ជាតិ
មួយសប្តាហ៍ទៀត CNRP នឹងដករូបស្ថាបនិកទាំងពីរចេញឲ្យអស់ពីស្លាកគណបក្ស
× ភ្នំពេញ៖ គណបក្សសង្គ្រោះជាតិ បានកំណត់ថា រយៈពេលមួយសប្តាហ៍ទៀត រូបលោក សម រង្ស៊ី និងឯកឧត្តម កឹម សុខា នឹងត្រូវដកចេញឲ្យអស់ ពីផ្ទាំងផ្សព្វផ្សាយចាស់ នៅទូទាំងប្រទេស។ ឥឡូវនេះ គណបក្សសង្គ្រោះជាតិ បានចាប់ផ្តើមរុះរើ និងផ្លាស់ប្តូរផ្ទាំងផ្សព្វផ្សាយរបស់ខ្លួន ជាបណ្តើរៗហើយ។
ព្រោះតែព្រួយបារម្ភនឹងការប្រឈមចំពោះមាត្រាថ្មីនៃច្បាប់ស្តីពីគណបក្សនយោបាយ ដែលទើបនឹងត្រូវបានសរសេរបន្ថែមដោយគណបក្សប្រជាជនកម្ពុជា គណបក្សសង្គ្រោះជាតិ ត្រូវតែរួសរាន់ក្នុងការដករូបលោក សម រង្ស៊ី ដែលឈរកាន់ដៃជាមួយឯកឧត្តម កឹម សុខា ចេញពីស្លាកសញ្ញា ឬក៏ហៅថាផ្ទាំងផ្សព្វផ្សាយ ឲ្យបានលឿន តាមតែអាចធ្វើទៅបាន។ ប្រសិនបើមិនដករូបលោក សម រង្ស៊ី ដែលមានឈ្មោះជាអ្នកទោស ចេញពីផ្ទាំងផ្សព្វផ្សាយឲ្យទាន់ពេលវេលានោះទេ គណបក្សសង្គ្រោះជាតិ អាចនឹងត្រូវប្រឈមនឹងផ្លូវច្បាប់។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗថា គណបក្សសង្គ្រោះជាតិ បានចាប់ផ្តើមដករូបលោក សម រង្ស៊ី និងឯកឧត្តម កឹម សុខា បានមួយចំនួនធំហើយ ក្នុងរយៈពេលប៉ុន្មានថ្ងៃនេះ។ អ្នកនាំពាក្យរូបនេះ សង្កត់ធ្ងន់ថា ប្រហែលជាមិនលើសពីមួយសប្តាហ៍ទៀតទេ រូបលោក សម រង្ស៊ី និងឯកឧត្តម កឹម សុខា នឹងត្រូវដកចេញពីស្លាកគណបក្ស នៅទូទាំងប្រទេសហើយ។ លោក បានបញ្ជាក់យ៉ាងដូច្នេះថា៖«ដោយសារច្បាប់ថ្មីហ្នឹងបង្ខំយើងពេក អ៊ីចឹងយើងត្រូវតែធ្វើឲ្យបានលឿនជាទីបំផុត»។
បើតាមលោក យឹម សុវណ្ណ ផ្ទាំងផ្សព្វផ្សាយថ្មីរបស់គណបក្សសង្គ្រោះជាតិ ដែលមានតែរូបព្រះអាទិត្យ នឹងត្រូវលើកតាំង ក្រោយពីផ្ទាំងផ្សព្វផ្សាយចាស់នៅទូទាំងប្រទេស ត្រូវបានដកចេញរួចរាល់។ ប៉ុន្តែលោក ប្រាប់ថា ផ្ទាំងផ្សព្វផ្សាយថ្មីនៅតាមទីតាំងមួយចំនួន ត្រូវបានលើកតាំងហើយ ក្រោយពីដកចេញនូវផ្ទាំងផ្សព្វផ្សាយចាស់ ដែលមានរូបលោក សម រង្ស៊ី និងឯកឧត្តម កឹម សុខា។
