អន្តរជាតិ
អ៊ីស្រាអែលចោទ UN ថាកាន់ជើងប៉ាឡេស្ទីននិងបើកដៃឲ្យក្រុមហេស្បូឡារត់ពន្ធអាវុធតាមចិត្ត
× នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានត្អូញត្អែរចំពោះមុខប្រមុខអង្គការសហប្រជាជាតិ អង់តូនីញ៉ូ ហ្គូតេរ៉េស ជុំវិញការលម្អៀងរបស់អង្គការពិភពលោកមួយនេះទៅរកប៉ាឡេស្ទីន និងអសមត្ថភាពក្នុងការទប់ស្កាត់ការជួញដូរអាវុធរបស់ក្រុមហេស្បូឡានៅលីបង់ទៅទៀត។ លោក ណេតាន់យ៉ាហ៊ូ ក៏ចោទ UN ថាបានធ្វើទង្វើដែលមិនស្មើភាព ហើយមិនធ្វើអ្វីសោះក្នុងការទប់ស្កាត់ទង្វើរបស់ប៉ាឡេស្ទីនដែលបង្កបញ្ហាឲ្យអ៊ីស្រាអែល។
ចំពោះមុខអគ្គលេខាធិការអង្គការសហប្រជាជាតិ អង់តូនីញ៉ូ ហ្គូតេរ៉េស នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានប្រើពាក្យសម្ដីខ្លាំងរិះគន់ស្ថាប័នពិភពលោកមួយនេះ ដែលលម្អៀងទៅរកតែប៉ាឡេស្ទីន។ លោក ហ្គូតេរ៉េស ទៅដល់អ៊ីស្រាអែលក្នុងដំណើរទស្សនកិច្ចនៅតំបន់មជ្ឈិមបូព៌ាក្នុងគោលដៅបញ្ចុះបញ្ចូលឲ្យមានការចាប់ផ្ដើមការចរចាឡើងវិញរវាងអ៊ីស្រាអែល និងប៉ាឡេស្ទីន។ ប៉ុន្តែលោកបែរជាត្រូវនាយករដ្ឋមន្ត្រីអ៊ីស្រាអែលរិះគន់ជាចំហរទៅវិញ។
ក្នុងសន្និសីទសារព័ត៌មានរួមគ្នានៅថ្ងៃទី២៨ ខែសីហា លោក ណេតាន់យ៉ាហ៊ូ បាននិយាយចំៗថា UN បានធ្វើសកម្មភាពដែលមិនស្មើភាព ព្រោះបានបន្ទាបទំនាក់ទំនងជាមួយអ៊ីស្រាអែល និងមិនបានចាត់វិធានការគ្រប់គ្រាន់ដើម្បីទប់ស្កាត់ការជួញដូរអាវុធរបស់ក្រុមឧទ្ទាមហេស្បូឡានៅលីបង់ឡើយ។ បើតាមសារព័ត៌មាន RT លោក ណេតាន់យ៉ាហ៊ូ ក៏បានរិះគន់ UN ដែលមិនទទួលទីក្រុងហ្ស៊េរុយសាឡិមជារដ្ឋធានីរបស់អ៊ីស្រាអែល តែចាត់ទុកទីក្រុងហ្ស៊េរុយសាឡិមខាងកើតជារដ្ឋធានីរបស់ប៉ាឡេស្ទីនទៅវិញ។
លើសពីនោះ នាយករដ្ឋមន្ត្រីអ៊ីស្រាអែលរូបនេះក៏បានរិះគន់បេសកកម្មថែរក្សាសន្តិភាពរបស់អង្គការសហប្រជាជាតិនៅលីបង់ (UNIFIL) ផងដែរ ដោយលោកបានចង្អុលដល់បញ្ហាជួញដូរអាវុធរបស់ក្រុមឧទ្ទាមហេស្បូឡាដែលអ៊ីស្រាអែលចាត់ទុកជាក្រុមភេរវករ។ លោក ណេតាន់យ៉ាហ៊ូ បញ្ជាក់ថា UNIFIL មានជំហរទន់ជ្រាយពេកចំពោះមុខក្រុមឧទ្ទាមដែលគាំទ្រដោយអ៊ីរ៉ង់ និងមានផែនការវាយប្រហារអ៊ីស្រាអែល ដ្បិតមិនបានរាយការណ៍ពីការរត់ពន្ធអាវុធដ៏ច្រើននៅក្នុងលីបង់ឡើយ។
ឆ្លើយតបប្រតិកម្មរបស់នាយករដ្ឋមន្ត្រីអ៊ីស្រាអែល ប្រមុខ UN បានប្រាប់វិញថាលោកដឹងពីការព្រួយបារម្ភផ្នែកសន្តិសុខរបស់អ៊ីស្រាអែល ហើយលោកនឹងព្យាយាមធ្វើគ្រប់បែបយ៉ាង និងដោយអំណាចដែលលោកមានដើម្បីរក្សាសន្តិភាពនៅក្នុងតំបន់។ លោក ហ្គូតេរ៉េស ក៏នឹងចាត់វិធានការគ្រប់យ៉ាងដើម្បីធានាថាបេសកកម្ម UN នៅលីបង់អនុវត្តភារកិច្ចរបស់ខ្លួនឲ្យបានម៉ត់ចត់ ដោយលោកសង្កត់ធ្ងន់ថាបំណងក្នុងការកម្ទេចរដ្ឋអ៊ីស្រាអែល គឺជារឿងមិនអាចទទួលយកបានឡើយ។
ឆ្លៀតឱកាសនោះ ប្រមុខរដ្ឋាភិបាលអ៊ីស្រាអែលក៏បានប្រាប់់ពីសកម្មភាពរបស់អ៊ីរ៉ង់ក្នុងការសាងសង់ទីតាំងផលិតមីស៊ីលនៅស៊ីរី និងលីបង់ ដែលជាការគំរាមកំហែងដ៏ធំរបស់អ៊ីស្រាអែល។ លោក ណេតាន់យ៉ាហ៊ូ បានអះអាងថា អ៊ីរ៉ង់ប្រែក្លាយជាស៊ីរីជាលេណដ្ឋានយោធា និងចង់ប្រើប្រាស់ស៊ីរី និងលីបង់ជាសមរភូមិជួរមុខក្នុងការគោលដៅបោសសម្អាតអ៊ីស្រាអែលពីផែនទីពិភពលោក។ ដោយមានភស្តុតាងបញ្ជាក់ពីសកម្មភាពរបស់អ៊ីរ៉ង់ លោកបន្តថា អ៊ីស្រាអែលមិនអាចទទួលយកការគំរាមបែបនេះទេ ហើយ UN ក៏គួរតែមិនអាចទទួលយកបានដែរ៕
Tag:
អ៊ីស្រាអែល
UN
បេនចាមីន ណេតាន់យ៉ាហូ
អង់តូនីញ៉ូ ហ្គូតេរ៉េស
© រក្សាសិទ្ធិដោយ thmeythmey.com