ក្រោយកម្ទេចវិហារនៅកំពង់ធំ រដ្ឋមន្ត្រីវប្បធម៌ ស្នើឲ្យវត្តដែលមានសម្បត្តិជាតិ ត្រូវពិភាក្សា មុននឹងធ្វើអ្វីមួយ

ជាតិ

សង្គមជាតិ

ក្រោយកម្ទេចវិហារនៅកំពង់ធំ រដ្ឋមន្ត្រីវប្បធម៌ ស្នើឲ្យវត្តដែលមានសម្បត្តិជាតិ ត្រូវពិភាក្សា មុននឹងធ្វើអ្វីមួយ

02, Sep 2017 , 3:04 pm

រូបភាព

ដោយ:

មានអ្នកសោកស្តាយជាច្រើន ក្រោយពីព្រះគ្រូចៅអធិការវត្តឥន្ទ្រីសំវរៈ ព្រះនាម សៀង សុខ ដែលជាព្រះមេគណខេត្តកំពង់ធំ បានបញ្ជាឲ្យវាយកម្ទេចព្រះវិហារ ជាសម្បត្តិបេតិកភណ្ឌជាតិ ក្រោមហេតុផលថា ព្រះវិហារនោះទ្រុឌទ្រោមពេក ដែលអាចបាក់បង្កគ្រោះថ្នាក់ដល់ព្រះសង្ឃ និងអ្នករស់នៅក្នុងវត្តផ្សេងទៀត។ រដ្ឋមន្ត្រីក្រសួងវប្បធម៌ និងវិចិត្រសិល្បៈ ស្តាយស្រណោះមិនតិចនោះដែរ នៅពេលឃើញព្រះវិហារនៅក្នុងវត្តនេះ ខ្ទេចខ្ទីអស់។ ក្នុងបទសម្ភាសជាមួយលោក ជា ធីរិទ្ធ និពន្ធនាយករងនៃសារព័ត៌មានថ្មីៗ លោកស្រីរដ្ឋមន្ត្រី បានអំពាវនាវឲ្យចៅអធិការ ឬគណៈកម្មការវត្ត ដែលមានសម្បត្តិបេតិកភណ្ឌជាតិ ត្រូវពិភាក្សា ឬស្នើសុំមកក្រសួង មុននឹងសម្រេចចិត្តធ្វើអ្វីមួយ ដូចជា ការជួសជុល ឬកម្ទេចចោលជាដើម។

សូមអានបទសម្ភាសខាងក្រោម៖

លោក ជា ធីរិទ្ធ៖ លោកស្រី បានប្រតិកម្មនឹងព្រះចៅអធិការវត្តឥន្ទ្រីសំវរៈ ឬហៅថា វត្តកំពង់ធំ នៅក្នុងទីរួមខេត្តកំពង់ធំ ដែលព្រះអង្គបានបញ្ជាឲ្យវាយកម្ទេចទាំងយប់នូវព្រះវិហារ ដែលបានចុះក្នុងបញ្ជីសម្បត្តិបេតិកភណ្ឌជាតិ។ តើមកដល់ពេលនេះ ករណីនេះ ដោះស្រាយបែបណាហើយ?

លោកស្រី ភឿង សកុណា៖ មកដល់ពេលនេះ យើងមិនទាន់មានវិធានការណាមួយចំពោះព្រះអង្គឡើយ។ យើងក៏មិនទាន់បានជួបជាមួយព្រះតេជគុណ ដែលជាចៅអធិការនោះដែរ។ ប៉ុន្តែករណីនេះ ខ្ញុំប្រគល់ទៅឲ្យ លោកអគ្គនាយកនៃអគ្គនាយកដ្ឋានបេតិកភណ្ឌក្រសួងវប្បធម៌ ដោះស្រាយ និងជជែកជាមួយព្រះសង្ឃ។

លោ ជា ធីរិទ្ធ៖ លោកស្រី! បើព្រះវិហារ ត្រូវបានកម្ទេចអស់ទៅហើយនោះ តើជជែក ក្នុងគោលដៅអ្វី?

លោកស្រី ភឿង សកុណា៖ យើងឆ្ងល់ថា ព្រះវិហារ ស្ថិតនៅក្នុងវត្តឥន្ទ្រីសំវរៈនេះ ជាសម្បត្តិបេតិកភណ្ឌជាតិ ដែលបានចុះបញ្ជីកាលពី ២០០៧ ចុះហេតុអ្វីព្រះអង្គនៅតែបញ្ជាឲ្យវាយកម្ទេចវិហារនេះ បើទោះបីជាអាជ្ញាធរទៅហាមមុនការវាយកម្ទេចហើយនោះ? ពួកយើងគ្រាន់តែឆ្ងល់ថា តើមានកត្តាអ្វីដែលជំរុញឲ្យព្រះអង្គនៅតែចចេសវាយកម្ទេចព្រះវិហារនេះ?

