អ្នករាយការណ៍ពិសេស UN នឹងមកកម្ពុជា ដោយផ្តោតសំខាន់លើសិទ្ធិកុមារ

ជាតិ

អ្នករាយការណ៍ពិសេស UN នឹងមកកម្ពុជា ដោយផ្តោតសំខាន់លើសិទ្ធិកុមារ

04, Aug 2017 , 8:19 pm

រូបភាព

អ្នកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា ។ រូបថត Thmey Thmey

ដោយ: ម៉ៅ សុផា

ភ្នំពេញ៖ អ្នកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា នឹងមកបំពេញទស្សនកិច្ចនៅកម្ពុជា រយៈពេល១0ថ្ងៃ គឺចាប់ពីថ្ងៃទី៨ ដល់ថ្ងៃទី១៨ ខែសីហា ឆ្នាំ២0១៧។ នេះបើតាមសេចក្តីជូនដំណឹងរបស់ការិយាល័យឧត្តមស្នងការផ្នែកសិទ្ធិមនុស្សនៃអង្គការសហប្រជាជាតិ។

បើតាមសេចក្តីជូនដំណឹងនោះ ដំណើរទស្សនកិច្ចរបស់អ្នកស្រី រ៉ូណា ស្មីត គឺដើម្បីពិនិត្យមើលពីស្ថានភាពនៃសិទ្ធិមនុស្សទូទៅ ជាពិសេសផ្តោតលើសិទ្ធិកុមារកម្ពុជា។ សេចក្តីជូនដំណឹង បានដកស្រង់ប្រសាសន៍របស់អ្នកស្រី រ៉ូណា ស្មីត យ៉ាងដូច្នេះថា៖«នៅក្នុងដំណើរបេសកកម្មរបស់ខ្ញុំលើកនេះ ខ្ញុំនឹងផ្តោតលើសិទ្ធិកុមារ ជាផ្នែកមួយនៃការងារ ដែលខ្ញុំកំពុងធ្វើលើវិស័យនៃការរើសអើង និងក្រុមដែលងាយរងគ្រោះ។ ខ្ញុំមានបំណងឈ្វេងយល់ជាពិសេសអំពីការជួញដូរនិងការកេងប្រវ័ញ្ចលើកុមារ រួមទាំងគោលជំហរក្នុងការមើលថែកុមារ»។

ប្រភពខាងលើ បានឲ្យដឹងទៀតថា ក្នុងអំឡុងនៃការបំពេញទស្សនកិច្ចនៅកម្ពុជា អ្នកស្រី រ៉ូណា ស្មីត នឹងមានជំនួបជាមួយភាគីនានា ដូចជាសមាជិកជាន់ខ្ពស់នៃរដ្ឋាភិបាល និងតំណាងសង្គមស៊ីវិល ជាដើម។

សូមបញ្ជាក់ថា នេះជាលើកទី៤ហើយ នៃដំណើរទស្សនកិច្ចរបស់អ្នកស្រី រ៉ូណា ស្មីត មកកាន់កម្ពុជា។ អ្នកស្រី រ៉ូណា ស្មីត ត្រូវបានក្រុមប្រឹក្សាសិទ្ធិមនុស្សនៃអង្គការសហប្រជាជាតិ តែងតាំងជាអ្នករាយការណ៍ពិសេសស្តីពីសិទ្ធិមនុស្សកម្ពុជា កាលពីខែមិនា ឆ្នាំ២0១៥៕