អ្នកនាំពាក្យ៖ លោក ញឹក ប៊ុនឆៃ មិនវិលទៅរកសម្តេចក្រុមព្រះវិញឡើយ

ជាតិ

នយោបាយជាតិ

អ្នកនាំពាក្យ៖ លោក ញឹក ប៊ុនឆៃ មិនវិលទៅរកសម្តេចក្រុមព្រះវិញឡើយ

24, Jul 2017 , 6:33 pm

រូបភាព

លោក រុណ មាត្រា អះអាងថា លោក ញឹក ប៊ុនឆៃ មិនវិលទៅរកសម្តេចក្រុមព្រះវិញឡើយ

ដោយ: ម៉ៅ សុផា

ភ្នំពេញ៖ លោក រុណ មាត្រា អ្នកនាំពាក្យគណបក្សខ្មែររួបរួមជាតិ តាមរយៈឃ្លីបវីដេអូមួយ បានចេញមុខបកស្រាយថា លោក ញឹក ប៊ុនឆៃ ដែលជាប្រធានខ្លួន ប្រកាសជំហរថា នឹងមិនត្រឡប់ទៅចុះចូលជាមួយគណបក្សហ្វ៊ុនស៊ិនប៉ិច ដែលមានសម្តេច នរោត្តម រណឫទ្ធិ ជាប្រធាន នោះទេ។

នៅក្នុងវីដេអូឃ្លីប ដែលមានរយៈពេលជាង៦នាទី ហើយត្រូវបានបង្ហោះនៅលើទំព័រហ្វេសប៊ុករបស់លោក ញឹក ប៊ុនឆៃ នោះ លោក រុណ មាត្រា បានបដិសេធពាក្យចចាមអារ៉ាម ដែលថា លោក ញឹក ប៊ុនឆៃ រួមទាំងគណបក្សខ្មែររួបរួមជាតិទាំងមូល មានបំណងទៅចុះចូលជាមួយគណបក្សហ្វ៊ុនស៊ិនប៉ិចវិញ ខណៈមន្ត្រីមួយចំនួន បានទៅចុះចូលរួចទៅហើយ។

អ្នកនាំពាក្យរូបនេះ បាននិយាយក្នុងវីដេអូឃ្លីបដូច្នេះថា៖«ពាក្យ ដែលថា លោក ញឹក ប៊ុនឆៃ ទៅចូលរួមជាមួយគណបក្សហ្វ៊ុនស៊ិនប៉ិច គឺជាការបំភ្លើស ជាការលាបព័ណ៌។ វា ជាព័ត៌មាន បំពុល ដែលគណបក្សខ្មែររួបរួមជាតិ មិនអាចទទួលយកបាន»។

សូមបញ្ជាក់ថា លោក ញឹក ប៊ុនឆៃ ជាអតីតអនុប្រធានគណបក្សហ្វ៊ុនស៊ិនប៉ិច។ ដោយសារមានការរង្គោះរង្គើនៅក្នុងផ្ទៃក្នុង លោកញឹក ប៊ុនឆៃ ក៏សម្រេចចិត្តចាកចេញបក្សហ្វ៊ុនស៊ិនប៉ិច ហើយបានបង្កើតគណបក្សខ្មែររួបរួមជាតិ ដោយខ្លួនឯង កាលពីអំឡុងខែកុម្ភៈ ឆ្នាំ២0១៦។ រលកនានាបានបក់ទៅលើគណបក្សថ្មីរបស់លោក ញឹក ប៊ុនឆៃ ដោយលោក ញឹក ប៊ុនឆៃ និងមន្ត្រីដែលស្និទ្ធិនឹងរូបលោក ត្រូវបានដកហូតតំណែងជាបន្តបន្ទាប់ក្នុងរដ្ឋាភិបាល៕