អន្តរជាតិ
ក្រោយកូរ៉េខាងជើងថាអាមេរិកប្រកាសសង្គ្រាម ចិនដាស់តឿនថា សង្គ្រាមឧបទ្វីបកូរ៉េគ្មានអ្នកឈ្នះទេ អ្នកនាំពាក្យក្រសួងការបរទេសចិន Lu Kang (រូបភាព៖ Xinhua)
× ក្រុងប៉េកាំង នៅថ្ងៃទី២៦ ខែកញ្ញា បានដាស់តឿនក្រុងវ៉ាស៊ីនតោន និងក្រុងព្យុងយ៉ាង ពីគ្រោះថ្នាក់បណ្ដាលមកពីសង្គ្រាមរវាងប្រទេសទាំងពីរនេះ។ ការដាស់តឿននេះធ្វើឡើង បន្ទាប់ពីរដ្ឋមន្ត្រីការបរទេសកូរ៉េខាងជើងនិយាយថា ប្រធានាធិបតី ដូណាល់ ត្រាំ បានប្រកាសសង្គ្រាមប្រឆាំងកូរ៉េខាងជើងរួចមក។ ចិនក៏បានស្នើឲ្យភាគីទាំងរក្សាការអត់ធ្មត់កម្រិតខ្ពស់ រំសាយកំហឹង និងងាករកផ្លូវចរចាឡើងវិញ។
សង្គ្រាមពាក្យសម្ដីរវាងអាមេរិក និងកូរ៉េខាងជើង បានពុះកញ្ជ្រោលដល់ចំណុចគួរឲ្យបារម្ភ បន្ទាប់ពីកូរ៉េខាងជើងចោទអាមេរិកថា បានប្រកាសសង្គ្រាមប្រឆាំងខ្លួន។ កូរ៉េខាងជើងបានលើកយកសម្ដីរបស់ប្រធានាធិបតី ដូណាល់ ត្រាំ ដែលគំរាមកម្ទេចកូរ៉េខាងជើង ដើម្បីចោទអាមេរិក និងបានយកមូលហេតុនេះដើម្បីគំរាមអាមេរិកវិញថា ខ្លួនរក្សាសិទ្ធិក្នុងការឆ្លើយតបសកម្មភាពរបស់អាមេរិកដូចជាការបាញ់ទម្លាក់យន្តហោះអាមេរិកជាដើម។
ចិន ដែលជាអ្នកជិតខាងរបស់កូរ៉េខាងជើង បានបង្ហាញការមិនពេញចិត្តចំពោះការឆ្លើយឆ្លងគ្នារវាងអាមេរិក និងកូរ៉េខាងជើង ហើយក៏បានប្រាប់ឲ្យប្រទេសទាំងពីរនេះឈប់បង្ករឿងដាក់គ្នាទៅវិញទៅមក។ ក្នុងសន្និសីទកាសែតនៅថ្ងៃទី២៦ ខែកញ្ញា អ្នកនាំពាក្យក្រសួងការបរទេសចិន Lu Kang បានផ្ញើសាររំឭកអាមេរិក និងកូរ៉េខាងជើងថា សង្គ្រាមដែលផ្ទុះឡើងនៅឧបទ្វីបកូរ៉េ នឹងមិនមានអ្នកណាឈ្នះឡើយ។
បើតាមអ្នកនាំពាក្យដដែលនេះ ក្រុងប៉េកាំងក៏សង្ឃឹមថា ក្រុងវ៉ាស៊ីនតោន និងក្រុងព្យុងយ៉ាងអាចចៀសវាងការប្រើប្រាស់អាវុធដើម្បីបញ្ចប់បញ្ហា ព្រោះជម្រើសយោធាមិនមែនជាច្រកចេញល្អឡើយ។ នេះមិនមែនជាលើកទីមួយទេ ដែលចិនព្រមានពីផលវិបាកដែលកើតចេញពីសង្គ្រាមរវាងអាមេរិក និងកូរ៉េខាងជើង ដ្បិតប្រទេសទាំងពីរសុទ្ធតែមានអាវុធនុយក្លេអ៊ែរ ដែលអាចសម្លាប់ជីវិតមនុស្សយ៉ាងច្រើនក្នុងមួយប៉ប្រិចភ្នែក។
កាលពីសប្ដាហ៍មុន រដ្ឋមន្ត្រីការបរទេសចិន វ៉ាង យី ក៏បានដាស់តឿនក្រុងព្យុងយ៉ាងឲ្យប្រយ័ត្នប្រយែងចំពោះសកម្មភាពរបស់ខ្លួន។ ក្នុងកិច្ចប្រជុំមហាសន្និបាតអង្គការសហប្រជាជាតិ លោក វ៉ាង យី បានប្រាប់កូរ៉េខាងជើងកុំដើរហួសពីដែនកំណត់ និងបានទទូចឲ្យសហរដ្ឋអាមេរិក គោរពកិច្ចប្រឹងប្រែងរបស់ខ្លួននៅក្នុងតំបន់ផងដែរ។ ចិនក៏នៅតែប្រកាន់ជំហរយកការចរចា ដែលជាមធ្យោបាយដ៏សក្តិសមបំផុតនៅក្នុងការដោះស្រាយវិបត្តិឧបទ្វីបកូរ៉េ។
ក្រុងប៉េកាំង ដែលជាសម្ព័ន្ធមិត្តជិតស្និទ្ធជាមួយគេរបស់របបដឹកនាំក្រុងព្យុងយ៉ាង ទំនងជាមិនពេញចិត្តទង្វើរបស់រដ្ឋកុម្មុយនីស្តមួយកាន់តែខ្លាំង ស្របពេលដែលរបបនេះបញ្ចេញសកម្មភាពគឃ្លើនម្ដងហើយម្ដងទៀត។ ឯរដ្ឋបាលលោក ត្រាំ វិញ ក៏នៅតែបន្តទទូចឲ្យចិនប្រើប្រាស់ឥទ្ធិពលរបស់ខ្លួនដើម្បីបង្ខំឲ្យកូរ៉េខាងជើងបោះបង់មហិច្ឆតាអភិវឌ្ឍនុយក្លអ៊ែរចោល រួចងាកចូលតុចរចាឡើងវិញ៕
Tag:
ចិន
អាមេរិក
កូរ៉េខាងជើង
© រក្សាសិទ្ធិដោយ thmeythmey.com