អន្តរជាតិ
ចិន អះអាងថា ការបាញ់សាកល្បងអាវុធនុយក្លេអ៊ែរកូរ៉េខាងជើង មិនប៉ះពាល់ដល់បរិស្ថានចិនទេ
× រដ្ឋាភិបាលក្រុងប៉េកាំង បានអះអាងថា ការបាញ់សាកល្បងអាវុធនុយក្លេអ៊ែររបស់រដ្ឋាភិបាលក្រុងព្យុងយ៉ាងនាពេលថ្មីៗនេះ មិនបានប៉ះពាល់ដល់បរិស្ថានចិនឡើយ។ ក្រុងប៉េកាំង អាចថ្លែងបែបនេះ បន្ទាប់ពីបានបញ្ចប់ការពិនិត្យ និងស្រាវជ្រាវដោយក្រុមអ្នកជ្រាវស្រាវរបស់ខ្លួនរយៈពេលជាងមួយសប្តាហ៍ ។
ក្រសួងការពារបរិស្ថានចិន នៅថ្ងៃ១១ កញ្ញា បានចេញសេចក្តីថ្លែងការណ៍មួយ ដោយបានបញ្ជាក់ថា មិនមានលទ្ធផលមិនប្រក្រតីពាក់ព័ន្ធការបាញ់សាកល្បងរបស់កូរ៉េខាងជើងនៅថ្ងៃទី០៣ កញ្ញា ត្រូវបានបង្ហាញនៅក្នុងការពិសោធន៍ និងស្រាវជ្រាវរបស់អ្នកជំនាញចិនរយៈពេល៨ថ្ងៃនេះនោះទេ។ នេះបើយោងតាមការចុះផ្សាយរបស់សារព័ត៌មានចិន People’s Daily ។
ក្រសួងខាងលើនេះបានបញ្ជាក់បន្ថែមយ៉ាងដូច្នេះថា៖« ការវាយតម្លៃដ៏គ្រប់ជ្រុងជ្រោយ បានបង្ហាញថា ការបាញ់សាកល្បងអាវុធនុយក្លេអ៊ែររបស់កូរ៉េខាងជើង មិនបានបណ្តាលឲ្យមានផលប៉ះពាល់បរិស្ថានដល់ចិនឡើយ។» នេះបើយោងតាមប្រភពព័ត៌មានដដែលនោះ ។
តាមពិតទៅ ការណ៍ដែលក្រុងប៉េកាំង ត្រូវបង្កើតក្រុមងារដើម្បីវាយតម្លៃ និងពិនិត្យលើស្ថានភាពបរិស្ថានជុំវិញខេត្ត និងតំបន់ ដែលជាប់នឹងព្រំដែនកូរ៉េខាងជើងបែបនេះ ដោយសារ ក្រុងប៉េកាំង មិនត្រឹមតែបារម្ភពីការសាយភាយសារធាតុគីមីប៉ុណ្ណោះនោះទេ ក៏ប៉ុន្តែ ក៏ដើម្បីស្វែងយល់ពីកម្លាំងរញ្ជួយដែលបណ្តាលមកពីការបាញ់សាកល្បងនោះផងដែរ ។
សូមរម្លឹកផងដែរថា នៅថ្ងៃទី៣ ខែកញ្ញាកន្លងទៅ កូរ៉េខាងជើងបានបាញ់សាកល្បងគ្រាប់បែកអ៊ីដ្រូសែន នៅឯទីតាំងសាកល្បង Punggye-ri ។ វាជាការសាកល្បងលើកទី៦ របស់កូរ៉េខាងជើង និងត្រូវបានចាត់ទុកជាគ្រាប់បែកដែលមានកម្លាំងខ្លាំងជាងការសាកល្បងលើកមុនៗ។ កូរ៉េខាងជើងនិយាយថា គ្រាប់បែកអ៊ីដ្រូសែននេះត្រូវបានផលិតដោយអ្នកវិទ្យាសាស្ត្រក្នុងស្រុកសុទ្ធសាធ ហើយអាចបំពាក់លើមីស៊ីលរំលងទ្វីបដែលអាចបាញ់ដល់ទឹកដីអាមេរិក។
បើទោះបីជា ការបាញ់សាកល្បងនេះ មិនបានប៉ះពាល់ដល់បរិស្ថានចិនក៏ដោយ ក្រុងប៉េកាំង ក៏មិនបានគាំទ្រសកម្មភាពរបស់កូរ៉េខាងជើងនោះទេ ។ ក្រុងប៉េកាំង រួមទាំងសហគមន៍អន្តរជាតិ បានចេញថ្លែងការណ៍ព្រួយបាមរម្ភ និងទទូចឲ្យកូរ៉េខាងជើងបញ្ឈប់សកម្មភាព និងវិលមករកតុចរចាដើម្បីរក្សាស្ថិរភាព និងសន្តិសុខនៅក្នុងតំបន់ឧបទ្វីបកូរ៉េ៕
© រក្សាសិទ្ធិដោយ thmeythmey.com