ឯកឧត្តម កឹម សុខា ក្នុងនាមជាប្រធានគណបក្សសង្គ្រោះជាតិ បានចេញសេចក្តីណែនាំមួយ ទៅដល់ថ្នាក់ដឹកនាំនិងមន្ត្រីរបស់ខ្លួនទាំងអស់ នៅតាមបណ្តារាជធានី-ខេត្ត ដើម្បីឲ្យពន្លឿនការដករូបរបស់ឯកឧត្តម ដែលឈរកាន់ដៃជាមួយលោក សម រង្ស៊ី ចេញពីផ្ទាំងផ្សព្វផ្សាយនៅទូទាំងប្រទេស។ ឯកឧត្តម កឹម សុខា បានសរសេរក្នុងសេចក្តីណែនាំយ៉ាងដូច្នេះ៖«ខ្ញុំសូមស្នើដល់ថ្នាក់ដឹកនាំគណបក្ស នៅតាមរាជធានី-ខេត្ត ទាំងអស់ ផ្លាស់ប្តូរស្លាកសញ្ញាគណបក្ស ឲ្យបានឆាប់រហ័ស។ ក្នុងករណី ដែលមិនទាន់មានគំរូស្លាកសញ្ញាគណបក្សថ្មីទៅជំនួស សូមដោះចេញនូវស្លាកសញ្ញាគណបក្សចាស់ ដែលមានរូបចាប់ដៃរវាងឯកឧត្តម សម រង្ស៊ី និងខ្ញុំ»។
ក្នុងចំណោមមាត្រាថ្មីទាំងអស់ ដែលទើបសរសេរបន្ថែមនៅក្នុងច្បាប់ស្តីពីគណបក្សនយោបាយ មានមាត្រាមួយ បានកំណត់ថា គណបក្សនយោបាយ មិនអាចប្រើប្រាស់ រូបថត សារជាសំឡេង និងឯកសារជាលាយលក្ខណ៍អក្សររបស់បុគ្គលណាម្នាក់ ដែលមានឈ្មោះជាអ្នកទោសនោះទេ។ មាត្រាថ្មីនេះ បានផ្តល់សិទ្ធិអំណាចយ៉ាងធំធេងដល់តុលាការ រហូតដល់អាចរំលាយគណបក្សណាមួយ ប្រសិនបើគណបក្សនោះ បានប្រព្រឹត្តនូវទង្វើខាងលើ។
ដូច្នេះ គណបក្សសង្គ្រោះជាតិ ត្រូវតែដករូបលោក សម រង្ស៊ី ដែលរងបណ្តឹងជាច្រើនពីមេដឹកនាំគណបក្សប្រជាជនកម្ពុជា ហើយក៏ត្រូវបានតុលាការកាត់ក្តីឲ្យក្លាយជាអ្នកទោសទៅហើយនោះ ចេញពីផ្ទាំងផ្សព្វផ្សាយឲ្យអស់ នៅទូទាំងប្រទេស។ មិនត្រឹមតែរូបរបស់លោក សម រង្ស៊ី នោះទេ គណបក្សសង្គ្រោះជាតិ ក៏បានសម្រេចដករូបឯកឧត្តម កឹម សុខា ចេញផងដែរ។ ចាប់ពីពេលនេះតទៅ ស្លាកឬផ្ទាំងផ្សព្វផ្សាយរបស់គណបក្សសង្គ្រោះជាតិ នៅទូទាំងប្រទេស គឺមានតែរូបព្រះអាទិត្យប៉ុណ្ណោះ ដោយមិនមានរូបលោក សម រង្ស៊ី និងឯកឧត្តម កឹម សុខា ទៀតទេ៕
Tag:
CNRP
ប្តូរស្លាក
សម រង្ស៊ី
កឹម សុខា
យឹម សុវណ្ណ
© រក្សាសិទ្ធិដោយ thmeythmey.com