រដ្ឋាភិបាល ផ្តល់ថវិកា ៤ លានរៀល ដល់សហគមន៍នីមួយៗដែលធ្វើការក្នុងវិស័យព្រៃឈើ

ជាតិ

រដ្ឋាភិបាល ផ្តល់ថវិកា ៤ លានរៀល ដល់សហគមន៍នីមួយៗដែលធ្វើការក្នុងវិស័យព្រៃឈើ

22, Aug 2017 , 9:59 pm

រូបភាព

តំណាងសហគមន៍ព្រៃឈើ ចូលរួមក្នុងវេទិកាជាតិស្តីពី «ការការពារនិងការអភិរក្សធនធានធម្មជាតិ» នៅវិមានសន្តិភាព នាថ្ងៃទី២២ ខែសីហា ឆ្នាំ២0១៧។ រូបភាពពីហ្វេសប៊ុក សម្តេច ហ៊ុន សែន

ដោយ: ថ្មីៗ

ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានសម្រេចផ្តល់ថវិកា ៤ លានរៀល ឬស្មើ ១ ពាន់ដុល្លារ ដល់សហគមន៍នីមួយៗ ដែលធ្វើកិច្ចការ ពាក់ព័ន្ធនឹងវិស័យព្រៃឈើនិងធនធានធម្មជាតិ។ ការសម្រេចភ្លាមៗបែបនេះ របស់ប្រមុខរដ្ឋាភិបាលកម្ពុជា ធ្វើឡើង ក្នុងវេទិកាជាតិលើកទី២ ស្តីពី «ការការពារនិងអភិរក្សធនធានធម្មជាតិ» ដែលរៀបចំនៅវិមានសន្តិភាព នាព្រឹកថ្ងៃទី២២ ខែសីហា ។

សម្តេច ហ៊ុន សែន បានលើកឡើងថា ថវិកាខាងលើ ដែលផ្តល់ឲ្យសហគមន៍នានា ដើម្បីចំណាយលើការការពារព្រៃឈើ និងធនធានធម្មជាតិ មិនមានទំហំធំប៉ុន្មាននោះទេ សម្រាប់រដ្ឋាភិបាល។ សម្តេច ហ៊ុន សែន បញ្ជាក់យ៉ាងដូច្នេះថា៖«ចំណុចនេះ គួរតែត្រូវបានពិនិត្យមើលដែរ ព្រោះវាមិនធំពេកទេ។ វាត្រឹមតែ ១ ពាន់ដុល្លារនោះ។ ដូច្នេះយើង [ឧទាហរណ៍] ថា មាន ៣០០ សហគមន៍។ ដូច្នេះ វាអស់តែ ៣០ ម៉ឺនដុល្លារទេ។ ឥឡូវ ខ្ញុំសម្រេចតែម្តង គឺសូមជួន ១សហគមន៍ ចំនួន១ពាន់ដុល្លារ សម្រាប់វិស័យព្រៃឈើ ហើយចាប់អនុវត្តពីខែមករា ឆ្នាំ២0១៨ទៅ»៕