ក្រោយស្លាប់សិស្សសាលាម្នាក់ ឌូទើតេ ចេញបញ្ជាឲ្យប៉ូលិសបាញ់អ្នករឹងទទឹងការចាប់ខ្លួន

អន្តរជាតិ

ក្រោយស្លាប់សិស្សសាលាម្នាក់ ឌូទើតេ ចេញបញ្ជាឲ្យប៉ូលិសបាញ់អ្នករឹងទទឹងការចាប់ខ្លួន

28, Aug 2017 , 3:34 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានចេញបញ្ជាឲ្យប៉ូលិសបាញ់ពួកឆ្កួតឡប់ដែលរឹងទទឹងការចាប់ខ្លួន។ ការចេញបញ្ជារបស់លោក ឌូទើតេ ធ្វើឡើងចំពេលដែលបយុទ្ធនាការបោសសម្អាតគ្រឿងញៀនរបស់លោករងការរិះគន់ខ្លាំង ក្រោយការស្លាប់សិស្សសាលាវ័យក្មេងម្នាក់ក្រោមស្នាដៃប៉ូលិសហ្វីលីពីន។ លោក ឌូទើតេ ក៏បានចេញបញ្ជាឲ្យស៊ើបអង្កេតករណីដែរ ដើម្បីកាត់ទោសប៉ូលិសដែលប្រព្រឹត្តខុសច្បាប់។

ទោះជាឈាមបន្តហូរក្ដី ប្រតិបត្តិការបង្ក្រាបគ្រឿងញៀនរបស់រដ្ឋបាលប្រធានាធិបតី រ៉ូឌ្រីហ្គោ ឌូទើតេ នៅតែបន្តធ្វើដដែល ខណៈដែលសំឡេងប្រឆាំងក្នុងស្រុកក៏កើនឡើងដែរ ក្រោយកើតមានករណីប៉ូលិសបាញ់សម្លាប់កូនសិស្សសាលាម្នាក់ឈ្មោះ Kian Loyd delos Santos នៅពាក់កណ្ដាលខែសីហានេះ។ លោក ឌូទើតេ មិនបានរាថយអ្វីទេចំពោះមុខករណីនេះ ហើយលោកក៏បានចេញបញ្ជាឲ្យប៉ូលិសបាញ់សម្លាប់អ្នកដែលមិនចុះញ៉មផងដែរ។

ថ្លែងក្នុងកម្មវិធីមួយនៅថ្ងៃទី២៨ ខែសីហា ប្រធានាធិបតីហ្វីលីពីនរូបនេះបានចេញបញ្ជាឲ្យលោក Jovie Espenido មេប៉ូលិសទីក្រុងភាគត្បូងផ្ដាច់ជីវិតអ្នកដែលលោកចាត់ទុកជាមនុស្សឆ្កួតឡប់ និងហ៊ានតដៃប៉ូលិសវិញ។ លោក ឌូទើតេ បញ្ជាក់ដូច្នេះថា៖ «កាត្វកិច្ចរបស់អ្នកតម្រូវឲ្យអ្នកជម្នះការប្រឆាំងរបស់ជនសង្ស័យ ហើយបើពួកគេតដៃ នោះជាអំពើហិង្សា។ ប៉ូលិសអាចបាញ់ពួកឆ្កួតឡប់ទាំងនោះបាន នេះជាបញ្ជារបស់ខ្ញុំ»។ នេះបើតាមការផ្សាយរបស់ទីភ្នាក់ងារព័ត៌មាន Reuters ។

យ៉ាងណាក្ដី លោក ឌូទើតេ ក៏បានប្រាប់ឲ្យប៉ូលិសអនុវត្តតាមច្បាប់ បើមិនដូច្នេះទេពួកគេផ្ទាល់នឹងប្រឈមមុខផ្លូវច្បាប់វិញមិនខាន។ ប្រធានាធិបតីមាត់ដាចរូបនេះសង្កត់ធ្ងន់ថា អំពើឃាតកម្ម អំពើមនុស្សឃាត និងការសម្លាប់មនុស្សដោយខុសច្បាប់ មិនត្រូវកើតឡើងដាច់ខាត ហើយប៉ូលិសត្រូវប្រកាន់ខ្ជាប់គោលការណ៍ច្បាប់ ពេលបំពេញភារកិច្ចរបស់ខ្លួន។ លោក ឌូទើតេ ធ្លាប់ប្រកាសហើយថា លោកការពារតែប៉ូលិសប្រព្រឹត្តខុសពេលចេញបេសកកម្មប៉ុណ្ណោះ។

តាំងពីចាប់ផ្ដើមមកនោះ យុទ្ធនាការបោសសម្អាតគ្រឿងញៀនរបស់លោក ឌូទើតេ មិនសូវទទួលពាក្យរិះគន់ពីប្រជាជនឡើយ ទោះជាមានអ្នកនយោបាយខ្លះ និងសហគមន៍អន្តរជាតិរិះគន់កប់មាត់ក្ដី។ ប៉ុន្តែចុងក្រោយនេះ បន្ទាប់ករណីបាញ់សិស្សសាលា Kian វ័យ១៧ឆ្នាំមកនោះ គេឃើញមានការតវ៉ាធ៏គួរសមមួយដើម្បីទាមទាររកយុត្តិធម៌។ ប៉ូលិសហ្វីលីពីនអះអាងថាខ្លួនបាញ់ការពារខ្លួនប៉ុណ្ណោះ តែខាងគ្រួសារជនរងគ្រោះនិយាយថា Kian គឺជាក្មេងស្មោះត្រង់ម្នាក់។

នៅថ្ងៃទី២៨ ខែសីហា លោក ឌូទើតេ ក៏បានជួបជាមួយឪពុកម្ដាយរបស់ Kian នៅវិមានប្រធានាធិបតី ប៉ុន្តែគេមិនដឹងថាជំនួបនេះនិយាយពីអ្វីឡើយ។ ករណីសម្លាប់ក្មេងមិនដឹងអីម្នាក់នេះទំនងជាមិនអាចផ្លាស់ប្ដូរចិត្តលោក ឌូទើតេ ឲ្យបញ្ចប់សង្គ្រាមគ្រឿងញៀនបានទេ។ លោកបានបញ្ជាក់យ៉ាងច្បាស់កាលពីថ្មីៗនេះថា សង្គ្រាមគ្រឿងញៀននឹងបន្តទៅមុខទៀតដើម្បីបោសសម្អាតក្រុមឈ្មួញនិងឧក្រិដ្ឋជនគ្រឿងញៀនដែលបង្កបញ្ហាដល់សង្គមហ្វីលីពីនឥតឈប់ឈរនោះ៕