ជាតិ
លោក ម៉ម ប៊ុនហេង ស្នើចិនផ្តល់ជំនួយបន្ថែម ដើម្បីពង្រឹងសេវាសុខាភិបាលនៅកម្ពុជា រូបភាពពីហ្វេសប៊ុកក្រសួងសុខាភិបាលនៃព្រះរាជាណាចក្រកម្ពុជា
× ភ្នំពេញ៖ក្នុងវេទិកាអន្តរជាតិជាន់ខ្ពស់ស្តីពី«ខ្សែក្រវ៉ាត់និងផ្លូវសម្រាប់កិច្ចសហប្រតិបត្តិការលើវិស័យសុខាភិបាលឆ្ពោះទៅរកសុខភាពផ្លូវសូត្រ» នៅរដ្ឋធានីប៉េកាំង ប្រទេសចិន ដែលបានប្រព្រឹត្តទៅនៅថ្ងៃទី១៧-២០ ខែសីហា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្នើសុំជំនួយចិនបន្ថែម ដើម្បីពង្រឹងសេវាសុខាភិបាលនៅកម្ពុជា។
រដ្ឋមន្ត្រីក្រសួងសុខាភិបាលកម្ពុជា លោក ម៉ម ប៊ុនហេង បានស្នើសុំជំនួយសុខាភិបាលពីប្រទេសចិនបន្ថែមទៀត ដើម្បីពង្រឹងសេវាសុខាភិបាលនៅកម្ពុជា។ នេះបើតាមសេចក្តីជូនព័ត៌មានរបស់ក្រសួងសុខាភិបាលកម្ពុជានៅថ្ងៃទី២០ ខែសីហានេះ ដែលនិយាយអំពីលទ្ធផលនៃកិច្ចប្រជុំអន្តរជាតិមួយស្តីពីវិស័យសុខភិបាលក្នុងក្របខណ្ឌគោលនយោបាយផ្លូវសូត្រនៅក្នុងទីក្រុងប៉េកាំងនៅក្នុងសប្តាហ៍នេះ។
បើតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា ប្រទេសចិននឹងបញ្ជូនក្រុមគ្រូពេទ្យ ផ្តល់សេវាវះកាត់ភ្នែកឡើងបាយ មាត់ឆែបដោយឥតគិតថ្លៃ ការផ្តល់ជំនួយឱសថ សម្ភារ និងបរិក្ខាពេទ្យ ទៅជួយបណ្តាប្រទេសផ្លូវមួយ ខ្សែក្រវ៉ាត់មួយ។ បន្ថែមពីនេះ ចិនក៏អនុវត្តន៍គម្រោងសុខភាពមាតា និងកុមារ ជំរុញបច្ចេកវិទ្យាសមស្របក្នុងផ្នែកឯកទេសកុមារ សម្ភព និងរោគស្ត្រី និងពង្រឹងសមត្ថភាពថែទាំនិងព្យាបាល ដើម្បីលើកកម្ពស់សុខភាពមាតា និងទារក នៅតាមបណ្តាលប្រទេសផ្លូវមួយខ្សែក្រវ៉ាត់មួយ និងកិច្ចសហប្រតិបត្តិការការទូតជាច្រើនទៀត។
សូមបញ្ជាក់ថា ផ្លូវមួយ ខ្សែក្រវ៉ាត់មួយ ជាគម្រោងផ្លូវសូត្រថ្មីមួយរបស់ប្រទេសចិន ដែលបានប្រកាសឱ្យអនុវត្តន៍កាលពីឆ្នាំ ២០១៣ ដោយ លោក ស៊ី ជីនពីង ប្រធានាធិបតីចិន។ គម្រោងនេះបែងចែកចេញជាពីរ។ ទីមួយ គម្រោង «ផ្លូវមួយ» សំដៅដល់ការកសាងហេដ្ឋារចនាសម្ព័ន្ធផ្លូវទឹក ឬ ផ្លូវសូត្រសមុទ្រសតវត្សរ៍ទី២១ ដែលតភ្ជាប់ពីតំបន់ហ្វូចូវ (Fuzhou) នៃខេត្តហ្វូជាន (Fujian) ប្រទេសចិន រហូតដល់ទីក្រុងវែនីស (Venice) ប្រទេសអ៊ីតាលី ឆ្លងកាត់តំបន់អាស៊ីអាគ្នេយ៍ អាស៊ីខាងត្បូង អាហ្វ្រិក និង អឺរ៉ុបខាងត្បូង។ ទីពីរ គម្រោង «ខ្សែក្រវ៉ាត់មួយ» ដែលសំដៅដល់ការកសាងហេដ្ឋារចនាសម្ព័ន្ធផ្លូវគោក ឬ ផ្លូវសូត្រខ្សែក្រវ៉ាត់សេដ្ឋកិច្ច ដែលតភ្ជាប់ពីតំបន់ស៊ីអាន (Xi’an) នៃខេត្តសានស៊ី (Shaanxi) ប្រទេសចិន រហូតដល់ទីក្រុងវែនីស (Venice) ប្រទេសអ៊ីតាលី ដែលជាទីភ្ជាប់គ្នាទៅនឹងផ្លូវសូត្រសមុទ្រសតវត្សរ៍ទី២១ ដោយឆ្លងកាត់តំបន់អាស៊ីកណ្តាល ទីក្រុងមូស្គូ (Moscow) នៃសហព័ន្ធរុស្សី និង អឺរ៉ុបខាងត្បូង៕
Tag:
ម៉ម ប៊ុនហេង
សុខាភិបាល
© រក្សាសិទ្ធិដោយ thmeythmey.com