អន្តរជាតិ
អង់គ្លេសស្នើចិនបង្កើនសម្ពាធលើកូរ៉េខាងជើង តែចិនសួរវិញថាមានបានធ្វើអ្វីខ្លះឬនៅ នាយករដ្ឋមន្រ្តីអង់គ្លេស ថេរ៉េសា ម៉េយ៍ និងអ្នកនាំពាក្យក្រសួការបរទេសចិន Hua Chunying)
× នៅមុនចាប់ផ្ដើមទស្សនកិច្ចនៅជប៉ុន នាយករដ្ឋមន្ត្រីអង់គ្លេស ថេរ៉េសា ម៉េយ៍ បានស្នើឲ្យចិនដាក់សម្ពាធបន្ថែមទៀតលើកូរ៉េខាងជើង ដែលទើបតែបាញ់មីស៊ីលរំលងជប៉ុន ដោយលោកស្រី ម៉េយ៍ ជឿថាចិនមានឥទ្ធិពលលើកូរ៉េខាងជើង។ សំណើរបស់នាយករដ្ឋមន្ត្រីអង់គ្លេស បានរងប្រតិកម្មខ្លាំងតបវិញពីសំណាក់ក្រសួងការបរទេសចិន ដែលអះអាងថាខ្លួនបានធ្វើការងារយ៉ាងខ្លាំងដើម្បីដោះស្រាយបញ្ហានុយក្លេអ៊ែរកូរ៉េខាងជើងដោយសន្តិវិធី ខុសពីប្រទេសខ្លះដែលមិនបានជួយអ្វីទេ។
អង់គ្លេសបានលូកដៃចូលក្នុងវិបត្តិនុយក្លេអ៊ែរកូរ៉េខាងជើង ដោយនាយករដ្ឋមន្ត្រី ថេរ៉េសា ម៉េយ៍ បានប្រាប់ឲ្យចិនប្រើប្រាស់ឥទ្ធិពលរបស់ខ្លួនដើម្បីហាមឃាត់កូរ៉េខាងជើងពីការបាញ់មីស៊ីល ឬសាកល្បងនុយក្លេអ៊ែរទៀត។ តបនឹងការលើកឡើងរបស់នាយករដ្ឋមន្ត្រីអង់គ្លេស អ្នកនាំពាក្យក្រសួងការបរទេសចិនចាត់ទុកសម្ដីរបស់លោកស្រី ម៉េយ៍ ជារឿងដដែល ដែលតែងតែត្រូវបានលើកឡើងនៅពេលស្ថានការណ៍នៅឧបទ្វីបកូរ៉េតានតឹងម្ដងៗ។
ក្នុងសន្និសីទកាសែតប្រចាំថ្ងៃទី៣០ ខែសីហា លោកស្រី Hua Chunying បាននិយាយម្ដងទៀតពីសកម្មភាពយ៉ាងច្រើនរបស់ចិនក្នុងការដោះស្រាយជម្លោះនៅឧបទ្វីបកូរ៉េ តាមរយៈការរំសាយនុយក្លេអ៊ែរផង និងការការពារសន្តិភាព ស្ថិរភាពតំបន់ផង។ ចិនក៏បានអះអាងថាខ្លួនបានអនុវត្តយ៉ាងម៉ត់ចត់នូវសេចក្ដីសម្រេចរបស់ក្រុមប្រឹក្សាសន្តិសុខ ក៏ដូចជាប្រកាន់ជំហមិនលំអៀងក្នុងការបញ្ចប់បញ្ហាសាំញាំមួយនេះ។
ទាក់ទងនឹងការស្នើរបស់អង់គ្លេសឲ្យចិនបង្កើនសម្ពាធថែមទៀត អ្នកនាំពាក្យរូបនេះបានសួរវិញថា ប្រទេសពាក់ព័ន្ធផ្សេងទៀតដែលប្រាប់ឲ្យចិនធ្វើបែបនេះ ឬបែបនោះ មានបានអនុវត្តឲ្យពេញលេញនូវសេចក្ដីសម្រេចរបស់ក្រុមប្រឹក្សាសន្តិសុខឬទេ។ លោកស្រី Hua Chunying ក៏បានរិះគន់ដោយមិននិយាយចំឈ្មោះប្រទេសខ្លះ ថាគិតតែពីការដាក់ទណ្ឌកម្ម ហើយមើលរំលងការស្នើឲ្យមានការចរចាទៅវិញ។
តាមពិតទៅ ក្រុងប៉េកាំងធ្លាប់បានអះអាងជារឿយហើយថា ខ្លួនមិនមែនជាអ្នកត្រូវដោះស្រាយបញ្ហានេះតែម្នាក់ឯងឡើយ គឺក្រុងវ៉ាស៊ីនតោន និងក្រុងព្យុងយ៉ាងទៅវិញទេដែលជាភាគីពាក់ព័ន្ធផ្ទាល់ ត្រូវដោះស្រាយវិបត្តិនេះឲ្យបាន។ ប៉េកាំងក៏បានរិះគន់ប្រទេសខ្លះ ដែលគ្មានទំនួលខុសត្រូវ មិនជួយដោះស្រាយបញ្ហា ហើយនិយាយឮជាងគេពេលដាក់ទណ្ឌកម្ម ប៉ុន្តែដល់ពេលនិយាយរឿងចរចាបែរជានាំគ្នាស្ងាត់មាត់ទៅវិញ។
ចំពោះដំណោះស្រាយវិបត្តិមួយនេះ ជំហរចិន គឺនៅតែស្នើឲ្យអាមេរិក កូរ៉េខាងត្បូង កូរ៉េខាងជើង រួមគ្នាដោះស្រាយ ព្រោះប្រទេសទាំងបីនេះជាភាគីជម្លោះផ្ទាល់ ហើយក៏ជាអ្នកកាន់ «សោរ» ដើម្បីបើកទ្វារបញ្ហាដែរ។ ប៉ុន្តែចិននិយាយថាប្រទេសទាំងបីនេះដើរទៅមុខមួយជំហាន តែថយក្រោយបីជំហានវិញ ហើយក៏គ្មានឆន្ទៈបញ្ចប់វិបត្តិដែរ។ ក្នុងន័យនេះចិនចង់បញ្ជាក់ថាខ្លួនបានធ្វើអ្វីដែលជាការទទួលខុសត្រូវរបស់ខ្លួនហើយ នៅឡើយតែប្រទេសផ្សេងប៉ុណ្ណោះ៕
Tag:
ចិន
អង់គ្លេស
កូរ៉េខាងជើង
Theresa May
© រក្សាសិទ្ធិដោយ thmeythmey.com