ជាតិ
អ្នករាយការណ៍ UN លើកឡើងពីការឃុំមន្ត្រីបក្សប្រឆាំងនិងសិទ្ធិមនុស្ស ពេលជួបរដ្ឋមន្ត្រីយុត្តិធម៌
× ភ្នំពេញ៖ ក្នុងជំនួបជាមួយរដ្ឋមន្ត្រីក្រសួងយុត្តិធម៌ លោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រចាំកម្ពុជា បានបង្ហាញពីការព្រួយបារម្ភចំពោះការកកស្ទះក្នុងពន្ធនាគារ ដោយសារតែការកើនឡើងនូវចំនួនអ្នកទោស។ ក្នុងប្រធានបទនេះ លោកស្រី ក៏ឆ្លៀតលើកឡើងពីករណីមន្ត្រីសិទ្ធិមនុស្ស និងមន្ត្រីបក្សនយោបាយផងដែរ ដែលត្រូវបានឃុំខ្លួន។
លោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រចាំកម្ពុជា បានយកសំណុំរឿងរបស់មន្ត្រីសិទ្ធិមនុស្ស រួមទាំងអ្នកនយោបាយនិងសកម្មជនបក្សនយោបាយ [ទំនងជាចង់សំដៅដល់បក្សប្រឆាំង] ដែលបានជាប់ឃុំក្នុងពន្ធនាគារ ទៅពិភាក្សាជាមួយលោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ នៅព្រឹកថ្ងៃទី១0 ខែសីហា ឆ្នាំ២0១៧នេះ។ លោក ជិន ម៉ាលីន អ្នកនាំពាក្យក្រសួងយុត្តិធម៌ បានប្រាប់ក្រុមអ្នកសារព័ត៌មានយ៉ាងដូច្នេះ ក្រោយបញ្ចប់ជំនួបរវាងលោកស្រី រ៉ូណា ស្មីត និងលោក អង្គ វង្ស វឌ្ឍានា។
លោក ជិន ម៉ាលីន សង្កត់ធ្ងន់ថា ថ្វីដ្បិតលោកស្រី រ៉ូណា ស្មីត បានលើកឡើងពីបញ្ហាមន្ត្រីសិទ្ធិមនុស្ស និងសកម្មជនបក្សនយោបាយ ជាប់ឃុំក៏ពិតមែន ប៉ុន្តែ ការលើកឡើងរបស់លោកស្រី មិនពាក់ព័ន្ធនឹងរឿងនយោបាយ នោះទេ។ អ្នកនាំពាក្យក្រសួងយុត្តិធម៌រូបនេះ បានបញ្ជាក់យ៉ាងដូច្នេះថា៖«គាត់ [លោកស្រី រ៉ូណា ស្មីត] បានលើកឡើងពីការឃុំខ្លួនបណ្តោះអាសន្ត រួមទាំងសកម្មជនសិទ្ធិមនុស្ស រួមទាំងសកម្មជនបក្សនយោបាយ និងសាធារណជនទូទៅ។ គាត់មិនលើកជារឿងនយោបាយទេ។ គាត់ មិនផ្តោតតែទៅលើសកម្មជនបក្សនយោបាយ និងមន្ត្រី សិទ្ធិមនុស្ស នោះទេ។ ប៉ុន្តែ គាត់ថា ធ្វើយ៉ាងម៉េច ឲ្យការឃុំខ្លួន មានការថយចុះ»។
បើតាម លោក ជិន ម៉ាលីន លោកស្រី រ៉ូណា ស្មីត ព្រួយបារម្ភចំពោះការកើនឡើងនូវចំនួនជនល្មើស ដែលត្រូវបានយកទៅឃុំជាបណ្តោះអាសន្ន ដែលបណ្តាលឲ្យមានការកកស្ទះក្នុងពន្ធនាគារ។ លោក បន្តថា ខណៈកំពុងនិយាយពីប្រធានបទនេះ លោកស្រី រ៉ូណា ស្មីត ក៏បានភ្ជាប់រឿងមន្ត្រីសិទ្ធិមនុស្ស និងមន្ត្រីបក្សនយោបាយ ដែលបានជាប់ឃុំ។
លោកស្រី រ៉ូណា ស្មីត ស្នើថា កម្ពុជា គួរធ្វើយ៉ាងណា ដើម្បីកាន់បន្ថយការកក់ស្ទះក្នុងពន្ធនាគារ ដោយសារតែការកើនឡើងនូវចំនួនអ្នកជាប់ឃុំបណ្តោះអាសន្ន។ នេះជាការអះអាងរបស់លោក ជិន ម៉ាលីន ដដែល។
កន្លងមក មន្ត្រីអាដុកហុក៤រូប ដែលរួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត ១រូបទៀត គឺលោក នី ចរិយា បានជាប់ឃុំអស់រយៈពេលជាង ១ឆ្នាំ ដោយសារតែរឿងអាស្រូវរបស់នារីម្នាក់ ឈ្មោះ ខុម ចាន់តារ៉ាទី ហៅស្រី មុំ។ ប៉ុន្តែ មន្ត្រីសិទ្ធិមនុស្សទាំង៥នាក់នេះ ត្រូវបានដោះលែងឲ្យរស់នៅក្រៅឃុំជាបណ្តោះអាសន្ន កាលពីចុងខែមិថុនា ឆ្នាំ២0១៧ កន្លងទៅ។
ចំណែក អ្នកនយោបាយ និងសកម្មជនបក្សប្រឆាំង ដែលកំពុងជាប់ឃុំ នាពេលបច្ចុប្បន្ន មានរហូតជិត២0នាក់ ឯណោះ។ អ្នក ដែលកំពុងជាប់ពន្ធនាគារទាំងនោះ រួមមាន លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ លោកមាជ សុវណ្ណារ៉ា អតីតមន្ត្រីជាន់ខ្ពស់គណបក្សសង្គ្រោះជាតិ រួមទាំងសកម្មជនជាង ១0នាក់ផ្សែងទៀត។ លោក ហុង សុខហួរ អតីតសមាជិកព្រឹទ្ធសភាគណបក្ស សម រង្ស៊ី ក៏កំពុងជាប់ពន្ធនាគារដែរ៕
Tag:
រ៉ូណា ស្មីត
អង្គ វង្ស វឌ្ឍានា
ការឃុំខ្លួន
មន្ត្រីសិទ្ធិមនុស្ស
មន្ត្រីគណបក្ស
© រក្សាសិទ្ធិដោយ thmeythmey.com