កញ្ញា រិទ្ធី លំអរកេសរ ៖«ខ្ញុំប្រឹងលើការងារសិល្បៈរាល់ថ្ងៃ ដើម្បីឲ្យកូនខ្មែរស្គាល់វប្បធម៌ខ្លួនឯង »

ជាតិ

សិល្បះ

កញ្ញា រិទ្ធី លំអរកេសរ ៖«ខ្ញុំប្រឹងលើការងារសិល្បៈរាល់ថ្ងៃ ដើម្បីឲ្យកូនខ្មែរស្គាល់វប្បធម៌ខ្លួនឯង »

10, Sep 2017 , 8:59 am

រូបភាព

ដោយ:

កញ្ញា រិទ្ធី លំអរកេសរ គឺជាតារាចម្រៀងម្នាក់ នៃក្រុម Small World Small Band ដែលបង្កើតនៅឆ្នាំ២០១២ និងជាស្ថាបនិកម្នាក់នៃកម្មវិធីបុណ្យភូមិដែលល្បីល្បាញ។ លំអរកេសរ ក៏ជាអ្នករចនាក្រាហ្វិក(Graphic Designer) ឯករាជ្យម្នាក់ដែរ។ ចាប់ផ្តើមចូលសិល្បៈនៅឆ្នាំ២០១២ ដោយចាប់ផ្តើមបង្កើត និងច្រៀងតែបទចម្រៀងមិនចម្លង ដែលផលិតដោយក្រុម Small World Small Bandផ្ទាល់។ ស្នាដៃដែលមានភាពលេចធ្លោចាប់តាំងពីឆ្នាំ២០១២មក រួមមាន បទបុណ្យភូមិចាប់ពីឆ្នាំ២០១៥មក បទទង់ជាតិខ្មែរ ទឹកចិត្ត ស្មារតីកីឡា ស្នេហ៍៩ និង Album2x5 ក្រុមSWSB។ ដ្បិតសាច់ញាតិគ្មានសែស្រឡាយជាអ្នកសិល្បៈ ប៉ុន្តែ កញ្ញា លំអរកេសរ បានស្រឡាញ់សិល្បៈចម្រៀងនេះ និងបន្តជំហ៊ានលើវិថីសិល្បៈនេះ ដោយនាងបានអះអាងថា ចង់ឲ្យកូនខ្មែរស្គាល់ខ្លួនឯង ស្គាល់ពីសិល្បៈ វប្បធម៌ខ្លួន។

កញ្ញា រិទ្ធី លំអរកេសរ បានចូលប្រឡូកក្នុងវិស័យសិល្បៈចម្រៀងនៅក្នុងឆ្នាំ២០១២ តាមរយៈការបង្កើតក្រុម Small World Small Band(SWSB) ជាមួយយុវជន៣នាក់ទៀត។ ពេលនោះហើយ ដែលឈ្មោះរបស់យុវតីវ័យ២៣រូបនេះ ត្រូវបានគេចាប់ផ្តើមស្គាល់។ គេស្គាល់ តាមការច្រៀងបទមិនចម្លង(Original Song) ដែលផលិតដោយ ក្រុម Small World Small Bandផ្ទាល់។ ជាកូនអ្នកភ្នំពេញ កញ្ញា រិទ្ធី លំអរកេសរ បានបញ្ជាក់ប្រាប់សារព័ត៌មានថ្មីៗថា បទចម្រៀងដែលលេចធ្លោមានដូចជា បទបុណ្យភូមិចាប់ពីឆ្នាំ២០១៥មក បទទង់ជាតិខ្មែរ បទទឹកចិត្ត បទស្មារតីកីឡា បទស្នេហ៍៩ និង Album2x5 ក្រុមSWSB ។

ក្រៅតែពីសមាជិកក្រុម SWSB យុវជន លំអរកេសរ ក៏ជាស្ថាបនិកបុណ្យភូមិ ដែលបង្កើតឡើងក្នុងឆ្នាំ២០១៤ ជាមួយបងស្រី និងមិត្តភក្តិ២រូបទៀតដែរ។ កម្មវិធី បុណ្យភូមិ ដែលកញ្ញា រិទ្ធី លំអរកេសរ បានអះអាងថា បានក្លាយជាទីតាំងនៃការផ្សព្វផ្សាយល្ខោនបុរាណខ្មែរ ទីតាំងទស្សនាទស្សនីយភាពសិល្បៈនានារបស់ខ្មែរ គាំទ្រ និងផ្តល់វេទិកាដល់សិល្បករ វិចិត្រករ ដែលបានបង្កើតស្នាដៃជាដើម។

ក្រៅពីនេះ យុវតីរូបនេះ ក៏ជាអ្នករចនាក្រាហ្វិក(Graphic Designer)ឯករាជ្យម្នាក់ផងដែរ។ កញ្ញាធ្លាប់បានរចនា logo របស់កម្មវិធីបុណ្យភូមិ កម្មវិធី១០០ឆ្នាំនៃរបាំបុរាណ Srolanh House និងJFF Cambodia ក៏ដូចជាគម្រោងដទៃទៀត។ ផ្តើមចេញពីការស្រលាញ់ និងស្គាល់ខ្លួនឯង បានជំរុញឲ្យ លំអរកេសរ ចាប់យកជំនាញទាំង៣នេះ។ កញ្ញា លំអរកេសរ ថ្លែងដូច្នេះថា៖«ខ្ញុំកើតមក ខ្ញុំចូលចិត្តពហុជំនាញ ដូច្នេះជីវិតខ្ញុំវាមានសេរីភាពបន្តិច ដែលខ្ញុំអាចជ្រើសរើសថាតើខ្ញុំគួរធ្វើមួយណាមុន? កាលដែលខ្ញុំអាចធ្វើការទាំង៣ជំនាញនេះបាន ដោយសារខ្ញុំច្បាស់ខ្លួនឯងថាខ្ញុំចង់បានអ្វី? ហើយការចេះបែងចែកពេលវេលា»។

