ជាតិ
សេដ្ឋកិច្ច
រដ្ឋាភិបាល និងអង្គការនានា ជួយគាំទ្រក្រុមសន្សំប្រាក់តាមបណ្ដាខេត្ត
× ភ្នំពេញ៖ រដ្ឋាភិបាល តាមរយៈក្រសួងអភិវឌ្ឍន៍ជនបទ និងអង្គការក្រៅរដ្ឋាភិបាលនានា បានបង្ហាញពីសកម្មភាពរបស់ខ្លួនក្នុងការជួយគាំទ្រដល់សហគមន៍សន្សំប្រាក់នៅតាមបណ្ដាខេត្តនានា ដើម្បីឲ្យពលរដ្ឋ ពិសេសកសិករមានប្រភពទុនមួយផ្សេងទៀតយកទៅបង្វិលក្នុងមុខរបររបស់ខ្លួន។
ក្រុមសន្សំប្រាក់ជាប្រភេទឥណទានក្រៅប្រព័ន្ធមួយប្រភេទ ដែលសមាជិកក្រុម ឬបណ្ដាញ គឺជាអ្នកដាក់ប្រាក់សន្សំក្នុងមូលនិធិមួយដើម្បីបានការប្រាក់ និងអាចខ្ចីប្រាក់ដោយបង់ការប្រាក់ ។ ទម្រង់បែបនេះ ត្រូវបានអនុវត្តនៅតាមបណ្ដាខេត្តមួយចំនួន បើទោះបីទម្រង់នេះមានឈ្មោះផ្សេងៗគ្នា ដូចជា ឥណទានសហគមន៍ មូលនិធិភូមិ ក្រុមជួយខ្លួនឯង សមាគមន៍សន្សំប្រាក់ ក្រុមសន្សំប្រាក់ជាដើម ក៏ដោយ។
ក្រសួងអភិវឌ្ឍន៍ជនបទ និងអង្គការ OXFAM នៅថ្ងៃទី២៦ខែកញ្ញា បានរៀបចំសន្និសីទជាតិស្ដីពីសហគមន៍សន្សំប្រាក់ ដើម្បីរៀបចំយន្តការគាំទ្រក្រុមសន្សំប្រាក់ឲ្យមាននិរន្តរភាព និងជំរុញឲ្យក្រុមទាំងនោះចេះយកប្រភពហិរញ្ញវត្ថុមួយនេះទៅវិនិយោគ។ រដ្ឋមន្ត្រីក្រសួងអភិវឌ្ឍន៍ជនបទ លោក អ៊ុក រ៉ាប៊ុន បានថ្លែងយ៉ាងដូច្នេះថា៖«ការរៀបចំសន្និសីទថ្នាក់ជាតិនៅថ្ងៃនេះ គឺជាកិច្ចការមួយដ៏សំខាន់ និងបន្ទាន់សម្រាប់យើងទាំងអស់គ្នាយកចិត្តទុកដាក់ឲ្យបានម៉ត់ចត់ និងប្រកបដោយការទទួលខុសត្រូវខ្ពស់ក្នុងការពិនិត្យឲ្យគ្រប់ជ្រុងជ្រោយដើម្បីឲ្យសហគមន៍សន្សំប្រាក់នេះទទួលបាននូវវឌ្ឍនភាព និងចីរភាព»។
បើតាមលោក អ៊ុក រ៉ាប៊ុន គិតត្រឹមដើមឆ្នាំ២០១៦ មូលនិធិរបស់សហគមន៍សន្សំប្រាក់សរុបមានចំនួនរហូតដល់ ៤៦៣១២ លានរៀល (ប្រហែល១១,៤លានដុល្លារ) ដែលមាន ១២៤៧៥ ក្រុម និងមានពលរដ្ឋជាសមាជិកចំនួនជាង ២២ម៉ឺននាក់។
អង្គការក្រៅរដ្ឋាភិបាល បានជួយគាំទ្រក្រុមសន្សំប្រាក់ទាំងនេះ តាមរយៈការជំនួយបច្ចេកទេស ការជួយរៀបចំប្រព័ន្ធគ្រប់គ្រង ការបណ្ដុះបណ្ដាលអំពីហិរញ្ញវត្ថុជាដើម ដើម្បីធ្វើយ៉ាងណាឲ្យក្រុមទាំងនោះអាចដំណើរការមូលនិធិរបស់ខ្លួនបាន។
បើតាមលោកស្រី លឹម សូលីន នាយិកាអង្គការអុកស្វាមប្រចាំកម្ពុជា ចាប់តាំងពីឆ្នាំ១៩៩៣ មកទល់ពេលនេះ ស្ថាប័នរដ្ឋាភិបាល និងអង្គការក្រៅរដ្ឋាភិបាលប្រមាណជាង ១០០ស្ថាប័នបានធ្វើសកម្មភាពគាំទ្រសហគមន៍សន្សំប្រាក់។ ប៉ុន្តែបច្ចុប្បន្នមានអង្គការតែជាង ១០ប៉ុណ្ណោះ ដែលកំពុងធ្វើសកម្មភាពនេះ។
អង្គការ OXFAM ជាអ្នកគាំទ្រធំមួយដល់សហគមន៍សន្សំប្រាក់។ គិតចាប់ពីឆ្នាំ២០០៥ OXFAM ដោយសហការជាមួយអង្គការផ្សេងទៀតជាង ៤០ស្ថាប័នបានជួយចងក្រងក្រុមសន្សំប្រាក់ដែលមានសមាជិកជាង១៤ម៉ឺននាក់ លើទឹកប្រាក់សន្សំប្រមាណ ៥លានដុល្លារ។
ប៉ុន្តែមិនមែនក្រុមសន្សំទាំងនោះ អាចរក្សានិរន្តរភាពរបស់ខ្លួនបានទាំងអស់នោះឡើយ។ លោកស្រី លឹម សូលីន បញ្ជាក់ថា ក្រុមសន្សំដែលស្ថិតក្រោមគម្រោងគាំទ្ររបស់ OXFAM គឺមានចំនួន ៦៦ភាគរយដែលនៅបន្តសកម្មភាព ក្រោយបញ្ចប់គម្រោងគាំទ្រពីអង្គការរបស់ខ្លួន។ ចំពោះការបរាជ័យនៃក្រុមសន្សំប្រាក់ដែលមានចំនួន ៤៤ភាគរយ ត្រូវបានលោកស្រី លឹម សូលីន បញ្ជាក់ថាព្រោះសមាជិកក្រុមទាំងនោះបានធ្វើចំណាកស្រុក និងកត្តាអត់ការងារធ្វើ។
លោកស្រីបន្ថែមថា ការដាក់ប្រាក់សន្សំ គឺមានចំនួនចាប់ពី ៥០០រៀលក្នុងមួយខែឡើងទៅ។ លោកស្រីថា ក្រុមខ្លះឈានដល់បូកសរុបប្រាក់សន្សំបានរហូតដល់ ៣០ម៉ឺនដុល្លារឯណោះក្នុងរយៈពេលសន្សំរាប់ឆ្នាំ ដែលអាចឲ្យសមាជិកខ្ចីក្នុងចំនួនរាប់ពាន់ដុល្លារ។ លោកស្រីបញ្ជាក់ថា សន្និសីទខាងលើនេះក៏ផ្ដោតលើការគិតគូររៀបចំវិធានច្បាប់ដើម្បីការពារក្រុមអ្នកសន្សំធំៗទាំងនោះផងដែរ៕
© រក្សាសិទ្ធិដោយ thmeythmey.com