់នៅហ្នឹង ក៏បាន។ អត់មានអ្វីពិបាកទេ។ បញ្ហាបច្ចេកទេស ខ្ញុំមើលទៅដូចអត់ចំណាយថវិកាច្រើនទេ។ ខ្ញុំ ខ្លាចតែបញ្ហាឆន្ទៈនយោបាយ ដែលធ្វើអត់កើត»។

ចំណែក លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ក៏យល់ដូចលោក សំ គន្ធាមី ដែរ ជុំវិញការលើកឡើងខាងលើ។ លោក មឿន តុលា ចង់ឲ្យរដ្ឋាភិបាលនិងគ.ជ.ប រៀបចំការិយាល័យចុះឈ្មោះបោះឆ្នោត តាមស្ថានទូតឬស្ថានអគ្គកុងស៊ុល នៅក្នុងប្រទេសនានា។ លោក លើកឡើងថា វា ជាមធ្យោបាយដ៏ល្អមួយ ដែលអាចជួយឲ្យពលរដ្ឋកម្ពុជា ដែលកំពុងរស់នៅនិងធ្វើការក្នុងប្រទេសទាំងនោះ អាចចុះឈ្មោះ និងបោះឆ្នោតបាន។

ម្យ៉ាងទៀត លោក មឿន តុលា ក៏ស្នើឲ្យរដ្ឋាភិបាលនិងគ.ជ.ប រៀបចំការិយាល័យចុះឈ្មោះបោះឆ្នោត នៅតាមព្រំដែនរវាងប្រទេសកម្ពុជានិងប្រទេសជិតខាងផងដែរ ជាពិសេសគឺប្រទេសថៃតែម្តង។ លោក អះអាងថា ប្រជាពលរដ្ឋកម្ពុជា ដែលកំពុងរស់នៅនិងធ្វើការក្នុងប្រទេសថៃ មានចំនួនជាង១លាននាក់ឯណោះ ដូច្នេះប្រិសនបើរដ្ឋាភិបាល និងគ.ជ.ប រៀបចំឲ្យមានការិយាល័យនៅជិតព្រំដែនកម្ពុជា-ថៃ នឹងអាចជួយឲ្យប្រជាពលរដ្ឋកម្ពុជាទាំងនោះ អាចមកចុះឈ្មោះបោះឆ្នោតបាន។

ប្រធានសង់ត្រាល់រូបនេះ និយាយដូច្នេះថា៖«ប្រទេសយើងកន្លងមក អត់បានលើកសំណើជាផ្លូវការ។ ហើយខ្ញុំគិតថា សំណើជាផ្លូវហ្នឹង គឺធ្វើតាមរយៈក្រសួងការបរទេស។ ប្រទេសផ្សេងៗ ដូចជា ប្រទេសថៃជាដើម ធ្លាប់ឲ្យខ្មែរយើង មានឱកាសដើម្បីមកចុះឈ្មោះបោះឆ្នោត បើមានការស្នើសុំជាផ្លូវការពីរដ្ឋាភិបាលខ្មែរយើង។ ប៉ុន្តែយើងអត់បានស្នើជាផ្លូវការទេ»។
លោក ឌី ភីរុណ អនុប្រធានលេខាធិការដ្ឋាន នៃអគ្គលេខាធិការដ្ឋាន គ.ជ.ប បានឆ្លើយតបថា លោក នឹងសរសេររបាយការណ៍ ទាក់ទងនឹងសំណើរបស់ក្រុមសង្គមស៊ីវិលខាងលើ យកទៅដាក់ជូនគ.ជ.ប ដើម្បីពិចារណា។ យ៉ាងណាក៏ដោយ លោក បានសង្កត់ធ្ងន់ថា គ.ជ.ប អនុវត្តអ្វី ដែលច្បាប់បានចែង។

បើតាមលោក ឌី ភីរុណ គ.ជ.ប មិនអាចអ្វីឲ្យហួសពីព្រំដែននៃច្បាប់នោះទេ។ មន្ត្រីគ.ជ.ប រូបនេះ បញ្ជាក់ថា៖«សំណើរបស់សង្គមស៊ីវិលមួយចំនួន គឺទាក់ទងនឹងផ្លូវច្បាប់។ ទាក់ទងនឹងការរៀបចំឲ្យពលករនៅក្រៅស្រុក បានចុះឈ្មោះបោះឆ្នោត គឺទិដ្ឋភាពច្បាប់បោះឆ្នោតរបស់យើង មិនទាន់មានទេ»។

កន្លងមក ក្រុមសង្គមស៊ីវិល ក៏ធ្លាប់ទាមទារដែរ ជុំវិញការរៀបចំឲ្យមានការិយល័យបោះឆ្នោត នៅតាមស្ថានទូតនានានៅឯក្រៅប្រទេស ដើម្បីឲ្យប្រជាពលរដ្ឋនៅទីនោះ អាចចុះឈ្មោះនិងបោះឆ្នោត។ ប៉ុន្តែ សម្រាប់គ.ជ.ប ប្រទេសកម្ពុជា មិនទាន់មានលទ្ធភាពគ្រប់គ្រាន់ ដើម្បីរៀបចំបែបនេះឡើយ។ លើសពីនេះ ច្បាប់បោះឆ្នោតនៅកម្ពុជា ក៏មិនទាន់មានចែងដែរ ពាក់ព័ន្ធនឹងការរៀបចំការិយាល័យបោះឆ្នោត នៅតាមស្ថានទូត នៅក្រៅប្រទេស៕