អន្តរជាតិ
ប្រជាប្រិយភាពលោក ឌូទើតេ កើនឡើង ទោះជារងការចោទប្រកាន់រឿងបំពានសិទិ្ធមនុស្ស
× ប្រជាប្រិយភាពរបស់លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅតែកើនឡើង បើទោះជាការបង្ក្រាបចលនាក្រុមសកម្មប្រយុទ្ធបណ្ដាញរបស់ក្រុមភេរវជនដែស្ហ(Daesh) នៅបន្តនៅក្រុង Marawi ហើយលោកនៅរងការចោទប្រកាន់រឿងរំលោភសិទិ្ធមនុស្សក៏ដោយ។
យោងតាមការស្ទង់មតិរបស់ក្រុមហ៊ុនស្រាវជ្រាវ Pulse Asia ការគាំទ្រប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ បានកើនឡើងពី ៧៨ ដល់ ៨២ ភាគរយគិតចាប់ពីខែមីនាមកនោះ។
ក្រុមហ៊ុនស្រាវជ្រាវ Pulse Asia បានសាកសួរយុវជន១២០០នាក់ដែលជាផ្នែកមួយនៃការស្ទង់មតិ Ulat ng Bayan’បានបង្ហាញថា ការជឿទុកចិត្តលើប្រធានាធិបតីមានកម្រិតខ្ពស់បំផុតមួយរហូតដល់ ៨១ភាគរយ ឯណោះ។
តាមរបាយការណ៍ស្ទង់មតិដដែល លោកឌូទើតេ ទទួលបានការជឿទុកចិត្តខ្ពស់ពីគ្រប់ភូមិសាស្ដ្រទាំងអស់ និង ក្រុមសេដ្ឋកិច្ចសង្គមនៅហ្វីលីពីន។ ជាប្រជាជនមកតំបន់មិនដាណាវ លោកឌូទើតេ ក៏ធ្លាប់ជាចៅហ្វាយក្រុង Davao ដែរ។ ដូច្នេះហើយរបាយការណ៍នេះរកឃើញថា ប្រជាជននៅក្នុងក្រុមនេះជឿជាក់លោកប្រធានាធិបតីរូបនេះខ្លាំងជាងគេ។
សារព័ត៌មានរុស្ស៊ី RT បានស្រង់សម្ដីអ្នកនាំពាក្យរបស់ប្រធានាធិបតីលោក Ernesto Abella ពាក់ព័ន្ធការស្ទង់មតិនេះថា៖«នេះគឺជាដំណឹងដ៏ល្អមួយ»។
«នៅពេលដែលលោកបញ្ចប់ការគ្រប់គ្រង លោកនឹងទុកកិតិ្តយសនេះឲ្យរដ្ឋបាលរបស់លោកនិងភ្នាក់ងារចូលរួមទាំងអស់»។ លោក Abella បន្ថែមដូច្នេះ។
ដើមឆ្នាំនេះ រដ្ឋបាលលោក ឌូទើតេ រងការរិះគន់យ៉ាងខ្លាំងពីក្រុមប្រឹក្សាភិបាលគ្រប់គ្រងគ្រឿងញៀនអន្តរជាតិនៃអង្កការសហប្រជាជាតិដោយសារការសម្លាប់មនុស្សក្រៅប្រព័ន្ធតុលាការដោយប៉ូលីសឬភ្នាក់ងារអនុវត្ត។ លោក ឌូទើតេ ធ្លាប់ពោលថា លោកពេញចិត្តសម្លាប់អ្នកញៀនថ្នាំបីលាននាក់ដោយមិនញញើតដៃ។
ក្នុងសេចក្ដីរាយការណ៍ប្រចាំឆ្នាំដែលបានចេញផ្សាយក្នុងខែមីនា ក្រុមប្រឹក្សាភិបាលគ្រប់គ្រងគ្រឿងញៀនបានស្នើឲ្យហ្វីលីពីនថ្កោលទោសរាល់ប៉ូលីសឬភ្នាក់ងារអនុវត្តច្បាប់ដែលសម្លាប់មនុស្សសង្ស័យថាមានពាក់ព័ន្ធគ្រឿងញៀនក្រៅប្រព័ន្ធតុលាការ។
រដ្ឋាភិបាលលោក ឌូទើតេ ក៏បានបដិសេធការចោទប្រកាន់ពីសំណាក់អង្គការក្រៅលើកលែងទោសអន្តរជាតិ (Amnesty international) ដែលហៅសង្គ្រាមប្រឆាំងគ្រឿងញៀនហ្វីលីពីនថាជាសង្គ្រាមសម្លាប់អ្នកទន់ខ្សោយ៕
Tag:
រ៉ូឌ្រីហ្គោ ឌូទើត
ហ្វីលីពីន
Marawi
Pulse Asia
© រក្សាសិទ្ធិដោយ thmeythmey.com