អន្តរជាតិ
ប្រាយុទ្ធ ទៅជួប ត្រាំ នៅសេតវិមាននៅសប្ដាហ៍ក្រោយ
× មេដឹកនាំរបបសឹកថៃ ឧត្តមសេនីយ៍ ប្រាយុទ្ធ ចន្ទអូចា នឹងទស្សនកិច្ចនៅអាមេរិកនៅសប្ដាហ៍ក្រោយ និងគ្រោងជួបជាមួយប្រធានាធិបតី ដូណាល់ ត្រាំ នៅសេតវិមានផងដែរ។ ការពង្រឹងទំនាក់ទំនងទ្វេភាគី ដែលធ្លាក់ចុះក្រោយរដ្ឋប្រហារឆ្នាំ២០១៤ និងវិបត្តិនៅឧបទ្វីបកូរ៉េ ជាប្រធានបទសំខាន់ក្នុងដំណើរទស្សនកិច្ចលើកនេះ។ នេះជាដំណើរទស្សនកិច្ចលើកទីពីររបស់លោក ប្រាយុទ្ធ នៅអាមេរិក បន្ទាប់ទស្សនកិច្ចលើកទីមួយកាលពីឆ្នាំ២០១៦ ។
តាមការអញ្ជើញរបស់ប្រធានាធិបតី ដូណាល់ ត្រាំ នាយករដ្ឋមន្ត្រីថៃ ប្រាយុទ្ធ ចន្ទអូចា នឹងធ្វើទស្សនកិច្ចបីថ្ងៃនៅអាមេរិក ចាប់ពីថ្ងៃទី២ ដល់ថ្ងៃទី៤ ខែតុលា។ បើតាមការប្រកាសរបស់សេតវិមាន លោក ប្រាយុទ្ធ នឹងជួបពិភាក្សាតទល់ជាមួយលោក ត្រាំ នៅថ្ងៃទី៣ ខែតុលាលើប្រធានបទសំខាន់ជាច្រើនដើម្បីពង្រីកទំនាក់ទំនងទ្វេភាគី។ ទស្សនកិច្ចបីថ្ងៃនេះធ្វើឡើង បន្ទាប់ពីត្រូវបានពន្យារពេលម្ដងដោយសារតែការចរចាមិនត្រូវគ្នាលើរបៀបវារៈកិច្ចប្រជុំ។
ទស្សនកិច្ចរបស់ឧត្តមសេនីយ៍ ប្រាយុទ្ធ ដែលឡើងកាន់អំណាចតាមរយៈរដ្ឋប្រហារយោធា គឺជាសញ្ញានៃការវិលត្រឡប់ទៅរកស្ថានភាពល្អប្រសើរឡើងវិញក្នុងចំណងការទូតថៃ និងអាមេរិក បន្ទាប់ពីល្អក់កករដោយសាររដ្ឋប្រហារឆ្នាំ២០១៤ ។ អាមេរិកបានរិះគន់របបយោធាថៃខ្លាំង ជុំវិញបញ្ហាសិទ្ធិមនុស្ស និងប្រជាធិបតេយ្យ ដែលធ្វើឲ្យមេដឹកនាំយោធាងាកចេញពីអាមេរិក រួចមានទំនាក់ទំនងជិតស្និទ្ធជាមួយចិន និងរុស្ស៊ីវិញ។
កាសែតបាងកកប៉ុស្តិ៍ផ្សាយថា ប្រធានបទនៃជំនួបរវាងលោក ប្រាយុទ្ធ និងលោក ត្រាំ នឹងផ្ដោតលើកិច្ចសហប្រតិបត្តិការលើវិស័យការពារជាតិ សន្តិសុខ សេដ្ឋកិច្ច និងការវិនិយោគជាដើម។ បញ្ហាក្ដៅក្នុងតំបន់ដូចជាវិបត្តិនុយក្លេអ៊ែរកូរ៉េខាងជើង ក៏ទំនងនឹងត្រូវបានលើកឡើងដែរ ព្រោះរដ្ឋបាលលោក ត្រាំ កំពុងព្យាយាមប្រមែរប្រមូលប្រទេសទាំងអស់ រួមទាំងប្រទេសនៅអាស៊ីក្នុងការបង្ខំឲ្យកូរ៉េខាងជើង បញ្ឈប់កម្មវិធីនុយក្លេអ៊ែរ។
កាលពីទស្សនកិច្ចរបស់រដ្ឋមន្ត្រីការបរទេស រិច ធីល័រសិន ក្នុងទីក្រុងបាងកកកាលពីខែសីហា អាមេរិកក៏ស្នើឲ្យថៃជួយដាក់សម្ពាធលើកូរ៉េខាងជើង ជាពិសេសជួយកាត់ផ្ដាច់លំហូរហិរញ្ញវត្ថុទៅកាន់ក្រុងព្យុងយ៉ាង។ នេះក៏ដោយសារតែអាមេរិកជឿថា ក្រុមហ៊ុនកូរ៉េខាងជើងជាច្រើនបើកភោជនីយដ្ឋាននៅលើទឹកដីថៃ ហើយក្រុងវ៉ាស៊ីនតោនបានប្រាប់ឲ្យក្រុងបាកកបិទជំនួញទាំងនោះចោល ប៉ុន្តែខាងក្រុងបាងកកក៏ឆ្លើយវិញថា ការរកស៊ីរវាងថៃ និងកូរ៉េខាងជើងបានធ្លាក់ចុះយ៉ាងច្រើននាពេលកន្លងមក។
ទស្សនកិច្ចពេលនេះ នឹងធ្វើឲ្យលោក ប្រាយុទ្ធ ក្លាយជាមេដឹកនាំរដ្ឋសមាជិកអាស៊ានទីបី ដែលទៅជួបប្រធានាធិបតីអាមេរិកដល់សេតវិមាន។ កាលពីថ្ងៃទី៣១ ខែឧសភា នាយករដ្ឋមន្ត្រីវៀតណាម ង្វៀន ស៊ួនភួក បានជួបជាមួយលោក ត្រាំ ហើយនៅថ្ងៃទី១២ ខែកញ្ញា នាយករដ្ឋមន្ត្រីម៉ាឡេស៊ី ក៏ជួបតទល់ជាមួយលោក ត្រាំ ផងដែរ៕
Tag:
ថៃ
អាមេរិក
ដូណាល់ ត្រាំ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com