លោក ជា ធីរិទ្ធ៖ ព្រះគ្រូចៅអធិការវត្តឥន្ទ្រីសំវរៈ បានបកស្រាយថា មូលហេតុដែលព្រះអង្គ និងគណៈកម្មការ សម្រេចវាយកម្ទេចនេះ ដោយសារព្រះវិហារមានសភាពទ្រុឌទ្រោមខ្លាំងពេក ដែលអាចបង្កគ្រោះថ្នាក់ដល់ព្រះសង្ឃ ឬអ្នករស់នៅក្នុងវត្តនោះ។ ម្យ៉ាងទៀត កន្លងមកមន្ត្រីដែលពាក់ព័ន្ធ មិនបានអើពើចំពោះព្រះវិហារនោះឡើយ។

លោកស្រី ភឿង សកុណា៖ យ៉ាងណា ព្រះវិហារជាសម្បត្តិបេតិកភណ្ឌរបស់ជាតិ។ ទោះបីជាព្រះវិហារនេះចាស់ តែវាមានតម្លៃជាប្រវត្តិសាស្ត្រ។ ដូចច្នេះរាល់ការជួសជុល ឬការសម្រេចណាមួយទៅលើសម្បត្តិនេះ ត្រូវមានការជជែកពិភាក្សា ឬស្នើសុំមកអាជ្ញាធរពាក់ព័ន្ធ ដូចជាមន្ត្រីក្រសួងវប្បធម៌ និងមន្ត្រីក្រសួងធម្មការ ជាមុនសិន។ យើងឃើញ ការវាយកម្ទេចនេះ គ្មានការស្នើសុំមកអាជ្ញាធរនោះទេ។

លោក ជា ធីរិទ្ធ៖ តើក្រសួងនឹងមានវិធានការតាមផ្លូវច្បាប់ ចំពោះព្រះគ្រូចៅអធិការវត្តឥន្ទ្រីសំវរៈ ដែលជាព្រះមេគណខេត្តកំពង់ធំ នោះដែរ ឬទេ?

លោកស្រី ភឿង សកុណា៖ ខ្ញុំមិនទាន់អាចនិយាយយ៉ាងណាបានទេចំពោះរឿងនេះ។ តែខ្ញុំគ្រាន់តែអាចបញ្ជាក់ថា សម្បត្តិបេតិកភណ្ឌជាតិ មានច្បាប់ស្តីពី កិច្ចការការពារបេតិកភណ្ឌវប្បធម៌ សម្រាប់ការពារ ដែលហាមមិនឲ្យជនណាមួយបំផ្លាញនោះឡើយ។

លោក ជា ធីរិទ្ធ៖ តើលោកស្រី មានសារអ្វីទៅកាន់ប្រជាជន ជាពិសេសទៅកាន់គណៈកម្មការ ឬគ្រូចៅអធិការ នៅក្នុងវត្តណាមួយដែលមានព្រះវិហារ ដែលជាសម្បត្តិបេតិកភណ្ឌជាតិ ដើម្បីកុំឲ្យមានករណីបែបនេះកើតឡើងទៀត?

លោកស្រី ភឿង សកុណា៖ យើងសោកស្តាយណាស់ ដែលមានករណីធ្វើឲ្យប៉ះពាល់ដល់សម្បត្តិកភណ្ឌជាតិបែបនេះ បានកើតឡើង។ ក្នុងនាមជារដ្ឋមន្ត្រីក្រសួងវប្បធម៌ សូមអំពាវនាវឲ្យព្រះតេជគុណ អាចារ្យគណៈកម្មការ ជួយថែរក្សាព្រះវិហារដែលជាសម្បត្តិបេតិកភណ្ឌជាតិដែលនៅសេសសល់ ដោយត្រូវសហការជាមួយស្ថាប័នពាក់ព័ន្ធ មុននឹងធ្វើអ្វីមួយទៅលើសម្បត្តិទាំងនោះ។ ខ្ញុំជម្រាបរាបថា បច្ចុប្បន្ននេះ យើងនៅសល់ព្រះវិហារដែលជាសម្បត្តិបេតិកភណ្ឌជាតិ តែប្រមាណ ១០០ ប៉ុណ្ណោះ ខណៈដែលប្រាសាទមានជាង ១០០០ ៕