អន្តរជាតិ
ឌូទើតេ ប្រាប់ប៉ូលិសឲ្យហៅអ្នកកាសែតពេលធ្វើប្រតិបត្តិការបង្ក្រាបគ្រឿងញៀន ដើម្បីផ្សាយរឿងពិត
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បាននិយាយថា ប្រព័ន្ធផ្សព្វផ្សាយគួរដឹកនាំប្រតិបត្តិការរបស់ប៉ូលិសក្នុងការបង្ក្រាបគ្រឿងញៀន ដើម្បីទទួលបានព័ត៌មានជាក់ស្ដែងដោយខ្លួនឯង។ លោក ឌូទើតេ បញ្ជាក់ថា ការធ្វើដូចនេះ គឺជាមធ្យោបាយដែលអាចឲ្យប្រព័ន្ធផ្សព្វផ្សាយទាំងអស់ពិនិត្យស្ថានភាពផ្ទាល់ផងដែរ។ ការលើកឡើងរបស់លោក ឌូទើតេ ធ្វើឡើងខណៈដែលមានការរិះគន់លើប្រតិបត្តិការរបស់ប៉ូលិសក្នុងពេលបង្ក្រាបគ្រឿងញៀន ដែលបានសម្លាប់ក្មេងសិស្សសាលាម្នាក់កាលពីថ្មីៗនេះ។
កម្លាំងប៉ូលិសហ្វីលីពីនបានរងការរិះគន់ខ្លាំង ពេលចុះប្រតិបត្តិការបោសសម្អាតគ្រឿងញៀនម្ដងៗ ព្រោះតែងមានករណីស្លាប់ជនសង្ស័យ ឬជនស៊ីវិលគ្មានកំហុសជារឿយៗ។ ខាងប៉ូលិសហ្វីលីពីនតែងនិយាយថា ខ្លួនគ្រាន់តែបាញ់ការពារខ្លួនឯងប៉ុណ្ណោះ ព្រោះជនសង្ស័យបានតបតដោយហិង្សាដាក់ប៉ូលិសដែរ។ ការបាញ់តដៃវិញនេះ គឺជាប្រធានបទក្ដៅរវាងប៉ូលិស និងប្រព័ន្ធផ្សព្វផ្សាយ ដែលជាទូទៅមានរបាយការណ៍មិនដូចគ្នាឡើយ។
ដោយសាររឿងនេះ ប្រធានាធិបតីហ្វីលីពីន រ៉ូឌ្រីហ្គោ ឌូទើតេ និយាយថា ក្រុមអ្នកសារព័ត៌មានគួរដើរតាមប៉ូលិសពេលចុះប្រតិបត្តិការដើម្បីឲ្យដឹងច្បាស់ថា ប៉ូលិសបានបំពានអំណាចរបស់ខ្លួនឬអត់។ លោក ឌូទើតេ លើកឡើងបែបនេះ ខណៈដែលលោកកំពុងនិយាយពីករណីស្លាប់របស់សិស្សសាលា Kian delos Santos ។ ប៉ូលិសអះអាងថា Kian បាញ់ពួកគេមុន ទើបពួកគេបាញ់ការពារខ្លួន តែវីដេអូថតចេញពីកាមេរ៉ាសុវត្ថិភាពបែរជាបង្ហាញសាច់រឿងផ្ទុយគ្នាទៅវិញ
«បញ្ហាមកពីអ្នកខ្លួនឯង គឺពេលមានមនុស្សស្លាប់ អ្នកចង្អុលដាក់ប៉ូលិសភ្លាម»។ នេះជាការរិះគន់របស់លោក ឌូទើតេ ជុំវិញការអធិប្បាយរបស់អ្នករាយការណ៍ពិសេសអង្គការសហប្រជាជាតិ Agnes Callamard ដែលបានរិះគន់ករណីសម្លាប់មនុស្សក្រៅប្រព័ន្ធតុលាការ។ បើតាមសារព័ត៌មាន The Manila Bulletin លោក ឌូទើតេ បញ្ជាក់ថា លោកបានប្រាប់ឲ្យប៉ូលិសហៅអ្នកសារព័ត៌មានចូលរួមប្រតិបត្តិការប៉ូលិសតែម្ដង ដើម្បីឲ្យពួកគេអាចថតវីដេអូទុក។
ដើម្បីថតវីដេអូបានច្បាស់ល្អ ប្រធានាធិបតីហ្វីលីពីនរូបនេះក៏បានប្រាប់ឲ្យអ្នកសារព័ត៌មានទាំងអស់ដើរខាងមុខប៉ូលិស និងត្រូវរៀបចំឧបករណ៍ថតឲ្យបានល្អផងដែរ ចៀសវាងចន្លោះប្រហោងក្នុងពេលថតវីដេអូរបស់ពួកគេ។
ករណីបាញ់សិស្សសាលា Kian វ័យ១៧ឆ្នាំ បង្កើតឲ្យមានការតវ៉ាធំ និងកម្រមួយដើម្បីទាមទាររកយុត្តិធម៌។ ខណៈដែលប៉ូលិសហ្វីលីពីនអះអាងថាខ្លួនបាញ់ការពារខ្លួនប៉ុណ្ណោះ ខាងគ្រួសារជនរងគ្រោះនិយាយថា Kian គឺជាក្មេងស្មោះត្រង់ម្នាក់។ ជាមួយនឹងការអះអាងផ្សេងៗគ្នាបែបនេះ លោក ឌូទើតេ បានបញ្ជាឲ្យមានការស៊ើបអង្កេតរការពិតដើម្បីផ្ដល់យុត្តិធម៌ដល់ជនរងគ្រោះ។ Kian គឺជាជនរងគ្រោះម្នាក់ក្នុងចំណោមរាប់ពាន់នាក់ដែលបាត់បង់ជីវិតដោយសារសង្គ្រាមគ្រឿងញៀនរបស់លោក ឌូទើតេ ជាងមួយឆ្នាំមក៕
Tag:
ហ្វីលីពីន
រ៉ូឌ្រីហ្គោ ឌូទើតេ
គ្រឿងញៀន
© រក្សាសិទ្ធិដោយ thmeythmey.com