ជាតិ
World Bank៖សិស្សថ្នាក់ទី៦ប្រមាណ៣៩% ខ្សោយផ្នែកអំណានភាសាខ្មែរនៅកម្រិតបឋម
× ភ្នំពេញ៖ របាយការណ៍ធនាគារពិភពលោក (World Bank) បានបង្ហាញថា សិស្សថ្នាក់ទី៦នៅកម្ពុជា មានចំនួន៣៩ភាគរយ ដែលមានពិន្ទុទាបផ្នែកអំណានភាសាខ្មែរកម្រិតថ្នាក់បឋមសិក្សា។
«សិស្សថ្នាក់ទី៦នៅកម្ពុជាចំនួន៣៩ភាគរយ មានពិន្ទុទាបផ្នែកអំណានភាសាខ្មែរនៅកម្រិតបឋមសិក្សា»។ នេះជាការស្រាវជ្រាវមួយ ដែលត្រូវបានសរសេរក្នុងរបាយការណ៍ធនាគារពិភពលោកក្រោមចំណងជើងថា៖«កំណើនប្រកបដោយស្ថិរភាព និងបរិយាប័ន្នជាតម្រូវការនាពេលខាងមុខសម្រាប់កម្ពុជា» ដែលបានផ្សព្វផ្សាយក្នុងសន្និសីទសារព័ត៌មាននៅរាជធានីភ្នំពេញ នាថ្ងៃទី១៧ ខែសីហា។
របាយការណ៍បានលើកមូលហេតុថា លទ្ធផលសិក្សាមិនល្អបែបនេះ អាចបណ្តាលមកពីគ្រូដែលទទួលបានការបណ្តុះបណ្តាលមានចំនួនតិចតួច ទទួលបានការបណ្តុះបណ្តាលមិនគ្រប់គ្រាន់ និងម៉ោងសិក្សាមានចំនួនតិចជាងមិត្តភក្តិរបស់ខ្លួនជាដើម ដែលទាំងអស់នេះ ធ្វើឲ្យប៉ះពាល់ដល់សមត្ថភាពរបស់សិស្សម្នាក់ៗ។
ក្រៅពីកង្វះការយកចិត្តទុកដាក់របស់គ្រូបង្រៀន កង្វះអាហារូបត្ថម្ភគ្រប់គ្រាន់ ខ្វះការថែទាំ គ្មានការជំរុញលើកទឹកចិត្តពីដើមទី ចម្រើនវ័យក្នុងអំឡុងពេលដែលមានភាពក្រីក្រខ្លាំង និងភាពខ្វះខាតសព្វបែបយ៉ាង គឺជាមូលហេតុចម្បងៗ ដែលធ្វើកុមារកម្ពុជាមានភាពទន់ខ្សោយលើមុខវិជ្ជាភាសាខ្មែរ។
របាយការណ៍បានសរសេរសង្កត់ធ្ងន់ទៀតថា កង្វះអាហារូបត្ថម្ភ និងការផ្តល់អាហារមិនបានត្រឹមត្រូវ ការទទួលទឹកមិនស្អាត និងកង្វះបង្គន់អនាម័យ សុទ្ធសឹងជាមូលហេតុ ធ្វើកុមារកម្ពុជា ដែលមានអាយុក្រោម៥ឆ្នាំ ចំនួន៣៣ភាគរយ មានរាងកាយក្រិន៕
Tag:
World Bank
របាយការណ៍
អប់រំ
© រក្សាសិទ្ធិដោយ thmeythmey.com