បទយកការណ៍ / បទសម្ភាសន៍
អ្នកស្រាវជ្រាវបានដាក់ភាសាចាមក្នុងកម្រិតប្រកាសអាសន្ន លោក ឡឹប កើ អ្នកស្រាវជ្រាវភាសា និងអក្សរចាម។ រូបថត៖ អ៊ីសា រ៉ហានី
× ភ្នំពេញ៖ អ្នកសិក្សាស្រាវជ្រាវភាសាចាមមួយរូបនៅកម្ពុជា បានដាក់ភាសាចាមក្នុងកម្រិតអាសន្ន នៅពេលដែលភាសានេះ មិនសូវមានអ្នកប្រើប្រាស់។ លោក ឡឹប កើ អ្នកស្រាវជ្រាវភាសា និងអក្សរចាម បានសង្កេតឃើញថា ភាសាចាមកំពុងត្រូវបានគេបោះបង់ និងនៅតាមសហគមន៍ចាមខ្លះ ការប្រើប្រាស់មានចំនួនតិចតួច ឬខ្លះបានបោះបង់ចោលតែម្តង ដោយជំនួសមកវិញនូវភាសាផ្សេង ដូចជាភាសាខ្មែរ និងម៉ាឡេជាដើម។
លោក ឡឹប កើ បានកត់សម្គាល់នូវចំណុចពីរ ដែលរុញឲ្យភាសាចាមនៅកម្ពុជា ស្ថិតក្នុង កម្រិតមួយដែលគួរឲ្យបារម្ភ។ ចំណុចទាំងនោះមាន ការមិនយល់ច្បាស់ពីការប្រើប្រាស់ភាសា នៅក្នុងសហគមន៍ចាម និងការមិនឲ្យតម្លៃ ឬទម្លាក់តម្លៃនៃភាសាខ្លួនជាដើម។ ចំណែកការ សិក្សាកន្លងមក ប្រជាជននៅតាមទីប្រជុំជន ដែលមានអត្រាបោះបង់ភាសាចាមច្រើនជាងគេ។
ការយល់ឃើញរបស់អ្នកស្រាវជ្រាវផ្នែកភាសា នេះមិនមែនជាកំហុសអ្នកណាម្នាក់នោះទេ តែវាជាការវិវត្តន៍នៅក្នុងសង្គមទូទៅ ដែលទាមទារឲ្យមានការចូលរួមពីថ្នាក់ដឹកនាំ ក៏ដូចជា ប្រជាជន ដើម្បីរកផ្លូវដោះស្រាយ។ សម្រាប់លោក ឡឹប កើ ដំណោះស្រាយនៅចំពោះមុខ គឺយុវជនចាម ត្រូវចាប់ផ្តើមប្រើប្រាស់ភាសាខ្លួនឯងឡើងវិញឲ្យបានទូលំទូលាយ និងចំពោះ ដំណោះស្រាយនៅពេលអនាគត យុវជនត្រូវរួមគ្នាចងក្រងភាសាចាមទុកជាឯកសារ សម្រាប់ ក្មេងៗជំនាន់ក្រោយ ចៀសវាងការប្រងើយកន្តើយ ដែលនាំឲ្យភាសានេះ អាចបាត់បង់ជា យថាហេតុ៕
ដើម្បីឲ្យកាន់តែច្បាស់ សូមស្តាប់បទសម្ភាសខ្លី រវាងអ្នកសារព័ត៌មានថ្មីៗ និងលោក ឡឹប កើ ដែលបទសម្ភាសនេះធ្វើឡើងនៅក្នុងបឋកថានិយាយពី «ស្ថានភាពបច្ចុប្បន្ននៃភាសាចាម» ដែលរៀបចំឡើងដោយពុទ្ធសាសនបណ្ឌិត្យ នៅថ្ងៃទី២៧ កក្កដា ឆ្នាំ២០១៧ សូមអញ្ជើញស្តាប់
© រក្សាសិទ្ធិដោយ thmeythmey.com