ប្រមុខកងទ័ពអាមេរិកថា សមត្ថភាពនុយក្លេអ៊ែរកូរ៉េខាងជើងនៅមានកម្រិត

អន្តរជាតិ

ប្រមុខកងទ័ពអាមេរិកថា សមត្ថភាពនុយក្លេអ៊ែរកូរ៉េខាងជើងនៅមានកម្រិត

24, Jul 2017 , 11:55 am

រូបភាព

ដោយ: តន ចាន់រិទ្ធារ៉ា

ប្រមុខកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត (Joseph Dunford) បានវាយតម្លៃថា កូរ៉េខាងជើងមានសមត្ថភាពវាយប្រហារមីស៊ីលដាក់គោលដៅអាមេរិក ជប៉ុន និងកូរ៉េខាងត្បូងបាន ប៉ុន្តែការវាយប្រហារនេះនៅមានកម្រិតនៅឡើយ។ ទោះជាមីស៊ីលកូរ៉េខាងជើងក្លាយជាការគំរាមកំហែងក្ដី ប្រមុខកងទ័ពអាមេរិករូបនេះនិយាយថា អាមេរិក និងសម្ព័ន្ធមិត្តក៏មានសមត្ថភាពអាចការពារខ្លួនបានដូចគ្នា។

ការរីកចម្រើនក្នុងកម្មវិធីនុយក្លេអ៊ែររបស់កូរ៉េខាងជើង ពិតជាធ្វើឲ្យអាមេរិកបារម្ភខ្លាំង ព្រោះកូរ៉េខាងជើងមានសមត្ថភាពដែលអាចវាយប្រហារគោលដៅអាមេរិក និងសម្ព័ន្ធមិត្តនានា។ យ៉ាងណាមិញ មេទ័ពកំពូលរបស់យោធាអាមេរិកបាននិយាយថា សមត្ថភាពនុយក្លេអ៊ែររបស់កូរ៉េខាងជើងហាក់នៅមានកម្រិតនៅឡើយ ហើយអាមេរិកក៏អាចការពារខ្លួនឯង ក៏ដូចជាសម្ព័ន្ធមិត្តរបស់ខ្លួនដូចជាជប៉ុន និងកូរ៉េខាងត្បូងបានដែរ។

ក្នុងវេទិកាសន្តិសុខមួយរៀបចំនៅរដ្ឋ Colorado នៅថ្ងៃទី២២ ខែកក្កដា នាយសេនាធិការចម្រុះកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត និយាយថា មេដឹកនាំកូរ៉េខាងជើង គីម ជុងអ៊ុន មានទំនាក់ទំនងខ្លាំងជាមួយកម្មវិធីនុយក្លេអ៊ែរ។ លោកបន្តថា អ្វីដែលលោកអាចប្រាប់ប្រជាជនអាមេរិកបាន គឺកូរ៉េខាងជើងពិតជាមានសមត្ថភាពវាយប្រហារនុយក្លេអ៊ែរក្នុងកម្រិតណាមួយបានមែន ប៉ុន្តែអាមេរិកក៏មានសមត្ថភាពការពារបានដូចគ្នាដែរ។

ការលើកឡើងរបស់មេទ័ពកំពូលអាមេរិក ធ្វើឡើងបន្ទាប់កូរ៉េខាងជើងសាកល្បងមីស៊ីលមួយនៅថ្ងៃទី៤ ខែកក្កដា ដែលទាំងអាមេរិក និងកូរ៉េខាងជើងសុទ្ធតែអះអាងថា ជាមីស៊ីលចម្ងាយឆ្ងាយ និងអាចបាញ់ដល់ទឹកដីអាមេរិក។ ក្រោយការបាញ់នេះ ការព្រួយបារម្ភកាន់តែកើនឡើងពីសមត្ថភាពរបស់រដ្ឋឯកោមួយនេះ ទោះជារងទណ្ឌកម្មជុំជិតពីសំណាក់អន្តរជាតិក៏ដោយចុះ។ ដោយសារបញ្ហានេះ មេទ័ពអាមេរិកខាងលើ បានលើកពីលទ្ធភាពដែលយោធាអាចត្រូវប្រើប្រាស់ក្នុងការបញ្ចប់មហិច្ឆតាកូរ៉េខាងជើង។

យោងតាមទីភ្នាក់ងារព័ត៌មាន Yonhap ឧត្តមសេនីយ៍ ដាន់ហ្វត បញ្ជាក់ថា វាជារឿងដែលមិនអាចស្រមើស្រមៃបានសម្រាប់លោកក្នុងការអនុញ្ញាតឲ្យមីស៊ីល ឬនុយក្លេអ៊ែររបស់កូរ៉េខាងជើងធ្លាក់លើទឹកដីអាមេរិកនោះ។ ប្រមុខកងទ័ពនៃប្រទេសមហាអំណាចយោធាធំជាងគេលើពិភពលោក និយាយច្បាស់ៗថា ការងាររបស់លោក គឺជ្រើសរើសមធ្យោបាយយោធាដើម្បីធានាថា នឹងគ្មានរឿងរ៉ាវបែបនោះកើតឡើងឡើយ។

យ៉ាងណាក្ដី លោក ដាន់ហ្វត នៅតែជឿថាការដាក់ទណ្ឌកម្មទាំងសេដ្ឋកិច្ច និងការទូត នៅតែជាជម្រើសធំជាងគេក្នុងការដោះស្រាយបញ្ហានុយក្លេអ៊ែរកូរ៉េខាងជើង។ លោកបានស្នើឲ្យមានការដាក់សម្ពាធកាន់តែខ្លាំងថែមទៀតលើកូរ៉េខាងជើង ដោយលោកក៏បានសារភាពដែរថា សង្គ្រាមជាមួយកូរ៉េខាងជើងនៅលើកនេះ នឹងបង្កមហន្តរាយខ្លាំងជាងសង្គ្រាមលោកលើកទីពីរទៅទៀត។ លោកថា អ្នកដែលរស់រានពីសង្គ្រាមលើកមុន អាចប្រឈមមុខសង្គ្រាមដែលកាន់តែអាក្រក់មិនខាន៕