យុវតី ដែលមានសក្តានុពលរូបនេះ បានប្រើប្រាស់ទេពកោសល្យរបស់ខ្លួន តាមរយៈចម្រៀង Graphic Design និងរៀបចំកម្មវិធីបុណ្យភូមិជាដើម គឺសុទ្ធតែផ្សារភ្ជាប់ជាមួយនឹងសិល្បៈ និងវប្បធម៌ខ្មែរ។ កញ្ញា លំអរកេសរ បានថ្លែងដូច្នេះថា៖«គ្រួសារខ្ញុំមិនមានអ្នកជាប់ខ្សែស្រឡាយជាអ្នកសិល្បៈទេ។ កាលដែលខ្ញុំស្រលាញ់សិល្បៈ ពីព្រោះខ្ញុំគិតថាគ្មានអ្វីក្រៅតែសិល្បៈ និងវប្បធម៌ទេ គឺជាដួងព្រលឹងរបស់មនុស្សម្នាក់ៗ ជាពិសេសកូនខ្មែរតែម្តង កុំឲ្យគាត់មានពាក្យតែលើបបូរមាត់ ពួកគាត់និយាយថាស្រលាញ់ខ្មែរ ប៉ុន្តែក្នុងខ្លួនពួកគាត់មិនមានអ្វីសោះ ដូច្នេះខ្ញុំគិតថាអ៊ីចឹងអ្វីដែលជំរុញឲ្យខ្ញុំប្រឹងលើការងារសិល្បៈរាល់ថ្ងៃ ដើម្បីឲ្យកូនខ្មែរ ស្គាល់ខ្លួនឯងថាជានរណាគេ? មកពីណា? មួយវិញទៀតពួកខ្ញុំនៅតែឈរលើជំហរមួយថា មានតែសិល្បៈ និងវប្បធម៌ ដែលអាចឲ្យមនុស្សនៅជុំគ្នា ជាមួយនឹងក្តីស្រលាញ់ធំមែនទែន។ អ៊ីចឹងហើយបានជាខ្ញុំបញ្ជ្រាបពីសិល្បៈ និងវប្បធម៌ទៅតាមជំនាញធំទាំង៣របស់ខ្ញុំនេះ»។

បើទោះបីជាក្នុងគ្រួសារគ្មានសែស្រឡាយជាអ្នកសិល្បៈចម្រៀងក្តី កញ្ញា លំអរកេសរ មានទឹកចិត្តស្រលាញ់សិល្បៈពីម៉ាកយាយរបស់ខ្លួនដែលធ្លាប់រស់ក្នុងនៅខេត្តកំពង់ឆ្នាំង។

កញ្ញា រិទ្ធី លំអរកេសរ ក្រៅតែពីមានទេពកោសល្យផ្នែកចម្រៀង ស្ថាបនិកបុណ្យភូមិរូបនេះ ក៏មានបំណង បន្តការសិក្សាជំនាញគំរូសារគមនាគមន៍ (Graphic Design) នៅក្រៅប្រទេសផងដែរ។ កញ្ញា រិទ្ធី លំអរកេសរ ថ្លែងដូច្នេះថា ៖«សម្រាប់គម្រោងការទៅថ្ងៃអនាគត បើនិយាយវិស័យចម្រៀង គឺពួកយើងនៅតែបន្តការធ្វើចម្រៀង។ តាមរយៈបទចម្រៀង Album2x5នេះ សុទ្ធតែជារឿងពិត ហើយខ្ញុំសង្ឃឹមពួកគាត់នឹងចាប់ផ្តើមធ្វើអ្វីដែលគាត់ស្រលាញ់ដែរ។ សម្រាប់កម្មវិធីបុណ្យភូមិពីមួយឆ្នាំ ទៅមួយឆ្នាំកាន់តែធំទៅៗ ហើយខ្ញុំនៅតែមិនបោះបង់បុណ្យភូមិអ៊ីចឹង។ បើនិយាយទាក់ទងនឹងជំនាញ Graphic Design ខ្ញុំក៏មិនបោះបង់ចោលដែរ ពីព្រោះខ្ញុំគ្រោងរកអាហារូបករណ៍ទៅបន្តការសិក្សានៅស្រុកគេ។ ខ្ញុំចង់ពង្រឹងជំនាញ Graphic Design នេះឲ្យមានគុណភាពជាងនេះទៀត ពីព្រោះអ្វីដែលខ្ញុំ Design ឥឡូវវាមិនទាន់ដល់ចំណុចមួយ ដែលខ្ញុំចង់បានទេ ដោយសារស្រុកយើងនេះ វាខ្វះខាតជំនាញ Graphic Design បែបបច្ចេកវិទ្យានេះ»៕