ជាតិ
គ.ជ.ប ប្រកាសឲ្យភាគីនានា ដាក់លិខិតសុំធ្វើជាអ្នកសង្កេតការណ៍ ក្នុងការចុះឈ្មោះបោះឆ្នោតថា្នក់ជាតិ
× ភ្នំពេញ៖ គណៈកម្មាធិការជាតិរៀបចំការបោះឆ្នោត បានប្រកាសឲ្យគណបក្សនយោបាយ និងអង្គការជាតិ-អន្តរជាតិ ដាក់ពាក្យសុំធ្វើជាអ្នកសង្កេតការណ៍ ដើម្បីឃ្លាំមើលនិងតាមដាន ការចុះឈ្មោះបោះឆ្នោត សម្រាប់ការបោះឆ្នោតថ្នាក់ជាតិ នាអាណត្តិទី៦ ក្នុងឆ្នាំ២0១៨ ខាងមុខ។
សេចក្តីជូនដំណឹងរបស់គ.ជ.ប បានឲ្យដឹងថា ចាប់ពីថ្ងៃទី១ ខែសីហា ឆ្នាំ២0១៧ ដល់ថ្ងៃទី១៤ ខែមករា ឆ្នាំ២០១៨ អង្គការជាតិ អាចបញ្ជូនលិខិត ទៅកាន់គ.ជ.ប ដើម្បីសុំដាក់អ្នកសង្កេតការណ៍ ឲ្យចូលរួមតាមដានការធ្វើបញ្ជីបោះឆ្នោត និងការចុះឈ្មោះបោះឆ្នោត សម្រាប់យកទៅបោះឆ្នោតថ្នាក់ជាតិ នាពេលខាងមុខ។ បើតាមសេចក្តីជូនដំណឹងដដែល អង្គការអន្តរជាតិ មានរយៈពេលពីថ្ងៃទី១ ខែសីហា ឆ្នាំ២០១៧ ដល់ថ្ងៃទី២១ ខែមករា ឆ្នាំ២០១៨ ដើម្បីដាក់ពាក្យសុំធ្វើជាអ្នកសង្កេតការណ៍។
សេចក្តីជូនដំណឹងខាងលើ បានបញ្ជាក់ទៀតថា គណបក្សនយោបាយ អាចបញ្ជូនលិខិត ទៅកាន់គ.ជ.ប ដើម្បីសុំដាក់អ្នកសង្កេតការណ៍ ចាប់ពីថ្ងៃទី២៥ ខែសីហា ឆ្នាំ២0១៧ រហូតដល់ថ្ងៃទី១៤ ខែមករា ឆ្នាំ២0១៨។
គ.ជ.ប បានលើកឡើងក្នុងសេចក្តីជូនដំណឹងយ៉ាងដូច្នេះ៖«គ.ជ.ប សង្ឃឹងថា សមាគម អង្គការជាតិ-អន្តរជាតិ គណបក្សនយោបាយ ក្រុមប្រឹក្សាឃុំ-សង្កាត់ និងលេខាធិការដ្ឋាន រាជធានី-ខេត្តរៀបចំការបោះឆ្នោត នឹងយកចិត្តទុកដាក់ ហើយសហការគ្នា ដើម្បីជំរុញឲ្យការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ប្រព្រឹត្តទៅដោយជោគជ័យ»។
សូមបញ្ជាក់ថា ពលរដ្ឋកម្ពុជាប្រមាណជា២លាននាក់ទៀត ដែលមានអាយុចាប់ពី១៨ឆ្នាំឡើងទៅ មិនទាន់បានចុះឈ្មោះបោះឆ្នោត ដោយក្នុងនោះ ពលរដ្ឋ ដែលទៅរស់នៅនិងធ្វើការនៅក្រៅប្រទេស មានជាង១លាននាក់។ ចាប់ពីថ្ងៃទី១ ខែកញ្ញា ឆ្នាំ២0១៧ តទៅ គ.ជ.ប នឹងចាប់ផ្តើមរៀបចំការចុះឈ្មោះបោះឆ្នោត សម្រាប់ការបោះឆ្នោតថ្នាក់ជាតិ។ ការបោះឆ្នោតថ្នាក់ជាតិ នឹងប្រព្រឹត្តទៅ នៅថ្ងៃទី២៩ ខែកក្កដា ឆ្នាំ២0១៨៕
Tag:
បោះឆ្នោតជាតិ
គ.ជ.ប
អ្នកសង្កេតការណ៍
ចុះឈ្មោះបោះឆ្នោត
© រក្សាសិទ្ធិដោយ thmeythmey.com